Artikolu 13 Reġistrazzjoni ta’ data elettronika personali dwar is-saħħa

1.   L-Istati Membri għandhom jiżguraw li, meta d-data elettronika dwar is-saħħa tiġi pproċessata għall-forniment tal-kura tas-saħħa, il-fornituri tal-kura tas-saħħa jirreġistraw id-data elettronika personali rilevanti dwar is-saħħa li taqa’ kompletament jew parzjalment taħt mill-inqas il-kategoriji ta’ prijorità tad-data elettronika personali dwar is-saħħa msemmija fl-Artikolu 14 f’format elettroniku f’sistema ta’ EHR.

2.   Meta jipproċessaw id-data f’format elettroniku, il-fornituri tal-kura tas-saħħa għandhom jiżguraw li d-data elettronika personali dwar is-saħħa tal-persuni fiżiċi li jkunu taħt il-kura tagħhom tiġi aġġornata b’informazzjoni relatata mal-kura tas-saħħa.

3.   Meta data elettronika personali dwar is-saħħa tkun irreġistrata fi Stat Membru ta’ trattament li jkun differenti mil-Istat Membru ta’ affiljazzjoni tal-persuna fiżika kkonċernata, l-Istat Membru ta’ trattament għandu jiżgura li r-reġistrazzjoni ssir taħt id-data ta’ identifikazzjoni tal-persuna fiżika fl-Istat Membru ta’ affiljazzjoni.

4.   Sas-26 ta’ Marzu 2027, il-Kummissjoni għandha, permezz ta’ atti ta’ implimentazzjoni, tiddetermina r-rekwiżiti tal-kwalità tad-data, inklużi b’rabta mas-semantika, l-uniformità, il-konsistenza, il-preċiżjoni u l-kompletezza, għar-reġistrazzjoni ta’ data elettronika personali dwar is-saħħa f’sistema ta’ EHR kif rilevanti. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 98(2).

Meta d-data elettronika personali dwar is-saħħa tiġi rreġistrata jew aġġornata, ir-rekords elettroniċi tas-saħħa għandhom jidentifikaw il-professjonist tas-saħħa, u l-fornitur tal-kura tas-saħħa li jkun wettaq tali reġistrazzjoni jew aġġornament, u l-ħin li fiħ twettqet tali reġistrazzjoni jew aġġornament. L-Istati Membri jistgħu jiirikjedu li jiġu rreġistrati aspetti oħra tar-reġistrazzjoni tad-data.