Artikolu 10 Dritt ta’ persuni fiżiċi għal nonparteċipazzjoni f’użu primarju

1.   Il-liġijiet tal-Istati Membri jistgħu jipprevedu li persuni fiżiċi jkollhom id-dritt ta’ nonparteċipazzjoni fl-aċċess għad-data elettronika personali tagħhom dwar is-saħħa rreġistrata f’sistema ta’ EHR permezz tas-servizzi ta’ aċċess għad-data elettronika dwar is-saħħa msemmija fl-Artikoli 4 u 12. F’tali każijiet, l-Istati Membri jenħtieġ li jiżguraw li l-eżerċizzju ta’ dak id-dritt ikun riversibbli.

2.   Jekk Stat Membru jipprevedi dritt imsemmi fil-paragrafu 1 ta’ dan l-Artikolu, għandu jistabbilixxi r-regoli u s-salvagwardji speċifiċi dwar il-mekkaniżmu ta’ nonparteċipazzjoni. B’mod partikolari, l-Istati Membri jistgħu jipprevedu li fornitur tal-kura tas-saħħa jew professjonist tas-saħħa ikunu jistgħu jiksbu aċċess għad-data elettronika personali dwar is-saħħa f’każijiet meta l-ipproċessar ikun meħtieġ sabiex jiġu protetti l-interessi vitali tas-suġġett tad-data jew ta’ persuna fiżika oħra kif imsemmi fl-Artikolu 9(2), il-punt (c), tar-Regolament (UE) 2016/679, anki jekk il-pazjent ikun eżerċita d-dritt ta’ nonparteċipazzjoni f użu primarju.