ANNESS I IL-PROSPETT

ANNESS I

IL-PROSPETT

I.   Sommarju

II.   Għan, persuni responsabbli, informazzjoni minn partijiet terzi, rapporti tal-esperti u approvazzjoni tal-awtorità kompetenti

L-iskop ta’ din it-taqsima huwa li tiġi pprovduta informazzjoni dwar il-persuni li huma responsabbli għall-kontenut tal-prospett u li jiġi pprovdut serħan il-moħħ lill-investituri dwar l-akkuratezza tal-informazzjoni żvelata fil-prospett. Barra minn hekk, din it-taqsima tipprovdi informazzjoni dwar l-interessi tal-persuni involuti fl-offerta, kif ukoll ir-raġunijiet għall-offerta, l-użu tar-rikavati u l-ispejjeż tal-offerta. Barra minn hekk, din it-taqsima tipprovdi informazzjoni dwar il-bażi ġuridika tal-prospett u l-approvazzjoni tiegħu mill-awtorità kompetenti.

III.   Strateġija, prestazzjoni u ambjent tan-negozju

L-iskop ta’ din it-taqsima huwa li tiġi żvelata informazzjoni dwar l-identità tal-emittent, in-negozju, l-istrateġija u l-objettivi tiegħu. L-investituri għandu jkollhom fehim ċar tal-attivitajiet tal-emittent u tat-tendenzi prinċipali li jaffettwaw il-prestazzjoni, l-istruttura organizzazzjonali u l-investimenti materjali tiegħu. Meta applikabbli, l-emittent għandu jiżvela f’din it-taqsima stimi jew tbassir tal-prestazzjoni tiegħu fil-futur.

IV.   Rapport ta’ ġestjoni, inkluż ir-rapportar dwar is-sostenibbiltà (titoli ta’ ekwità biss)

L-iskop ta’ din it-taqsima huwa li jew tinkorpora b’referenza jew tinkludi l-informazzjoni stabbilita fir-rapporti ta’ ġestjoni u r-rapporti konsolidati dwar il-ġestjoni kif imsemmi fl-Artikolu 4 tad-Direttiva 2004/109/KE, meta applikabbli, u fil-Kapitoli 5 u 6 tad-Direttiva 2013/34/UE, għall-perjodi koperti mill-informazzjoni finanzjarja storika inkluż, meta applikabbli, ir-rapportar dwar is-sostenibbiltà.

V.   Dikjarazzjoni tal-kapital operatorju (titoli ta’ ekwità biss)

L-iskop ta’ din it-taqsima huwa li tipprovdi informazzjoni dwar ir-rekwiżiti tal-kapital operatorju tal-emittent.

VI.   Fatturi ta’ riskju

L-iskop ta’ din it-taqsima huwa li jiġu deskritti r-riskji ewlenin li jiffaċċa l-emittent u l-impatt tagħhom fuq il-prestazzjoni futura tal-emittent, kif ukoll ir-riskji ewlenin li huma speċifiċi għat-titoli offruti lill-pubbliku jew li għandhom jiġu ammessi għan-negozjar f’suq regolat.

VII.   Termini u kundizzjonijiet tat-titoli

L-iskop ta’ din it-taqsima huwa li tistabbilixxi t-termini u l-kundizzjonijiet tat-titoli u li tipprovdi deskrizzjoni dettaljata tal-karatteristiċi tagħhom.

Fejn applikabbli, din l-informazzjoni għandha tinkludi l-informazzjoni msemmija fl-Artikolu 5 tad-Direttiva (UE) 2024/2810 tal-Parlament Ewropew u tal-Kunsill ( 20 ).

VIII.   Dettalji tal-offerta/ammissjoni għan-negozjar

L-iskop ta’ din it-taqsima huwa li tistabbilixxi l-informazzjoni speċifika dwar l-offerta tat-titoli, il-pjan għad-distribuzzjoni u għall-allokazzjoni tagħhom, indikazzjoni tal-ipprezzar tagħhom. Barra minn hekk, tirrappreżenta informazzjoni dwar il-pjazzament tat-titoli, kwalunkwe ftehim ta’ sottoskrizzjoni u arranġamenti relatati mal-ammissjoni għan-negozjar. Tistabbilixxi wkoll informazzjoni dwar il-persuni li jbigħu t-titoli u dilwizzjoni għall-azzjonisti eżistenti.

