IARSCRÍBHINN I AN RÉAMHEOLAIRE

IARSCRÍBHINN I

AN RÉAMHEOLAIRE

I.   Achoimre

II.   Cuspóir, daoine atá freagrach, faisnéis tríú páirtí, tuarascálacha ó shaineolaithe agus formheas an údaráis inniúil

Is é is cuspóir don roinn seo faisnéis a sholáthar faoi na daoine atá freagrach as inneachar an réamheolaire agus infheisteoirí a chur ar a gcompord maidir le cruinneas na faisnéise a nochtar sa réamheolaire. Ina theannta sin, soláthraítear faisnéis sa roinn seo maidir le leasanna na ndaoine a bhfuil baint acu leis an tairiscint, chomh maith le cúiseanna na tairisceana, úsáid na bhfáltas agus speansais na tairisceana. Thairis sin, soláthraítear faisnéis sa roinn seo maidir le bunús dlí an réamheolaire agus maidir lena fhormheas ag an údarás inniúil.

III.   Straitéis, feidhmíocht agus an timpeallacht ghnó

Is é is cuspóir don roinn seo faisnéis a nochtadh maidir le céannacht an eisitheora, a ghnó, a straitéis agus a chuspóirí. Ba cheart tuiscint shoiléir a bheith ag infheisteoirí ar ghníomhaíochtaí an eisitheora agus ar na príomhthreochtaí a dhéanann difear dá fheidhmíocht, dá struchtúr eagraíochtúil agus dá infheistíochtaí ábhartha. I gcás inarb infheidhme, nochtfaidh an t-eisitheoir sa roinn seo meastacháin nó réamhaisnéisí ar a fheidhmíocht amach anseo.

IV.   Tuarascáil bhainistíochta, lena n-áirítear an tuairisciú inbhuanaitheachta (urrúis chothromais amháin)

Is é is cuspóir don roinn seo an fhaisnéis a leagtar amach sna tuarascálacha bainistíochta agus sna tuarascálacha bainistíochta comhdhlúite dá dtagraítear in Airteagal 4 de Threoir 2004/109/CE, i gcás inarb infheidhme, agus i gCaibidlí 5 agus 6 de Threoir 2013/34/AEchorprú trí thagairt nó a áireamh le haghaidh na dtréimhsí a chumhdaítear leis an bhfaisnéis airgeadais stairiúil lena n-áirítear, i gcás inarb infheidhme, an tuairisciú inbhuanaitheachta.

V.   Ráiteas an chaipitil oibre (urrúis chothromais amháin)

Is é cuspóir don roinn seo faisnéis a sholáthar maidir le ceanglais caipitil oibre an eisitheora.

VI.   Tosca riosca

Is é is cuspóir don roinn seo tuairisc a thabhairt ar na príomhrioscaí nár mhór don eisitheoir aghaidh a thabhairt orthu agus ar an tionchar atá acu ar fheidhmíocht an eisitheora amach anseo, chomh maith leis na príomhrioscaí a bhaineann go sonrach leis na hurrúis a thairgtear don phobal nó atá le ligean isteach chun a dtrádála ar mhargadh rialáilte.

VII.   Téarmaí agus coinníollacha na n-urrús

Is é cuspóir don roinn seo téarmaí agus coinníollacha na n-urrús a leagan amach agus tuairisc mhionsonraithe a sholáthar ar a saintréithe.

I gcás inarb infheidhme, áireofar san fhaisnéis sin an fhaisnéis dá dtagraítear in Airteagal 5 de Threoir (AE) 2024/2810 ó Pharlaimint na hEorpa agus ón gComhairle ( 20 ).

VIII.   Sonraí a bhaineann leis an tairiscint agus le hurrúis a ligean isteach chun a dtrádála

Is é is cuspóir don roinn seo an fhaisnéis shonrach maidir le tairiscint na n-urrús, plean a ndáilte agus a leithroinnte, agus léiriú ar a bpraghsáil a leagan amach. Thairis sin, cuirtear faisnéis i láthair inti maidir le hurrúis a láithriú, aon chomhaontú frithgheallta agus aon socrú a bhaineann le hurrúis a ligean isteach chun a dtrádála. Leagtar amach inti freisin faisnéis faoi na daoine a dhíolann na hurrúis agus faoi chaolú maidir le sealúchais scairshealbhóirí atá ann cheana.

