RIALACHÁN CUR CHUN FEIDHME (AE) 2024/2902 ÓN gCOIMISIÚN an 20 Samhain 2024 lena leagtar síos caighdeáin theicniúla cur chun feidhme i ndáil le cur i bhfeidhm Rialachán (AE) 2023/1114 ó Pharlaimint na hEorpa agus ón gComhairle maidir le tuairisciú a bhaineann le comharthaí sócmhainn-tagartha agus le comharthaí ríomh-airgid atá ainmnithe in airgeadra nach airgeadra oifigiúil de chuid Ballstáit é (Téacs atá ábhartha maidir le LEE)

(1)

Chun críocha an tuairiscithe dá dtagraítear in Airteagal 22(1), pointe (a) de Rialachán (AE) 2023/1114, ba cheart d’eisitheoirí miondealú a sholáthar don líon sealbhóirí de réir shuíomh an tsealbhóra agus laistigh den suíomh sin an líon sealbhóirí tiachóg coinneála agus an líon sealbhóirí tiachóg neamhchoinneála nó sealbhóirí aon chineál eile seoltaí mórleabhar dáilte a úsáidtear chun críoch socraíochta agus nach bhfuil á rialú ag an sealbhóir ná ag soláthraí seirbhísí cripteashócmhainní. Laistigh den dá chatagóir sealbhóirí tiachóg sin, is é sin sealbhóirí tiachóg coinneála agus sealbhóirí tiachóg neamh-choinneála, ba cheart d’eisitheoirí, le miondealú breise, líon na sealbhóirí miondíola a sholáthar. Tá gá leis na miondealuithe sin go léir do na húdaráis inniúla, toisc go bhfuil faisnéis faoi chomhchruinniú na sealbhóirí agus faoi na méideanna do na sealbhóirí miondíola ábhartha do na maoirseoirí chun cuspóirí Rialachán (AE) 2023/1114 a chomhlíonadh agus chun feidhmiú cuí na margaí i gcripteashócmhainní, sláine an mhargaidh agus cobhsaíocht airgeadais san Aontas a áirithiú, chomh maith le cosaint sealbhóirí cripteashócmhainní, go háirithe sealbhóirí miondíola. An fhaisnéis a sholáthraítear leis an miondealú de réir shuíomh na sealbhóirí, ba cheart í a úsáid freisin chun a chinneadh cé na húdaráis inniúla a cháileoidh le bheith ina gcomhaltaí de choláiste faoi Airteagal 119(2), pointe (l), de Rialachán (AE) 2023/1114, de réir na gcritéar a leagtar amach i Rialachán Tarmligthe [C(2024) 6911] (2) ón gCoimisiún.

(2)

Chun críoch an tuairiscithe dá dtagraítear in Airteagal 22(1), pointe (b), de Rialachán (AE) 2023/1114, agus chun a áirithiú go ndéanfar maoirseacht chuí ar na ceanglais maidir le cúlchiste sócmhainní faoi Airteagail 36 agus 38 den Rialachán sin, faoi Rialachán Tarmligthe ón gCoimisiún lena mbunaítear caighdeáin theicniúla rialála arna nglacadh de bhun Airteagal 36(4) de Rialachán (AE) 2023/1114, agus faoi Rialachán Tarmligthe ón gCoimisiún lena mbunaítear caighdeáin theicniúla rialála arna nglacadh de bhun Airteagal 38(5) de Rialachán (AE) 2023/1114, ba cheart d’eisitheoirí méid an chúlchiste sócmhainní a sholáthar ar bhealach miondealaithe chun luach agus comhdhéanamh an chúlchiste sócmhainní a léiriú, lena n-áirítear bearta bainistithe leachtachta.

