Artikolu 80 Limiti għal pagamenti kbar fi flus kontantibi skambju għal oġġetti jew servizzi

1.   Persuni li jinnegozjaw f’oġġetti jew li jipprovdu servizzi jistgħu jaċċettaw jew jagħmlu pagament fi flus kontanti sa ammont ta’ mhux aktar minn EUR 10 000 jew l-ekwivalenti f’munita nazzjonali jew barranija, kemm jekk it-tranżazzjoni ssir f’operazzjoni waħda kif ukoll jekk issir f’diversi operazzjonijiet li jidhru li jkunu assoċjati ma’ xulxin.

2.   L-Istati Membri jistgħu jadottaw limiti aktar baxxi wara konsultazzjoni mal-Bank Ċentrali Ewropew f’konformità mal-Artikolu 2(1) tad-Deċiżjoni tal-Kunsill 98/415/KE (47). Dawk il-limiti aktar baxxi għandhom jiġu nnotifikati lill-Kummissjoni fi żmien tliet xhur mill-introduzzjoni tal-miżura fil-livell nazzjonali.

3.   Meta diġà jkunu jeżistu limiti fil-livell nazzjonali li jkunu inqas mil-limitu stipulat fil-paragrafu 1, dawn għandhom jibqgħu japplikaw. L-Istati Membri għandhom jinnotifikaw dawk il-limiti lill-Kummissjoni sal-10 ta’ Ottubru 2024.

4.   Il-limitu msemmi fil-paragrafu 1 ma għandux japplika għal:

Pagamenti jew depożiti msemmija fl-ewwel subparagrafu, il-punt (b), ’il fuq mil-limitu għandhom jiġu rrapportati lill-FIU fi żmien l-iskadenzi imposti mill-FIU.

5.   L-Istati Membri għandhom jiżguraw li jittieħdu miżuri xierqa, inkluż l-impożizzjoni ta’ penali, kontra persuni fiżiċi jew ġuridiċi li jaġixxu fil-kapaċità professjonali tagħhom li jkunu suspettati bi ksur tal-limitu stabbilit fil-paragrafu 1, jew ta’ limitu aktar baxx adottat mill-Istati Membri.

6.   Il-livell ġenerali tal-penali għandu jiġi kkalkulat, f’konformità mad-dispożizzjonijiet rilevanti tal-liġi nazzjonali, b’tali mod li jipproduċi riżultati proporzjonati mal-gravità tal-ksur, u b’hekk jiskoraġġixxi b’mod effettiv aktar reati tal-istess tip.

7.   Meta, minħabba force majeure, mezzi ta’ pagament permezz ta’ fondi kif definiti fl-Artikolu 4, il-punt (25), tad-Direttiva (UE) 2015/2366 għajr karti tal-flus u muniti ma jibqgħux disponibbli fil-livell nazzjonali, l-Istati Membri jistgħu temporanjament jissospendu l-applikazzjoni tal-paragrafu 1 jew, fejn ikun applikabbli, tal-paragrafu 2 ta’ dan l-Artikolu u għandhom jinfurmaw lill-Kummissjoni b’dan mingħajr dewmien. L-Istati Membri għandhom ukoll jinfurmaw lill-Kummissjoni bid-durata mistennija tan-nuqqas ta’ disponibbiltà ta’ mezzi ta’ pagament minn fondi kif definiti fl-Artikolu 4, il-punt (25), tad-Direttiva (UE) 2015/2366 għajr karti tal-flus u muniti u bil-miżuri meħuda mill-Istati Membri biex jerġgħu jistabbilixxu d-disponibbiltà tagħhom.

Meta, abbażi tal-informazzjoni kkomunikata mill-Istat Membru, il-Kummissjoni tqis li s-sospensjoni tal-applikazzjoni tal-paragrafu 1 jew, fejn ikun applikabbli, tal-paragrafu 2 ma tkunx ġustifikata minn każ ta’ force majeure, hija għandha tadotta deċiżjoni indirizzata lil dak l-Istat Membru fejn titlob it-tneħħija immedjata ta’ tali sospensjoni.