Airteagal 58 Smachtbhannaí airgid, bearta riaracháin agus íocaíochtaí pionósacha tréimhsiúla a fhoilsiú

1.   Áiritheoidh na Ballstáit go bhfoilseoidh maoirseoirí ar a suíomh gréasáin, i bhformáid inrochtana, cinntí lena bhforchuirtear smachtbhannaí airgid, lena gcuirtear i bhfeidhm bearta riaracháin dá dtagraítear in Airteagal 56(2), pointí (c) go (g) de bhun Airteagal 56(1), pointe (a), nó lena bhforchuirtear íocaíochtaí pionósacha tréimhsiúla.

2.   Áiritheoidh na Ballstáit go bhfoilseoidh an maoirseoir na cinntí dá dtagraítear i mír 1 díreach tar éis do na daoine atá freagrach as an sárú a chur ar an eolas faoi na cinntí sin.

De mhaolú ar an gcéad fhomhír, i gcás ina mbaineann an foilsiú le bearta riaracháin a bhfuil achomharc á dhéanamh ina gcoinne agus nach bhfuil sé d’aidhm acu sáruithe tromchúiseacha, leantacha, córasacha a leigheas, féadfaidh na Ballstáit cead a thabhairt d’fhoilsiú na mbeart riaracháin sin a chur siar go dtí go rachaidh an sprioc-am chun achomharc a thaisceadh in éag.

I gcás ina dtagraíonn an foilsiú do chinntí a bhfuil achomharc á dhéanamh ina gcoinne, déanfaidh na maoirseoirí an fhaisnéis sin agus aon fhaisnéis ina dhiaidh sin faoi thoradh an achomhairc sin a fhoilsiú, láithreach, ar a suíomh gréasáin. Foilseofar freisin aon chinneadh lena gcuirtear ar neamhní cinneadh a rinneadh roimhe sin chun smachtbhanna airgid a fhorchur, beart riaracháin a chur i bhfeidhm nó íocaíocht phionósach thréimhsiúil a fhorchur.

3.   Áireofar san fhoilsiú sin, ar a laghad, faisnéis faoi chineál agus nádúr an tsáraithe agus faoi chéannacht na ndaoine atá freagrach agus, i gcás smachtbhannaí airgid agus íocaíochtaí pionósacha tréimhsiúla, a méideanna. Ní bheidh sé d’oibleagáid ar na Ballstáit an fhomhír seo a chur i bhfeidhm maidir le cinntí lena gcuirtear i bhfeidhm bearta riaracháin atá de chineál imscrúdaitheach, nó a dhéantar de bhun Airteagal 56(2), pointí (a) agus (c).

I gcás ina measfaidh na maoirseoirí, tar éis measúnú cás ar chás, go mbeadh sé míréireach céannacht nó sonraí pearsanta na ndaoine atá freagrach dá dtagraítear sa chéad fhomhír a fhoilsiú, nó i gcás ina gcuirfí cobhsaíocht na margaí airgeadais nó imscrúdú atá idir lámha i mbaol leis an bhfoilsiú, déanfaidh na maoirseoirí an méid seo a leanas:

4.   Áiritheoidh na Ballstáit i ndáil le haon fhoilsiú a dhéantar i gcomhréir leis an Airteagal seo, go bhfanfaidh sé ar shuíomh gréasáin na maoirseoirí ar feadh tréimhse 5 bliana i ndiaidh a fhoilsithe. Aon sonraí pearsanta atá san fhoilsiú áfach, ní choinneofar ar shuíomh gréasáin na maoirseoirí iad ach amháin ar feadh na tréimhse atá is gá i gcomhréir leis na rialacha cosanta sonraí is infheidhme agus i gcás ar bith ní choinneofar iad ar feadh tréimhse is faide ná 5 bliana.