(3)

I gcomhréir le hAirteagal 22(1), an dara fomhír, de Rialachán (AE) 2023/1114, ní áirítear le hidirbhearta atá le tuairisciú i gcomhréir le hAirteagal 22(1), pointí (c) agus (d), de Rialachán (AE) 2023/1114 ach idirbhearta as a n-eascraíonn athrú ar an duine nádúrtha nó dlítheanach atá i dteideal an chomhartha sócmhainn-tagartha agus, idirbhearta a shocraítear ar an mórleabhar dáilte (‘idirbhearta ar an slabhra’) agus idirbhearta a shocraítear lasmuigh den mhórleabhar dáilte (‘idirbhearta seachshlabhra’). Thairis sin, maidir le coincheap an “idirbhirt’” dá dtagraítear in Airteagal 22(1), an dara fomhír, den Rialachán sin , ní bhaineann sé leis an gcineál tiachóg a úsáideann an tionscnóir nó an tairbhí chun idirbheart a sheoladh nó a fháil. Dá réir sin, ba cheart a áireamh sna ceanglais tuairiscithe dá dtagraítear in Airteagal 22(1), pointí (c) agus (d), den Rialachán sin idirbhearta idir tiachóga coinneála agus idirbhearta idir tiachóg choinneála, ar thaobh amháin, agus tiachóg neamhchoinneála nó cineálacha eile seoltaí mórleabhar dáilte nach bhfuil á rialú ag sealbhóir comhartha sócmhainn-tagartha nó ag soláthraí seirbhísí cripteashócmhainní, ar an taobh eile. Ina theannta sin, leis an gceanglas tuairiscithe dá dtagraítear in Airteagal 22(1), pointe (c), de Rialachán (AE) 2023/1114 ba cheart idirbhearta a chumhdach freisin idir tiachóga neamhchoinneála agus idir tiachóga neamhchoinneála agus cineálacha eile seoltaí mórleabhar dáilte nach bhfuil á rialú ag sealbhóir comhartha sócmhainn-tagartha nó ag soláthraí seirbhísí cripteashócmhainní. Ós rud é nach bhfuil ach faisnéis theoranta ag eisitheoirí faoi na sealbhóirí a bhfuil baint acu leis na hidirbhearta sin, i gcásanna áirithe ní féidir a chinneadh an idirbhearta iad na hidirbhearta sin atá le tuairisciú faoi Airteagal 22(1) den Rialachán sin. Dá bhrí sin, chun an fhaisnéis is cruinne is féidir a bheith ann maidir leis na hidirbhearta sin, ba cheart a áireamh sa cheanglas tuairiscithe dá dtagraítear in Airteagal 22(1), pointe (c), den Rialachán sin faisnéis maidir le haistrithe idir tiachóga neamhchoinneála agus idir tiachóga neamhchoinneála agus cineálacha eile seoltaí mórleabhar dáilte a úsáidtear chun críoch socraíochta agus nach bhfuil á rialú ag sealbhóir comhartha sócmhainn-tagartha nó ag soláthraí seirbhísí cripteashócmhainní. Ós rud é gur fothacar d’aistrithe iad idirbhearta, d’fhéadfaí faisnéis bhreise den sórt sin maidir le haistrithe idir tiachóga neamhchoinneála agus idir tiachóga neamhchoinneála agus cineálacha eile seoltaí mórleabhar dáilte nach bhfuil á rialú ag sealbhóir comhartha sócmhainn-tagartha nó ag soláthraí seirbhísí cripteashócmhainní a úsáid mar ionadú agus d’fhéadfaí faisnéis úsáideach a sholáthar léi maidir le líon agus luach na n-idirbheart idir tiachóga neamhchoinneála agus idir tiachóga neamhchoinneála agus cineálacha eile seoltaí mórleabhar dáilte nach bhfuil á rialú ag sealbhóir comhartha sócmhainn-tagartha nó ag soláthraí seirbhísí cripteashócmhainní.

