Airteagal 5 Pleananna réamhghabhálacha téarnaimh

1.   Áiritheoidh na Ballstáit go ndéanfaidh gnóthais árachais agus athárachais nach cuid de ghrúpa iad atá faoi réir pleanáil réamhghabhálach téarnaimh de bhun Airteagal 7 agus a chomhlíonann na critéir a leagtar síos i mír 2 nó 3 den Airteagal seo, plean réamhghabhálach téarnaimh a tharraingt suas agus a choimeád cothrom le dáta. Beidh bearta sa phlean réamhghabhálach téarnaimh sin a bheidh le glacadh ag an ngnóthas lena mbaineann chun a staid airgeadais a athbhunú i gcás ina bhfuil meath suntasach tagtha ar an staid sin.

Measfar gur cuid den chóras rialachais de réir bhrí Airteagal 41 de Threoir 2009/138/CE é pleananna réamhghabhálacha téarnaimh a tharraingt suas, a choimeád cothrom le dáta agus a chur i bhfeidhm.

2.   Áiritheoidh na Ballstáit go gcuirfidh an t-údarás maoirseachta ceanglais pleanála réamhghabhálaí téarnaimh i bhfeidhm ar ghnóthais árachais agus athárachais ar bhonn a méide, a samhla gnó, a bpróifíle riosca, a n-idirnascthachta agus a n-inionadaitheachta, a dtábhachta do gheilleagar na mBallstát ina n-oibríonn siad, agus a ngníomhaíochtaí trasteorann, go háirithe gníomhaíochtaí suntasacha trasteorann.

Áiritheoidh údaráis mhaoirseachta go mbeidh ar a laghad 60 % de mhargadh árachais agus athárachais saoil an Bhallstáit agus ar a laghad 60 % de mhargadh árachais agus athárachais an Bhallstáit nach árachas saoil é - an sciar den mhargadh árachais saoil bunaithe ar ollfhorálacha teicniúla agus an sciar den mhargadh árachais nach árachas saoil é bunaithe ar ollphréimheanna i scríbhinn - faoi réir ceanglais pleanála réamhghabhálaí téarnaimh de bhun an Airteagail seo.

Agus leibhéal cumhdaigh an mhargaidh dá dtagraítear sa dara fomhír á ríomh, féadfar gnóthais fochuideachta árachais nó athárachais de chuid grúpa a chur san áireamh i gcás ina bhfuil na gnóthais fochuideachta árachais nó athárachais sin ina gcuid de ghrúpa a bhfuil plean réamhghabhálach grúpa téarnaimh á tharraingt suas agus á choinneáil ar bun ag an máthairghnóthas deiridh lena aghaidh.

3.   Aon ghnóthas árachais nó athárachais atá faoi réir plean réitigh, beidh sé faoi réir ceanglais pleanála réamhghabhálaí téarnaimh.

Ní bheidh gnóthais bheaga neamhchasta faoi réir ceanglais pleanála réamhghabhálaí téarnaimh, ach amháin i gcás ina measfaidh údarás maoirseachta go bhfuil riosca ar leith ag baint le gnóthas mar sin ar an leibhéal náisiúnta nó réigiúnach.

4.   Áiritheoidh na húdaráis mhaoirseachta go ndéanfaidh gnóthais árachais agus athárachais a bpleananna réamhghabhálacha téarnaimh a thabhairt cothrom le dáta gach 2 bhliain ar a laghad, agus in aon chás:

5.   Níor cheart glacadh leis sna pleananna réamhghabhálacha téarnaimh go mbeidh rochtain ar thacaíocht airgeadais phoiblí urghnách ná go bhfaighfear tacaíocht airgeadais phoiblí urghnách.

