Airteagal 6 Athbhreithniú agus measúnú arna dhéanamh ag na húdaráis mhaoirseachta ar phleananna réamhghabhálacha téarnaimh

1.   Laistigh de 9 mí ó chuirtear isteach gach plean réamhghabhálach téarnaimh, déanfaidh na húdaráis mhaoirseachta athbhreithniú ar an bplean sin agus déanfaidh siad measúnú ar a mhéid a chomhlíontar sa phlean na ceanglais a leagtar síos in Airteagal 5, agus na nithe seo a leanas ar fad:

2.   Déanfaidh na húdaráis mhaoirseachta na pleananna réamhghabhálacha téarnaimh ar fad a bheidh faighte acu a sholáthar do na húdaráis réitigh. Féadfaidh na húdaráis réitigh scrúdú a dhéanamh ar an bplean réamhghabhálach téarnaimh chun aon ghníomhaíocht sa phlean réamhghabhálach téarnaimh a shainaithint a d’fhéadfadh tionchar díobhálach a imirt ar inréiteacht na ngnóthas árachais nó athárachais lena mbaineann agus chun moltaí a dhéanamh don údarás maoirseachta maidir leis na hábhair sin, laistigh den tréimhse a leagtar amach i mír 1.

3.   I gcás ina gcuireann gnóthas árachais nó athárachais gníomhaíochtaí suntasacha trasteorann i gcrích, soláthróidh an t-údarás maoirseachta baile an plean réamhghabhálach téarnaimh don údarás maoirseachta óstach, arna iarraidh sin ag an údarás maoirseachta óstach sin. Féadfaidh an t-údarás maoirseachta óstach scrúdú a dhéanamh ar an bplean réamhghabhálach téarnaimh chun aon ghníomhaíocht sa phlean réamhghabhálach téarnaimh a shainaithint a d’fhéadfadh tionchar díobhálach a imirt ar shealbhóirí polasaí, ar an bhfíorgheilleagar nó ar chobhsaíocht airgeadais ina Bhallstát agus chun moltaí a dhéanamh don údarás maoirseachta baile maidir leis na hábhair sin. Tabharfaidh an t-údarás maoirseachta baile freagra réasúnaithe maidir lena chinneadh na moltaí a leanúint nó gan iad a leanúint. I gcás nach gcuireann an t-údarás maoirseachta baile moltaí an údaráis maoirseachta óstaigh san áireamh i gceart, féadfaidh an t-údarás maoirseachta óstach an t-ábhar a tharchur chuig EIOPA i gcomhréir le hAirteagal 31(2), pointe (c), de Rialachán (AE) Uimh. 1094/2010.

4.   Údaráis mhaoirseachta a thagann ar an gconclúid, tar éis dóibh measúnú a dhéanamh ar an bplean réamhghabhálach téarnaimh, go bhfuil easnaimh ábhartha sa phlean sin nó go bhfuil baic ábharacha ann ar a chur chun feidhme, tabharfaidh siad fógra don ghnóthas árachais nó athárachais lena mbaineann faoi ábhar a measúnaithe agus cuirfidh siad ceangal ar an ngnóthas lena mbaineann plean athbhreithnithe a chur isteach, laistigh de 2 mhí, lena léireofar cén dóigh a dtugtar aghaidh ar na heasnaimh nó ar na baic sin. Ar iarraidh ón ngnóthas lena mbaineann, féadfar síneadh aon mhí amháin a chur leis an tréimhse 2 mhí sin i gcás ina gcomhaontaíonn an t-údarás maoirseachta amhlaidh.

Sula gcuirfidh sé de cheangal ar ghnóthas árachais nó athárachais plean réamhghabhálach téarnaimh a chur isteach arís, tabharfaidh an t-údarás maoirseachta an deis don ghnóthas a thuairim a chur in iúl maidir leis an gceanglas sin.

An t-údarás maoirseachta a thugann faoi deara nár tugadh aghaidh ar na heasnaimh agus na baic go leordhóthanach sa phlean athbhreithnithe, féadfaidh sé a ordú don ghnóthas athruithe sonracha a dhéanamh ar an bplean.

5.   I gcás nach gcuireann an gnóthas árachais nó athárachais plean réamhghabhálach téarnaimh athbhreithnithe isteach, nó i gcás ina dtagann an t-údarás maoirseachta ar an gconclúid nach ndéantar na heasnaimh nó na baic a sainaithníodh ina mheasúnú bunaidh a réiteach go leordhóthanach sa phlean réamhghabhálach téarnaimh athbhreithnithe, agus i gcás nach féidir na heasnaimh nó na baic sin a réiteach go leordhóthanach le hordú chun athruithe sonracha a dhéanamh ar an bplean, ceanglóidh an t-údarás maoirseachta ar an ngnóthas athruithe a shainaithint laistigh de thréimhse réasúnach a d’fhéadfadh an gnóthas a dhéanamh ar a ghnó chun aghaidh a thabhairt ar na heasnaimh sa phlean réamhghabhálach téarnaimh nó ar na baic maidir le cur chun feidhme an phlean sin.

I gcás nach sainaithníonn an gnóthas árachais nó athárachais na hathruithe sin laistigh den tréimhse arna socrú ag an údarás maoirseachta, nó i gcás ina gcinneann an t-údarás maoirseachta nach dtabharfaí aghaidh ar na heasnaimh nó na baic go leordhóthanach leis na gníomhaíochtaí arna moladh ag an ngnóthas, féadfaidh an t-údarás maoirseachta cinneadh réasúnaithe a dhéanamh a ordú don ghnóthas aon bheart a dhéanamh a mheasann an t-údarás maoirseachta is gá agus is comhréireach, agus aird á tabhairt ar a thromchúisí atá na heasnaimh agus na baic mar aon le héifeacht na mbeart ar ghnó an ghnóthais.

Tabharfar fógra i scríbhinn don ghnóthas árachais nó athárachais faoin gcinneadh seo, ar cinneadh é a bheidh faoi réir ceart achomhairc.