CAIBIDIL V AERSPÁS, IDIR-INOIBRITHEACHT AGUS NUÁLAÍOCHT THEICNEOLAÍOCH

Airteagal 43

Gan dochar d’fhaisnéis aerloingseoireachta arna foilsiú ag na Ballstáit agus ar shlí atá comhsheasmhach leis an bhfoilsiú sin, bunóidh an Bainisteoir Gréasáin, ar chur i bhfeidhm an chinnidh cur chun feidhme dá dtagraítear in Airteagal 38(3) den Rialachán seo, bonneagar faisnéise aerloingseoireachta uile-Aontais chun cur le hinfhaighteacht faisnéise leictreonaí aerloingseoireachta ar ardchaighdeán, a chuirfear i láthair ar bhealach a mbeidh sé éasca rochtain a fháil uirthi agus a fhónfaidh do riachtanais na n-úsáideoirí ábhartha uile ó thaobh cháilíocht agus thráthúlacht na sonraí de. An fhaisnéis aerloingseoireachta arna cur ar fáil mar sin, ní bheidh inti ach an fhaisnéis a chomhlíonann na ceanglais fhíor-riachtanacha a leagtar amach i bpointe 2.1 d’Iarscríbhinn VIII de Rialachán (AE) 2018/1139.

Airteagal 44

Glacfaidh an Coimisiún, i gcomhréir leis an nós imeachta scrúdúcháin dá dtagraítear in Airteagal 48(3), forálacha iomchuí chun cur chun feidhme aonfhoirmeach aicmiú an aerspáis de chuid ICAO a áirithiú le hoiriúnú iomchuí, d’fhonn a áirithiú go gcuirfear seirbhísí aerthráchta sábháilte agus éifeachtúla ar fáil ar bhealach rianúil laistigh den Aerspás Eorpach Aonair.

Airteagal 46

Áiritheoidh na heintitis atá i gceannas ar na cúraimí arna mbunú le dlí an Aontais i réimsí chomhordú chéim shainithe SESAR, chéim forbartha SESAR agus chéim imscartha SESAR, de réir mar a bheidh, comhordú éifeachtach idir na trí chéim sin ionas go mbainfear amach aistriú rianúil tráthúil eatarthu, ag díriú dóibh go háirithe ar chéim an tionsclaithe.

Beidh na geallsealbhóirí sibhialta agus míleata ábhartha uile rannpháirteach a mhéid is féidir.