Artikolu 95 Gruppi ta’ tmexxija għal Saħħti@UE (MyHealth@EU) u DataTas-Saħħa@UE (HealthData@EU)

1.   Il-grupp ta’ tmexxija DataTas-Saħħa@UE (HealthData@EU) u l-grupp ta’ tmexxija Saħħa@UE (HealthData@EU) (“il-gruppi ta’ tmexxija”)qed jiġu stabbiliti żewġ gruppi ta’ Tmexxija għall-infrastrutturi transkonfinali previsti fl-Artikoli 23 u 75.. Kull grupp ta’ tmexxija għandu jkun magħmul minn rappreżentant wieħed għal kull Stat Membru maħtur mill-punt ta’ kuntatt nazzjonali rilevanti.

2.   Il-gruppi ta’ tmexxija għandhom jieħdu deċiżjonijiet operazzjonali dwar l-iżvilupp u l-operat ta’ MyHealth@EU u HealthData@EU msemmija fl-Artikoli 23 u 75.

3.   Il-gruppi ta’ tmexxija għandhom jieħdu deċiżjonijiet b’kunsens. Meta ma jkunx jista’ jintlaħaq kunsens, id-deċiżjoni għandha tiġi adottata minn żewġ terzi tal-membri. Għall-adozzjoni tad-deċiżjoni, kull Stat Membru għandu jkollu vot wieħed.

4.   Il-gruppi ta’ tmexxija għandu jadotta r-regoli ta’ proċedura li jistabbilixxu l-kompożizzjoni, l-organizzazzjoni, il-funzjonament u l-kooperazzjoni tagħhom.

5.   Parteċipanti awtorizzati oħra jistgħu jiġu mistiedna jiskambjaw informazzjoni u fehmiet dwar kwistjonijiet rilevanti relatati ma’ MyHealth@EU u HealthData@EU. Fejn dawk il-parteċipanti awtorizzati jiġu mistiedna, għandu jkollhom rwol ta’ osservatur.

6.   Il-partijiet ikkonċernati u l-partijiet terzi rilevanti, inklużi rappreżentanti tal-pazjenti, tal-professjonisti tas-saħħa, tal-konsumaturi u tal-industrija, jistgħu jiġu mistiedna jattendu l-laqgħat tal-gruppi ta’ tmexxija bħala osservaturi.

7.   Il-gruppi ta’ tmexxija għandhom jeleġġu l-presidenti għal-laqgħat tagħhom.

8.   Il-gruppi ta’ tmexxija għandhom ikunu megħjuna minn segretarjat ipprovdut mill-Kummissjoni.