Artikolu 6 Rieżami u valutazzjoni mill-awtoritajiet superviżorji tal-pjanijiet ta' rkupru preventiv

1.   Fi żmien disa' xhur mil-preżentazzjoni ta' kull pjan ta' rkupru preventiv, l-awtoritajiet superviżorji għandhom jirrieżaminaw dak il-pjan u jivvalutaw sa liema punt jissodisfa r-rekwiżiti stipulati fl-Artikolu 5 u dan kollu li ġej:

2.   L-awtoritajiet superviżorji għandhom jipprovdu lill-awtoritajiet ta' riżoluzzjoni bil-pjanijiet ta' rkupru preventiv kollha li jkunu rċevew. L-awtoritajiet ta' riżoluzzjoni jistgħu jeżaminaw il-pjan ta' rkupru preventiv sabiex jidentifikaw kwalunkwe azzjoni fil-pjan ta' rkupru preventiv li jista' jkollha impatt avvers fuq ir-riżolvibbiltà tal-impriżi tal-assigurazzjoni jew tar-riassigurazzjoni kkonċernati u jagħmlu rakkomandazzjonijiet lill-awtorità superviżorja fir-rigward ta' dawn il-kwistjonijiet fil-perjodu stabbilit fil-paragrafu 1.

3.   Meta impriża tal-assigurazzjoni jew tar-riassigurazzjoni twettaq attivitajiet transfruntiera sinifikanti, l-awtorità superviżorja ta' domiċilju għandha, fuq talba ta' awtorità superviżorja ospitanti, tipprovdi l-pjan ta' rkupru preventiv lil dik l-awtorità superviżorja ospitanti. L-awtorità superviżorja ospitanti tista' teżamina l-pjan ta' rkupru preventiv sabiex tidentifika kwalunkwe azzjoni fil-pjan ta' rkupru preventiv li jista' jkollha impatt negattiv fuq id-detenturi ta' poloz, fuq l-ekonomija reali jew fuq l-istabbiltà finanzjarja fl-Istat Membru tagħha u tagħmel rakkomandazzjonijiet lill-awtorità superviżorja ta' domiċilju fir-rigward ta' dawk il-kwistjonijiet. L-awtorità superviżorja ta' domiċilju għandha tipprovdi tweġiba motivata dwar id-deċiżjoni tagħha li ssegwi r-rakkomandazzjonijiet jew li ma ssegwihomx. Meta l-awtorità superviżorja ta' domiċilju tonqos milli tqis korrettament ir-rakkomandazzjonijiet tal-awtorità superviżorja ospitanti, l-awtorità superviżorja ospitanti tista' tirreferi l-kwistjoni lill-EIOPA f'konformità mal-Artikolu 31(2), il-punt (c), tar-Regolament (UE) Nru 1094/2010.

4.   L-awtoritajiet superviżorji li, wara li jkunu vvalutaw il-pjan ta' rkupru preventiv, jikkonkludu li hemm nuqqasijiet materjali f'dak il-pjan, jew impedimenti materjali għall-implimentazzjoni tiegħu għandhom jinnotifikaw lill-impriża tal-assigurazzjoni jew tar-riassigurazzjoni kkonċernata dwar il-kontenut tal-valutazzjoni tagħhom u jirrikjedu li l-impriża kkonċernata tippreżenta, fi żmien xahrejn, pjan rivedut li juri kif jiġu indirizzati dawk in-nuqqasijiet jew l-impedimenti. Dak il-perjodu ta' xahrejn jista' jiġi estiż b'xahar, fuq talba tal-impriża kkonċernata, meta l-awtorità superviżorja taqbel ma' dan.

Qabel ma impriża tal-assigurazzjoni jew tar-riassigurazzjoni tintalab tressaq mill-ġdid pjan ta' rkupru preventiv, l-awtorità superviżorja għandha tagħti lill-impriża l-opportunità li tiddikjara l-opinjoni tagħha dwar dak ir-rekwiżit.

Awtorità superviżorja li ssib li n-nuqqasijiet u l-impedimenti ma ġewx indirizzati b'mod adegwat fil-pjan rivedut tista' tagħti struzzjonijiet lill-impriża sabiex tagħmel bidliet speċifiċi fil-pjan.

5.   Meta l-impriża tal-assigurazzjoni jew tar-riassigurazzjoni tonqos milli tippreżenta pjan ta' rkupru preventiv rivedut, jew meta l-awtorità superviżorja tiddetermina li l-pjan ta' rkupru preventiv rivedut ma jirrimedjax b'mod adegwat in-nuqqasijiet jew l-impedimenti identifikati fil-valutazzjoni oriġinali tagħha, u ma jkunx possibbli li jiġu rrimedjati adegwatament in-nuqqasijiet jew l-impedimenti permezz ta' struzzjoni għal tibdil speċifiku fil-pjan, l-awtorità superviżorja għandha titlob lill-impriża tidentifika fi żmien raġonevoli l-bidliet li tista' tagħmel fin-negozju tagħha sabiex tindirizza n-nuqqasijiet fil-pjan ta' rkupru preventiv jew l-impedimenti għall-implimentazzjoni ta' dak il-pjan.

Meta l-impriża tal-assigurazzjoni jew tar-riassigurazzjoni tonqos milli tidentifika tali bidliet fiż-żmien stabbilit mill-awtorità superviżorja, jew meta l-awtorità superviżorja tikkonkludi li l-azzjonijiet proposti mill-impriża ma jkunux jindirizzaw adegwatament in-nuqqasijiet jew l-impedimenti, jista' jkun li l-awtorità superviżorja jkollha bżonn tieħu deċiżjoni motivata sabiex tagħti struzzjonijiet lill-impriża sabiex tieħu kwalunkwe miżura li l-awtorità superviżorja tikkunsidra bħala neċessarja u proporzjonata, b'kont meħud tas-serjetà tan-nuqqasijiet u tal-impedimenti u tal-effett tal-miżuri fuq in-negozju tal-impriża.

Din id-deċiżjoni għandha tiġi nnotifikata bil-miktub lill-impriża tal-assigurazzjoni jew tar-riassigurazzjoni u għandha tkun soġġetta għal dritt ta' appell.