Artikolu 28 Obbligi relatati mal-mili mill-ġdid

1.   L-operaturi ekonomiċi li joffru l-possibbiltà li l-prodotti jinxtraw permezz tal-mili mill-ġdid għandhom jinformaw lill-utenti finali b'dan li ġej (“regoli għall-mili mill-ġdid”):

Ir-regoli għall-mili mill-ġdid għandhom jiġu aġġornati regolarment u għandhom jew jintwerew b'mod ċar fuq il-post inkella jiġu pprovduti mod ieħor lill-utenti finali.

2.   L-operaturi ekonomiċi li joffru l-possibbiltà li l-prodotti jinxtraw permezz tal-mili mill-ġdid għandhom jiżguraw li l-istazzjonijiet ta' mili mill-ġdid jikkonformaw mar-rekwiżiti stabbiliti fil-Parti C tal-Anness VI u ma' kwalunkwe rekwiżit stabbilit f'atti legali oħra tal-Unjoni għall-bejgħ tal-prodotti permezz tal-mili mill-ġdid.

3.   L-operaturi ekonomiċi li joffru l-possibbiltà li l-prodotti jinxtraw permezz tal-mili mill-ġdid għandhom jiżguraw li jekk l-imballaġġ jew il-kontenituri jiġu offruti lill-utenti finali fl-istazzjonijiet ta' mili mill-ġdid, dak l-imballaġġ u dawk il-kontenituri ma jiġux ipprovduti mingħajr ħlas jekk ma jissodisfawx ir-rekwiżiti stabbiliti fl-Anness VI jew jiġu pprovduti bħala parti minn sistema ta' rifużjoni tad-depożitu.

4.   L-operaturi ekonomiċi jistgħu jirrifjutaw li jimlew mill-ġdid kontenitur ipprovdut mill-utent finali jekk l-utent finali ma jikkonformax mar-regoli għall-mili mill-ġdid ikkomunikati mill-operatur ekonomiku skont il-paragrafu 1, b'mod partikolari jekk l-operaturi ekonomiċi jqisu li l-kontenitur mhuwiex iġjeniku jew mhux adattat għall-bejgħ tal-ikel jew tax-xorb. L-operaturi ekonomiċi ma għandhom iġorru l-ebda responsabbiltà għal problemi ta' iġjene jew sikurezza tal-ikel li jirriżultaw mill-użu ta' kontenituri pprovduti mill-utent finali.

5.   Mill-1 ta' Jannar 2030, id-distributuri finali b'żona tal-bejgħ ta' aktar minn 400 m2 għandhom jagħmlu ħilithom biex jiddedikaw 10 % ta' dik iż-żona tal-bejgħ għall-istazzjonijiet ta' mili mill-ġdid kemm għall-prodotti tal-ikel kif ukoll għal dawk mhux tal-ikel.