IX.   Faisnéis a bhaineann le ESG (urrúis neamhchothromais amháin, i gcás inarb infheidhme)

Is é is cuspóir don roinn seo, i gcás inarb infheidhme, faisnéis a bhaineann le ESG a leagan amach i gcomhréir leis an ngníomh tarmligthe dá dtagraítear in Airteagal 13(1), an dara fomhír, pointe (g).

X.   Rialachas corparáideach

Míneofar sa roinn seo riarachán an eisitheora agus ról na ndaoine a bhfuil baint acu le bainistiú na cuideachta. I gcás urrúis chothromais, soláthrófar inti faisnéis freisin faoi chúlra na bainistíochta sinsearaí, faoina luach saothair agus faoin nasc a d’fhéadfadh a bheith aige le feidhmíocht an eisitheora.

XI.   Faisnéis airgeadais

Is é is cuspóir don roinn seo na ráitis airgeadais agus na príomhtháscairí feidhmíochta a shonrú, ráitis is gá a chur san áireamh sa doiciméad lena gcumhdaítear an 2 bhliain airgeadais is déanaí (i gcás urrúis chothromais) nó an bhliain airgeadais deiridh (i gcás urrúis neamhchothromais) nó cibé tréimhse is giorra ar lena linn a bhí an t-eisitheoir ag feidhmiú. Na prionsabail chuntasaíochta agus iniúchóireachta a ghlacfar lena n-úsáid chun na ráitis airgeadais a ullmhú agus iniúchóireacht a dhéanamh orthu, cinnfear iad i gcomhréir le caighdeáin idirnáisiúnta cuntasaíochta agus iniúchóireachta.

XII.   Faisnéis faoin scairshealbhóir agus faoin sealbhóir urrús

Soláthrófar sa roinn seo faisnéis maidir le mór-scairshealbhóirí an eisitheora, maidir le coinbhleachtaí leasa a d’fhéadfadh a bheith ann idir an lucht bainistíochta sinsearaí agus an t-eisitheoir, scairchaipiteal an eisitheora chomh maith le faisnéis maidir le hidirbhearta páirtí ghaolmhair, imeachtaí dlíthiúla agus eadrána agus conarthaí ábhartha.

XIII.   Beartas díbhinní (urrúis chothromais amháin)

Tuairisc ar bheartas an eisitheora maidir le dáileacháin díbhinne agus aon srian reatha orthu, agus maidir le hathcheannaigh scaireanna.

XIV.   Faisnéis faoin ráthóir (urrúis neamhchothromais amháin, i gcás inarb infheidhme)

Is é is cuspóir don roinn seo faisnéis a sholáthar maidir le ráthóir na n-urrús, más infheidhme, lena n-áirítear faisnéis fhíor-riachtanach faoin ráthaíocht a ghabhann leis na hurrúis, faoi na tosca riosca agus faoin bhfaisnéis airgeadais a bhaineann go sonrach leis an ráthóir.

XV.   Faisnéis faoi na hurrúis fholuiteacha agus faoi eisitheoir na n-urrús foluiteach (i gcás inarb infheidhme)

Is é is cuspóir don roinn seo faisnéis a sholáthar, i gcás inarb infheidhme, faoi na hurrúis fholuiteacha agus, i gcás inarb infheidhme, faoi eisitheoir na n-urrús foluiteach.

XVI.   Faisnéis maidir le toiliú (i gcás inarb infheidhme)

Is é is cuspóir don roinn seo faisnéis a sholáthar maidir leis an toiliú i gcás ina dtoilíonn an t-eisitheoir nó an duine atá freagrach as réamheolaire a tharraingt suas lena úsáid i gcomhréir le hAirteagal 5(1).

XVII.   Na doiciméid atá ar fáil

Is é is cuspóir don roinn seo faisnéis a sholáthar maidir leis na doiciméid a bheidh ar fáil le cigireacht a dhéanamh orthu agus maidir leis an suíomh gréasáin inar féidir cigireacht a dhéanamh orthu.