TAQSIMA 1 Drittijiet tal-persuni fiżiċi fir-rigward tal-użu primarju tad-data elettronika personali tagħhom dwar is-saħħa, u dispożizzjonijiet relatati

Artikolu 5

Il-persuni fiżiċi, jew ir-rappreżentanti tagħhom imsemmija fl-Artikolu 4(2), għandu jkollhom id-dritt li jdaħħlu informazzjoni fl-EHR ta’ dawk il-persuni fiżiċi permezz ta’ servizzi jew applikazzjonijiet tal-aċċess għad-data elettronika dwar is-saħħa marbuta ma’ dawk is-servizzi kif imsemmi f’dak l-Artikolu. Dik l-informazzjoni għandha tkun distingwibbli b’mod ċar li tkun ġiet imdaħħla mill-persuna fiżika jew mir-rappreżentant tagħha. Il-persuni fiżiċi, jew ir-rappreżentanti tagħhom imsemmija fl-Artikolu 4(2), ma għandhomx ikunu jistgħu jbiddlu direttament id-data elettronika dwar is-saħħa u informazzjoni relatata mdaħħla minn professjonisti tas-saħħa.

Artikolu 6

Is-servizzi ta’ aċċess għal data elettronika dwar is-saħħa msemmija fl-Artikolu 4 għandhom jippermettu lill-persuni fiżiċi jitolbu faċilment online rettifika tad-data elettronika personali dwar is-saħħa tagħhom f’konformità mal-Artikolu 16 tar-Regolament (UE) 2016/679. Meta xieraq, il-kontrollur għandu jivverifika ma professjonist rilevanti tas-saħħa l-preċiżjoni tal-informazzjoni pprovduta fit-talba.

Istati Membri jistgħu jippermettu wkoll lill-persuni fiżiċi jeżerċitaw online drittijiet oħra skont il-Kapitolu III tar-Regolament (UE) 2016/679 permezz ta’ servizzi ta’ aċċess għal data elettronika dwar is-saħħa.

Artikolu 17

Il-Kummissjoni għandha, permezz ta’ atti ta’ implimentazzjoni, tiddetermina r-rekwiżiti għall-implimentazzjoni teknika tad-drittijiet stabbiliti f’din it-Taqsima.

Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 98(2).

Artikolu 18

Il-fornituri li jirċievu d-data skont dan il-Kapitolu ma għandhomx ikunu meħtieġa jikkumpensaw lill-fornitur tal-kura tas-saħħa talli għamel id-data elettronika personali dwar is-saħħa disponibbli. Fornitur tal-kura tas-saħħa jew parti terza ma għandhomx jimponu direttament jew indirettament fuq is-suġġetti tad-data tariffa jew kostijiet, jew jirrikjedu kumpens, għall-kondiviżjoni jew l-aċċess għad-data.