(4)

Chun críoch an cheanglais tuairiscithe dá dtagraítear in Airteagal 22(1), pointe (c), de Rialachán (AE) 2023/1114, ba cheart d’eisitheoirí an fhaisnéis faoi na hidirbhearta a sholáthar le miondealú le haghaidh dáileadh geografach, rud a chiallaíonn tíortha na sealbhóirí a bhfuil baint acu leis na hidirbhearta. Le miondealú den sórt sin bheadh faisnéis úsáideach á soláthar maidir le comhchruinniú idirbheart le haghaidh na n-údarás inniúil a dhéanann a róil mhaoirseachta. Maidir leis an bhfaisnéis a sholáthraítear leis an miondealú de réir tíortha ar na hidirbhearta, bainfear úsáid freisin as chun a chinneadh cé na húdaráis inniúla a cháileoidh le bheith ina gcomhaltaí de choláiste faoi Airteagal 119 de Rialachán (AE) 2023/1114, mar a fhoráiltear i Rialachán Tarmligthe [C(2024) 6911]. Ní gá an miondealú sin a dhéanamh le haghaidh na n-idirbheart agus na n-aistrithe idir tiachóga neamhchoinneála nó idir tiachóga neamhchoinneála agus cineálacha eile seoltaí mórleabhar dáilte nach bhfuil á rialú ag sealbhóir comhartha sócmhainn-tagartha nó ag soláthraí seirbhísí cripteashócmhainní, i ngeall ar an bhfaisnéis theoranta atá ag eisitheoirí ar na sealbhóirí a bhfuil baint acu le hidirbhearta agus le haistrithe den sórt sin.

(5)

Chun a bheith éifeachtach, ba cheart a áireamh sa chreat tuairiscithe dátaí tagartha maidir le tuairisciú agus dátaí íocaíochta lena n-áiritheofar comhroinnt chuí thráthúil sonraí ionas go mbainfidh na sonraí leis an tréimhse chéanna agus go gcuirfear isteach iad an tráth céanna le haghaidh na n-eintiteas tuairiscithe uile, agus inchomparáideacht sonraí ar fud na n-eisitheoirí agus na n-údarás inniúil a cheadú, agus formáidí agus teimpléid chaighdeánaithe á n-úsáid ag an am céanna.

(6)

Ba cheart leanúnachas an tuairiscithe a áirithiú i gcásanna ina bhfágfadh athruithe sealadacha ar luach eisiúna na gcomharthaí go rachadh an luach sin faoi bhun na tairsí dá dtagraítear in Airteagal 22(1) de Rialachán (AE) 2023/1114. Dá bhrí sin, is gá tuairisciú a cheangal le haghaidh am breise chun a dhearbhú an titim shealadach í an titim faoi bhun na tairsí. Ní bheadh aon tionchar aige sin ar na heisitheoirí, toisc go mbeidh a gcórais tuairiscithe i bhfeidhm acu cheana féin.

(7)

Chun críoch an cheanglais tuairiscithe dá dtagraítear in Airteagal 22(3) de Rialachán 2023/1114, maidir le cuid den fhaisnéis ba cheart do sholáthraithe seirbhísí cripteashócmhainní a sholáthar do na heisitheoirí, d’fhéadfadh sonraí pearsanta a bheith ar áireamh inti nuair a bhaineann siad le daoine nádúrtha. Áirítear leis sin ainmneacha iomlána a bhfuil uimhreacha aitheantais náisiúnta, uimhreacha oifigiúla chlárúcháin chánach nó uimhreacha pas ag gabháil leo. Is gá sonraí pearsanta den sórt sin a bhailiú sa chás seo chun cuspóirí Rialachán (AE) 2023/1114 a bhaint amach toisc nach bhféadfadh na heisitheoirí líon cruinn sealbhóirí comhartha sócmhainn-tagartha a chinneadh gan an fhaisnéis sin agus bheadh áireamh dúbailte á dhéanamh acu ar shealbhóirí a bhfuil cuntais iolracha acu le soláthraithe seirbhísí cripteashócmhainní éagsúla. Dhéanfadh sonraí neamhchruinne den sórt sin saobhadh ar an bhfaisnéis a thuairiscítear do na húdaráis inniúla faoin líon sealbhóirí comhartha sócmhainn-tagartha agus, dá bhrí sin, chuirfeadh sé bac ar na húdaráis inniúla maoirseacht chuí a dhéanamh. Mar thoradh air sin, níl aon bhealach eile ann chun an fhaisnéis faoi shealbhóirí comharthaí sócmhainn-tagartha a léiriú go cruinn sa tuairisciú agus ní féidir na gnáthbhearta chun comhroinnt sonraí pearsanta a theorannú nó a chosaint, amhail ainm bréige a chur i bhfeidhm, a chur i bhfeidhm sa chás sin.

