Artikolu 34 Rieżami tal-konformità mal-iskemi ta’ prestazzjoni u ta’ imposti

1.   Il-Kummissjoni għandha tirrieżamina regolarment il-konformità tal-Istati Membri mal-Artikoli 21 sa 27 u 29 sa 32 u l-atti ta’ implimentazzjoni msemmija fl-Artikoli 28 u 33. Meta twettaq dak ir-rieżami, il-Kummissjoni għandha tivvaluta jekk l-Istati Membri jiżgurawx, skont l-obbligu tagħhom ta’ kooperazzjoni sinċiera, il-konformità mill-fornituri tas-servizzi tan-navigazzjoni bl-ajru mal-obbligi tagħhom skont dawk l-Artikoli. Il-Kummissjoni għandha taġixxi f’konsultazzjoni mal-PRB u mal-awtoritajiet superviżorji nazzjonali.

2.   Meta l-Kummissjoni jkollha indikazzjonijiet ta’ nonkonformità mad-dispożizzjonijiet imsemmija fil-paragrafu 1, hija tista’ tibda investigazzjoni. Għandha tikkonkludi l-investigazzjoni fi żmien erba’ xhur, wara li tkun semgħet lill-Istat Membru u lill-awtorità superviżorja nazzjonali kkonċernata.

3.   Mingħajr preġudizzju għall-Artikolu 52(1), il-Kummissjoni għandha tikkondividi r-riżultati tal-investigazzjoni mal-Istat Membru kkonċernat u, fejn adatt, mal-fornituri kkonċernati tas-servizzi tan-navigazzjoni bl-ajru ddeżinjati skont l-Artikoli 8 u 10 u l-Kummissjoni tista’ toħroġ opinjoni dwar jekk kienx hemm konformità minn dak l-Istat Membru mal-Artikoli 21 sa 27 u 29 sa 32 u mal-atti ta’ implimentazzjoni msemmija fl-Artikoli 28 u 33. Hija għandha tinnotifika din l-opinjoni lill-Istat Membru kkonċernat.