Airteagal 11 Oibriú scéimeanna deimhniúcháin

1.   Chun comhlíonadh an Rialacháin seo a léiriú, glacfaidh oibreoir nó grúpa oibreoirí páirt i scéim deimhniúcháin atá aitheanta ag an gCoimisiún de bhun Airteagal 13.

2.   Oibreoidh scéimeanna deimhniúcháin ar bhealach neamhspleách ar bhonn rialacha agus nósanna imeachta iontaofa agus trédhearcacha, go háirithe maidir le bainistíocht agus faireachán inmheánach, gearáin agus achomhairc a láimhseáil, comhairliúchán le geallsealbhóirí, trédhearcacht agus foilsiú faisnéise, ceapadh agus oiliúint comhlachtaí deimhniúcháin, aghaidh a thabhairt ar shaincheisteanna neamh-chomhréireachta, agus forbairt agus bainistiú na gclárlann deimhniúcháin.

Socróidh na scéimeanna deimhniúcháin táillí trédhearcacha agus cuirfidh siad faisnéis faoi na táillí sin ar fáil go héasca d’oibreoirí, lena n-áirítear trína bhfoilsiú ar a suíomhanna gréasáin.

Cuirfidh scéimeanna deimhniúcháin nósanna imeachta gearáin agus achomhairc a mbeidh rochtain éasca orthu i bhfeidhm. Cuirfear faisnéis faoi na nósanna imeachta sin ar fáil go poiblí sa chlárlann deimhniúcháin agus i gclárlann an Aontais ach í a bheith bunaithe.

3.   Fíoróidh scéimeanna deimhniúcháin an raibh an fhaisnéis agus na sonraí a thíolaic oibreoir nó grúpa oibreoirí le haghaidh deimhniú comhlíontachta de bhun Airteagal 9 faoi réir iniúchóireacht neamhspleách agus an ndearnadh an deimhniú comhlíontachta, lena n-áirithítear na tuarascálacha iniúchta athdheimhniúcháin, ar bhealach cruinn, iontaofa agus costéifeachtach.

4.   Foilseoidh scéimeanna deimhniúcháin, go bliantúil ar a laghad, ina gclárlanna deimhniúcháin nó i gclárlann an Aontais ach í a bheith bunaithe liosta de na comhlachtaí deimhniúcháin atá ceaptha, agus sonrófar le haghaidh gach comhlachta deimhniúcháin cén t-údarás inniúil náisiúnta a rinne creidiúnú air nó cén t-údarás inniúil náisiúnta a d’aithin é agus cén t-údarás inniúil náisiúnta atá ag déanamh faireacháin air.

5.   Glacfaidh an Coimisiún gníomhartha cur chun feidhme lena leagtar amach an struchtúr, an fhormáid, na mionsonraí teicniúla agus an próiseas atá ag teastáil chun críocha mhíreanna 2, 3 agus 4 den Airteagal seo a bhfuil feidhm le bheith acu maidir leis na scéimeanna deimhniúcháin uile atá aitheanta ag an gCoimisiún. Déanfar na gníomhartha cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 17.