(8)

Chun críoch an cheanglais tuairiscithe dá dtagraítear in Airteagal 22(3) de Rialachán 2023/1114, ba cheart do sholáthraithe seirbhísí cripteashócmhainní na seoltaí mórleabhar dáilte poiblí a úsáideann siad chun aistrithe a dhéanamh thar ceann a gcliant a sholáthar don eisitheoir freisin. Tá gá leis an bhfaisnéis den sórt sin chun go mbeidh eisitheoirí in ann a shainaithint cé na hidirbhearta atá cláraithe ar an mórleabhar dáilte a tharlaíonn idir tiachóga neamhchoinneála agus na hidirbhearta faoi raon feidhme na n-oibleagáidí tuairiscithe a thuairisciú.

(9)

Chun a áirithiú go bhfuil an fhaisnéis a thuairiscítear don údarás inniúil ceart agus iomlán, ba cheart córais agus nósanna imeachta a bheith i bhfeidhm ag eisitheoirí lena gceadaítear don eisitheoir na sonraí a fhaightear ó na soláthraithe seirbhísí cripteashócmhainní a réiteach de bhun Airteagal 22(3) de Rialachán (AE) 2023/1114. Le córais agus nósanna imeachta den sórt sin, ba cheart an t-eisitheoir a bheith in ann na sonraí a thuairiscíonn soláthraithe seirbhísí cripteashócmhainní a réiteach leis na sonraí atá ar fáil don eisitheoir ó fhoinsí eile, lena n-áirítear, i gcás inarb infheidhme, sonraí idirbhirt atá ar fáil ar an mórleabhar dáilte.

(10)

Ba cheart d’eisitheoirí uastréimhse choinneála a chur chun feidhme ina mbeartais inmheánacha maidir le sonraí pearsanta na sealbhóirí aonair arna gcomhroinnt ag na soláthraithe seirbhísí cripteashócmhainní. I bhfianaise an chuspóra maidir le comhlíonadh na n-oibleagáidí tuairiscithe de bhun Airteagal 22(1) de Rialachán (AE) 2023/1114 a áirithiú, níor cheart an uastréimhse choinneála sin a bheith níos faide ná 5 bliana ón dáta a fhaightear na sonraí pearsanta.

(11)

Ba cheart feidhm mutatis mutandis a bheith ag an Rialachán seo freisin maidir le comharthaí ríomh-airgid atá ainmnithe in airgeadra nach airgeadra oifigiúil de chuid Ballstáit é ó tharla go bhfuil feidhm ag Airteagal 22 de Rialachán (AE) 2023/1114 maidir le comharthaí ríomh-airgid atá ainmnithe in airgeadra den sórt sin.

(12)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (3) agus thug sé tuairim uaidh an 16 Iúil 2024.

(13)

Chun ailíniú le dáta chur i bhfeidhm Rialachán (AE) 2023/1114 i ndáil le soláthraithe seirbhísí cripteashócmhainní, ba cheart dáta chur i bhfeidhm an Rialacháin seo a chur siar.

(14)

Tá an Rialachán seo bunaithe ar na dréachtchaighdeáin theicniúla cur chun feidhme a chuir an tÚdarás Baincéireachta Eorpach faoi bhráid an Choimisiúin.

(15)

Rinne an tÚdarás Baincéireachta Eorpach comhairliúcháin phoiblí oscailte a reáchtáil maidir leis na dréachtchaighdeáin theicniúla cuir chun feidhme ar a bhfuil an Rialachán seo bunaithe, rinne sé anailís ar na costais agus ar na tairbhí a d’fhéadfadh a bheith ag baint leo agus d’iarr sé comhairle ar an nGrúpa Geallsealbhóirí Baincéireachta arna bhunú i gcomhréir le hAirteagal 37 de Rialachán (AE) Uimh. 1093/2010 ó Pharlaimint na hEorpa agus ón gComhairle (4),