Airteagal 6 Cláir ilbhliantúla tháscacha

1.   Cuirfear an comhar faoin Rialachán seo chun feidhme ar bhonn cláir ilbhliantúla tháscacha.

2.   Beidh sé d’aidhm ag na cláir ilbhliantúla tháscacha creat comhleanúnach a chur ar fáil le haghaidh comhar idir an Comhphobal agus na tríú tíortha nó na réigiúin lena mbaineann, ar creat é a bheidh comhsheasmhach le críoch agus raon feidhme foriomlán, cuspóirí, prionsabail agus beartas an Chomhphobail agus a bheidh bunaithe ar an gcreat beartais dá dtagraítear in Airteagal 5.

3.   Maidir leis na cláir ilbhliantúla tháscacha, is éard atá iontu bunús ginearálta don chomhar faoin Rialachán seo agus leagfar amach iontu spriocanna an Chomhphobail, agus aird á tabhairt ar riachtanais na dtíortha lena mbaineann, tosaíochtaí an Chomhphobail, an staid idirnáisiúnta agus gníomhaíochtaí na dtríú tíortha lena mbaineann. Léireofar freisin sna cláir ilbhliantúla tháscacha breisluach an chomhair agus an chaoi chun dúbláil a sheachaint le cláir agus tionscnaimh eile, go háirithe iad siúd de chuid eagraíochtaí idirnáisiúnta a bhfuil cuspóirí comhchosúla acu agus iad siúd de chuid deontóirí móra.

4.   Leagfar amach sna cláir ilbhliantúla tháscacha na réimsí tosaíochta arna roghnú lena maoiniú, na cuspóirí sonracha, na torthaí a bhfuiltear ag súil leo, na táscairí feidhmíochta atá bunaithe ar thorthaí agus na leithdháiltí táscacha airgeadais, go foriomlán agus in aghaidh an chuspóra araon.

5.   Beidh na cláir ilbhliantúla tháscacha bunaithe ar idirphlé leis na tíortha comhpháirtíochta nó na réigiúin chomhpháirtíochta ina mbeidh geallsealbhóirí ábhartha, go háirithe údaráis rialtais agus rialála agus na heagraíochtaí arna n-ainmniú acu, ionas go n-áiritheofar go nglacfaidh an tír nó an réigiún lena mbaineann úinéireacht leordhóthanach ar an bpróiseas, agus go spreagfar tacaíocht d’fhorbairt bhreise ar shábháilteacht núicléach ar an leibhéal náisiúnta.

6.   I gcás inarb ábhartha, tar éis dul i gcomhairle leis an nGrúpa Eorpach Rialaitheoirí um Shábháilteacht Núicléach (“ENSREG”), glacfaidh an Coimisiún na cláir ilbhliantúla tháscacha i gcomhréir leis an nós imeachta scrúdúcháin dá dtagraítear in Airteagal 15(2).

7.   I gcomhréir leis an nós imeachta scrúdúcháin dá dtagraítear in Airteagal 15(2), déanfaidh an Coimisiún na cláir ilbhliantúla tháscacha a athbhreithniú, agus a nuashonrú más gá, 4 bliana, ar a laghad, tar éis a nglactha.