Artikolu 3 Dritt tal-persuni fiżiċi li jaċċessaw id-data elettronika personali tagħhom dwar is-saħħa

1.   Il-persuni fiżiċi għandu jkollhom id-dritt li jaċċessaw minn tal-inqas data elettronika personali dwar is-saħħa li tirrelata magħhom li tappartjeni għall-kategoriji ta’ prijorità msemmija fl-Artikolu 14 u huma pproċessati għall-forniment tal-kura tas-saħħa permezz tas-servizzi ta’ aċċess għad-data elettronika dwar is-saħħa msemmija fl-Artikolu 4. L-aċċess għandu jiġi pprovdut immedjatament wara li d-data elettronika personali dwar is-saħħa tkun ġiet irreġistrata f’sistema ta’ EHR, filwaqt li jiġi rrispettat il-bżonn għall-prattikabbiltà teknoloġika, u għandhu jingħata mingħajr ħlas u b’mod li jinqara faċilment, huwa konsolidat u f’format aċċessibbli.

2.   Il-persuni fiżiċi, jew ir-rappreżentanti tagħhom imsemmija fl-Artikolu 4(2), għandu jkollhom id-dritt li jniżżlu mingħajr ħlas, kopja elettronika ta’ mill-inqas id-data elettronika personali dwar is-saħħa fil-kategoriji ta’ prijorità msemmija fl-Artikolu 14 relatata ma dawk il-persuni fiżiċi, permezz tas-servizzi għall-aċċess tad-data elettronika dwar is-saħħa msemmija fl-Artikolu 4, fil-format Ewropew għall-iskambju tar-rekords elettroniċi tas-saħħa msemmi fl-Artikolu 15.

3.   F’konformità mal-Artikolu 23 tar-Regolament (UE) 2016/679, l-Istati Membri jistgħu jirrestrinġu l-kamp ta’ applikazzjoni tad-drittijiet previsti fil-paragrafi 1 u 2 ta’ dan l-Artikolu, b’mod partikolari kull meta dawk ir-restrizzjonijiet ikunu meħtieġa biex jiġu protetti persuni fiżiċi abbażi tas-sikurezza u kunsiderazzjonijiet etiċi tal-pazjent billi jdewmu l-aċċess għad-data elettronika personali tagħhom dwar is-saħħa għal perjodu ta’ żmien limitat sakemm professjonist tas-saħħa jkun jista’ jikkomunika u jispjega lill-persuni fiżiċi l-informazzjoni kkonċernata li jista’ jkollha impatt sinifikanti fuq is-saħħa tagħhom.