IX.   Informazzjoni relatata mal-ESG (titoli mingħajr ekwità biss, meta applikabbli)

L-iskop ta’ din it-taqsima huwa li tistabbilixxi, meta applikabbli, informazzjoni relatata mal-ESG f’konformità mal-att delegat imsemmi fl-Artikolu 13(1), it-tieni subparagrafu, il-punt (g).

X.   Governanza korporattiva

Din it-taqsima għandha tispjega l-amministrazzjoni tal-emittent u r-rwol tal-persuni involuti fil-ġestjoni tal-kumpanija. Għat-titoli ta’ ekwità, barra minn hekk ser tipprovdi informazzjoni dwar l-isfond tal-maniġment superjuri, ir-remunerazzjoni tiegħu u r-rabta potenzjali tiegħu mal-prestazzjoni tal-emittent.

XI.   Informazzjoni finanzjarja

L-iskop ta’ din it-taqsima huwa li jiġi speċifikat liema rapporti finanzjarji jridu jiġu inklużi fid-dokument li jkopri l-aħħar sentejn finanzjarji (għal titoli ta’ ekwità) jew l-aħħar sena finanzjarja (għal titoli mingħajr ekwità) jew tali perjodu iqsar li matulu kien qed jopera fih l-emittent u informazzjoni oħra ta’ natura finanzjarja. Il-prinċipji kontabilistiċi u tal-awditjar li jridu jiġu aċċettati sabiex jintużaw fit-tħejjija u fl-awditjar tar-rapporti finanzjarji jiġu stabbiliti f’konformità mal-istandards internazzjonali tal-kontabilità u tal-awditjar.

XII.   Informazzjoni dwar l-azzjonisti u d-detenturi tat-titoli

Din it-taqsima għandha tipprovdi informazzjoni dwar l-azzjonisti maġġuri tal-emittent, l-eżistenza ta’ kunflitti ta’ interess potenzjali bejn il-maniġment superjuri u l-emittent, il-kapital azzjonarju tal-emittent kif ukoll informazzjoni dwar tranżazzjonijiet ta’ partijiet relatati, proċedimenti ġudizzjarji u ta’ arbitraġġ u kuntratti materjali.

XIII.   Politika tad-dividendi (titoli ta’ ekwità biss)

Deskrizzjoni tal-politika tal-emittent dwar id-distribuzzjonijiet tad-dividendi u kwalunkwe restrizzjoni attwali fuqhom, kif ukoll dwar ir-riakkwisti ta’ ishma.

XIV.   Informazzjoni dwar il-garanti (titoli mingħajr ekwità biss, meta applikabbli)

L-iskop ta’ din it-taqsima huwa li, meta applikabbli, tiġi pprovduta informazzjoni dwar il-garanti tat-titoli, inkluż informazzjoni essenzjali dwar il-garanti marbuta mat-titoli, il-fatturi ta’ riskju u informazzjoni finanzjarja speċifika għall-garanti.

XV.   Informazzjoni dwar it-titoli sottostanti u l-emittent tat-titoli sottostanti (meta applikabbli)

L-iskop ta’ din it-taqsima huwa li tiġi pprovduta, meta applikabbli, informazzjoni dwar it-titoli sottostanti u, meta applikabbli, dwar l-emittent tat-titoli sottostanti.

XVI.   Informazzjoni dwar il-kunsens (meta applikabbli)

L-iskop ta’ din it-taqsima huwa li tiġi pprovduta informazzjoni dwar il-kunsens meta l-emittent jew il-persuna responsabbli għat-tfassil ta’ prospett tagħti l-kunsens għall-użu tiegħu f’konformità mal-Artikolu 5(1).

XVII.   Dokumenti disponibbli

L-iskop ta’ din it-taqsima huwa li tiġi pprovduta informazzjoni dwar id-dokumenti li għandhom jitqiegħdu għad-dispożizzjoni għall-ispezzjoni u s-sit web fejn jistgħu jiġu spezzjonati.