Parti 5 – Kriterji ta’ verifika li l-kollateral mhuwiex aggravat mid-drittijiet ta’ kwalunkwe parti terza

Punt (13) tal-Artikolu 2(1) tad-Direttiva 2014/49/UE jipprevedi li l-kollateral ma għandux ikun aggravat minn ebda dritt ta' parti terza. Sussegwentement, l-SGDs u l-awtoritajiet maħtura ma għandhom jaċċettaw ebda ass b’riskju baxx li diġà huwa aggravat jew kollateralizzat permezz ta’ rahan jew arranġamenti ta’ sigurtà oħra.

L-assi pprovduti skont arranġament ta’ kollateral finanzjarju għandhom ikunu jistgħu jiġu realizzati b’mod legali mingħajr pretensjonijiet minn qabel fuq l-assi kkonċernati. Ma għandux ikun possibbli għall-partijiet terzi li jintervjenu u jippretendu b’suċċess l-assi mirhuna jew kwalunkwe dritt marbut magħhom.

Għal dak l-għan, l-arranġament ta’ kollateral finanzjarju għandu jipprevedi li istituzzjonijiet tal-kreditu jwiegħdu u jiggarantixxu li ebda ass b’riskju baxx ipprovdut bħala kollateral ma huwa simultanjament aggravat jew użat bħala kollateral favur kwalunkwe parti terza jew sabiex jiġi assigurat obbligu diġà eżistenti lejn l-SGD, u jwiegħdu li ebda ass użat skont l-arranġament ta’ sigurtà ta’ kollateral finanzjarju ma jingħata bħala kollateral lil xi parti terza.