6.   Ceanglóidh na Ballstáit go mbeidh gach ceann de na nithe seo a leanas i bpleananna réamhghabhálacha téarnaimh:

7.   Ceanglóidh na Ballstáit go ndéanfaidh gnóthais árachais agus athárachais measúnú ar inchreidteacht agus indéantacht a bpleananna réamhghabhálacha téarnaimh, go háirithe an creat táscairí dá dtagraítear i mír 8 agus na bearta ceartaitheacha, in aghaidh raon cásanna de dhianstrus maicreacnamaíoch agus airgeadais atá ábhartha d’imthosca sonracha an ghnóthais árachais nó athárachais, lena n-áirítear imeachtaí ar fud an chórais, imeachtaí struis neamhghnácha ar dócha go ndéanfaidís difear ábharach don phróifíl sócmhainní agus dliteanas, agus teaglaim d’imeachtaí struis den sórt sin.

8.   Ceanglóidh na Ballstáit go mbeidh ar ghnóthais árachais agus athárachais a áirithiú go bhfuil creat de tháscairí cáilíochtúla agus cainníochtúla ina bpleananna réamhghabhálacha téarnaimh lena sainaithnítear na pointí nuair ba cheart bearta ceartaitheacha a bhreithniú nó a dhéanamh. Féadfar critéir a bhaineann le, inter alia, caipiteal, leachtacht, cáilíocht sócmhainní, brabúsacht, dálaí margaidh, dálaí maicreacnamaíocha agus imeachtaí oibríochtúla a áireamh sna táscairí sin. Áireofar sna táscairí a bhaineann le staid an chuntais caipitil, ar a laghad, aon sárú ar an gCeanglas maidir le Caipiteal Sócmhainneachta a leagtar síos i dTeideal I, Caibidil VI, Roinn 4, de Threoir 2009/138/CE.

Ceanglóidh na Ballstáit go mbeidh beart ceartaitheach iomchuí ag an ngnóthas lena mbaineann i gcomhréir leis an bplean réamhghabhálach téarnaimh mar thoradh ar aon sárú ar an gCeanglas um Chaipiteal Sócmhainneachta.

Ceanglóidh na Ballstáit go n-áiritheoidh na húdaráis mhaoirseachta go gcuirfidh gnóthais árachais agus athárachais socruithe iomchuí i bhfeidhm chun faireachán tráthrialta a dhéanamh ar na táscairí dá dtagraítear sa chéad fhomhír.

9.   Gnóthas árachais nó athárachais a chinneann beart ceartaitheach a áirítear ina phlean réamhghabhálach téarnaimh a dhéanamh, nó a chinneann gan an beart ceartaitheach sin a dhéanamh cé go bhfuil táscaire dá dtagraítear i mír 8, an chéad fhomhír, comhlíonta, tabharfaidh sé fógra don údarás maoirseachta faoin gcinneadh sin gan mhoill.

10.   Déanfaidh comhlacht riaracháin, bainistíochta nó maoirseachta de chuid gnóthais árachais nó athárachais dá dtagraítear i mír 1 an plean réamhghabhálach téarnaimh a mheasúnú agus a fhormheas sula gcuirfear faoi bhráid an údaráis maoirseachta é lena athbhreithniú.

11.   Déanfaidh EIOPA, faoin 29 Eanáir 2027, treoirlínte a eisiúint i gcomhréir le hAirteagal 16 de Rialachán (AE) Uimh. 1094/2010 lena sonraítear a thuilleadh an méid seo a leanas:

12.   Ullmhóidh EIOPA dréachtchaighdeáin theicniúla rialála lena sonrófar a thuilleadh:

Cuirfidh EIOPA na dréachtchaighdeáin theicniúla rialála sin faoi bhráid an Choimisiúin faoin 29 Iúil 2026.

Tarmligtear chuig an gCoimisiún an chumhacht chun an Treoir seo a fhorlíonadh trí na caighdeáin theicniúla rialála dá dtagraítear sa chéad fhomhír a ghlacadh i gcomhréir le hAirteagail 10 go 14 de Rialachán (AE) Uimh. 1094/2010.