Airteagal 3 Ceart daoine nádúrtha rochtain a fháil ar a sonraí leictreonacha pearsanta sláinte agus forálacha gaolmhara

1.   Beidh sé de cheart ag daoine nádúrtha rochtain a fháil ar a laghad, ar a sonraí leictreonacha pearsanta sláinte, sonraí a bhaineann leo agus atá sna catagóirí tosaíochta dá dtagraítear in Airteagal 14 agus arna bpróiseáil chun cúram sláinte a sholáthar trí na seirbhísí rochtana sonraí leictreonacha sláinte dá dtagraítear in Airteagal 4. Cuirfear an rochtain ar fáil díreach tar éis na sonraí leictreonacha pearsanta sláinte a chlárú i gcóras RTS, agus ag an am céanna an gá atá le praiticiúlacht na teicneolaíochta á hurramú, agus cuirfear ar fáil í saor in aisce agus i bhformáid atá soléite, comhdhlúite agus inrochtana.

2.   Beidh sé de cheart ag daoine nádúrtha, nó ag a n-ionadaithe dá dtagraítear in Airteagal 4(2), cóip leictreonach a íoslódáil saor in aisce dá sonraí leictreonacha pearsanta sláinte ar a laghad sna catagóirí tosaíochta dá dtagraítear in Airteagal 14 a bhaineann leis na daoine nádúrtha sin, trí na seirbhísí rochtana sonraí leictreonacha sláinte dá dtagraítear in Airteagal 4, i bhformáid malartaithe Eorpach na ríomhthaifead sláinte dá dtagraítear in Airteagal 15.

3.   I gcomhréir le hAirteagal 23 de Rialachán (AE) 2016/679, féadfaidh na Ballstáit raon feidhme na gceart dá bhforáiltear i míreanna 1 agus 2 den Airteagal seo a shrianadh, go háirithe nuair atá gá leis na srianta sin chun daoine nádúrtha a chosaint ar bhonn sábháilteacht othar agus breithnithe eitice trí rochtain ar a sonraí leictreonacha pearsanta sláinte a mhoilliú ar feadh tréimhse theoranta go dtí gur féidir le gairmí sláinte faisnéis a bhféadfann tionchar suntasach a bheith aici ar a sláinte a chur in iúl agus a mhíniú go cuí do na daoine nádúrtha lena mbaineann.