Artikolu 7 Dritt għall-portabbiltà tad-data għall-persuni fiżiċi

1.   Il-persuni fiżiċi għandu jkollhom id-dritt li jagħtu aċċess, jew li jitolbu lil fornitur tal-kura tas-saħħa jittrażmetti, id-data elettronika personali tas-saħħa kollha tagħhom jew parti minnha lil fornitur ieħor tal-kura tas-saħħa tal-għażla tagħhom immedjatament, mingħajr ħlas u mingħajr xkiel mill-fornitur tal-kura tas-saħħa jew mill-manifatturi tas-sistemi użati minn dak il-fornitur tal-kura tas-saħħa.

2.   Il-persuni fiżiċi għandu jkollhom id-dritt, meta l-fornituri tal-kura tas-saħħa jkunu jinsabu fi Stati Membri differenti, li jitolbu t-trażmissjoni tad--data elettronika personali dwar is-saħħa tagħhom fil-format Ewropew għall-iskambju tar-rekords elettroniċi tas-saħħa msemmi fl-Artikolu 15 permezz tal-infrastruttura transkonfinali imsemmi fl-Artikolu 23. Il-fornitur tal-kura tas-saħħa riċeventi għandu jaċċetta tali data u għandu jkun jista’ jaqraha.

3.   Il-persuni fiżiċi għandu jkollhom id-dritt li jitolbu fornitur tal-kura tas-saħħa biex jittrażmetti parti mid-data elettronika personali tas-saħħa tagħhom lil riċevitur identifikat b’mod ċar fis-settur tas-servizzi tas-sigurtà soċjali jew tar-rimborż. Tali tra’missjoni għandha tiġi mwettqa immedjatament, mingħajr ħlas u mingħajr xkiel mill-fornitur tal-kura tas-saħħa jew mill-manifatturi tas-sistemi użati minn dak il-fornitur tal-kura tas-saħħa, u għandha tkun f’direzzjoni waħda biss.

4.   Meta l-persuni fiżiċi jkunu niżżlu kopja elettronika tal-kategoriji ta’ prijorità tagħhom ta’ data elettronika personali dwar is-saħħa f’konformità mal-Artikolu 3(2), huma għandhom ikunu jistgħu jittrażmettu dik id-data lill-fornituri tal-kura tas-saħħa tal-għażla tagħhom fil-format Ewropew għall-iskambju tar-rekords elettroniċi tas-saħħa msemmi fl-Artikolu 15. Il-fornitur tal-kura tas-saħħa riċeventi għandu jaċċetta tali data u għandu jkun jista’ jaqraha, kif applikabbli.