Artikolu 23 Kriterji ta’ aċċess u parteċipazzjoni

1.   Operatur ta’ SIPS għandu jistabbilixxi u jiżvela pubblikament kriterji ta’ aċċess u parteċipazzjoni li mhumiex diskriminatorji lis-servizzi tas-SIPS għal parteċipanti diretti, u, fejn rilevanti, parteċipanti indiretti u għal IFM oħrajn. Għandu jirrevedi l-kriterji mill-inqas b’mod annwali.

2.   Il-kriterji ta’ aċċess u parteċipazzjoni msemmija fil-paragrafu 1 għandhom jiġu ġustifikati f’termini ta’ sigurtà u effiċjenza tas-SIPS u tas-swieq li jservu, u jkunu mfassla għal u proporzjonati mar-riskji speċifiċi tas-SIPS. F’konformità mal-prinċipju tal-proprozjonalità, operatur ta’ SIPS għandu jistabbilixxi rekwiżiti li jirrestrinġu aċċess bl-inqas mod possibbli. Jekk operatur ta’ SIPS jiċħad aċċess għal entità li tapplika, għandu jagħti r-raġunijiet bil-miktub għal dan, abbażi ta’ analiżi komprensiva tar-riskju.

3.   Operatur ta’ SIPS għandu jżomm monitoraġġ tal-konformità tal-parteċipanti mal-kriterji ta’ aċċess u parteċipazzjoni tas-SIPS fuq bażi kontinwa. Operatur ta’ SIPS għandu jistabbilixxi proċeduri li mhumiex diskriminatorji li jiffaċilitaw is-suspensjoni u t-terminazzjoni ordinata tad-dritt tal-parteċipant li jipparteċipa fejn il-parteċipant jonqos milli jikkonforma mal-kriterji u għandu jiżvela pubblikament aspetti ewlenin rilevanti ta’ dawn il-proċeduri. Huwa għandu jirrevedi l-proċeduri mill-inqas darba fis-sena.