Airteagal 7 Ceart daoine nádúrtha chun iniomparthachta sonraí

1.   Beidh sé de cheart ag daoine nádúrtha rochtain a thabhairt do sholáthraí cúraim sláinte, nó iarraidh ar sholáthraí cúraim sláinte a sonraí leictreonacha pearsanta sláinte uile nó cuid díobh a tharchur chuig soláthraí cúraim sláinte eile dá rogha féin láithreach, saor in aisce agus gan bac ón soláthraí cúraim sláinte nó ó mhonaróirí na gcóras a úsáideann an soláthraí cúraim sláinte sin.

2.   Beidh sé de cheart ag daoine nádúrtha, i gcás ina bhfuil na soláthraithe cúraim sláinte lonnaithe i mBallstáit éagsúla, tarchur na sonraí leictreonacha pearsanta sláinte a iarraidh i bhformáid malartaithe Eorpach na ríomhthaifead sláinte dá dtagraítear in Airteagal 15 tríd an mbonneagar trasteorann dá dtagraítear in Airteagal 23. Glacfaidh an soláthraí cúraim sláinte is faighteoir leis na sonraí sin agus beidh sé in ann iad a léamh.

3.   Beidh sé de cheart ag daoine nádúrtha a iarraidh ar sholáthraí cúraim sláinte cuid dá sonraí leictreonacha pearsanta sláinte a tharchur chuig faighteoir atá sainaitheanta go soiléir in earnáil na slándála sóisialta nó na seirbhísí aisíocaíochta. Déanfar tarchur den sórt sin láithreach, saor in aisce agus gan bac ón soláthraí cúraim sláinte nó ó mhonaróirí na gcóras a úsáideann an soláthraí cúraim sláinte sin agus ní bheidh ach aon treo amháin i gceist le tarchur den sórt sin.

4.   I gcás ina mbeidh cóip leictreonach dá gcatagóirí tosaíochta de shonraí leictreonacha pearsanta sláinte íoslódáilte ag daoine nádúrtha i gcomhréir le hAirteagal 3(2), beidh siad in ann na sonraí sin a tharchur chuig soláthraithe cúraim sláinte dá rogha féin i bhformáid malartaithe Eorpach na ríomhthaifead sláinte dá dtagraítear in Airteagal 15. Glacfaidh an soláthraí cúraim sláinte is faighteoir leis na sonraí sin agus beidh sé in ann iad a léamh, de réir mar is infheidhme.