Airteagal 13 Clárú sonraí leictreonacha pearsanta sláinte

1.   I gcás ina ndéantar sonraí leictreonacha sláinte a phróiseáil chun cúram sláinte a sholáthar, áiritheoidh na Ballstáit go ndéanfaidh soláthraithe cúraim sláinte na sonraí leictreonacha pearsanta sláinte ábhartha a thagann go hiomlán nó go páirteach faoi, ar a laghad, na catagóirí tosaíochta de shonraí leictreonacha pearsanta sláinte dá dtagraítear in Airteagal 14 san fhormáid leictreonach i gcóras RTS.

2.   Agus sonraí á bpróiseáil acu i bhformáid leictreonach, áiritheoidh soláthraithe cúraim sláinte go dtabharfar sonraí leictreonacha pearsanta sláinte na ndaoine nádúrtha atá faoina gcoireáil cothrom le dáta le faisnéis a bhaineann leis an gcúram sláinte.

3.   I gcás ina bhfuil sonraí leictreonacha pearsanta sláinte cláraithe i mBallstát ina ndéantar an chóireáil atá éagsúil leis an mBallstát cleamhnachta an duine nádúrtha lena mbaineann, áiritheoidh an Ballstát ina ndéantar an chóireáil go ndéanfar an clárú faoi shonraí sainaitheantais an duine nádúrtha sin sa Bhallstát cleamhnachta.

4.   Faoin 26 Márta 2027, déanfaidh an Coimisiún, trí bhíthin gníomhartha cur chun feidhme, ceanglais maidir le cáilíocht sonraí a chinneadh, lena n-áirítear maidir le séimeantaic, aonfhoirmeacht, comhsheasmhacht, cruinneas agus iomláine, chun sonraí leictreonacha pearsanta sláinte a chlárú i gcóras RTS de réir mar is ábhartha. Déanfar na gníomhartha cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 98(2).

Nuair a chláraítear nó a nuashonraítear sonraí leictreonacha pearsanta sláinte, sainaithneofar leis na ríomhthaifid sláinte an gairmí sláinte agus an soláthraí cúraim sláinte a rinne clárú den sórt sin nó an nuashonrú, agus an t-am a rinneadh clárú nó nuashonrú den sórt sin. Féadfaidh na Ballstáit a cheangal go ndéanfar gnéithe eile de chlárú sonraí a thaifeadadh.