Airteagal 11 Oibleagáidí dáileoirí

1.   Agus glantach nó dromchlaghníomhaí á chur ar fáil ar an margadh acu, gníomhóidh dáileoirí le cúram cuí i ndáil le ceanglais an Rialacháin seo.

2.   Sula gcuirfidh dáileoirí glantach nó dromchlaghníomhaí ar fáil ar an margadh, fíoróidh siad an méid seo a leanas:

3.   Dáileoirí a chuireann glantaigh nó dromchlaghníomhaithe úsáideora deiridh ar fáil ar an margadh i mBallstát eile a bhfuil bileog sonraí comhábhar le soláthar ina leith i gcomhréir le hAirteagal 8(6), cuirfidh siad an bhileog sonraí comhábhar faoi bhráid an chomhlachta ceaptha sa Bhallstát sin sula gcuirfidh siad an táirge ar fáil inti, agus nuashonróidh siad an bhileog sonraí comhábhar i gcás inar gá, mura féidir leo a léiriú go bhfuair an comhlacht ceaptha an fhaisnéis chéanna ó oibreoir eacnamaíoch eile cheana féin. Coinneoidh na dáileoirí an fhaisnéis atá ar an mbileog sonraí comhábhar faoi rún.

4.   I gcás ina measann dáileoirí, nó ina bhfuil cúis acu a chreidiúint, nach gcomhlíonann glantach nó dromchlaghníomhaí an Rialachán seo, ní chuirfidh siad ar fáil ar an margadh é nó go dtabharfar i gcomhréir é. Thairis sin, i gcás ina bhfuil riosca do shláinte an duine nó don chomhshaol ag baint leis an nglantach nó leis an dromchlaghníomhaí, cuirfidh dáileoirí na húdaráis faireachais margaidh, an monaróir agus, i gcás inarb ábhartha, an t-ionadaí údaraithe nó an t-allmhaireoir ar an eolas faoi sin.

5.   Áiritheoidh dáileoirí, fad a bheidh glantach nó dromchlaghníomhaí faoina bhfreagracht, nach ndéanfaidh dálaí stórála ná iompair comhlíonadh an Rialacháin seo a chur i mbaol.

6.   I gcás ina measann dáileoirí nó ina bhfuil cúis acu a chreidiúint nach gcomhlíonann glantach nó dromchlaghníomhaí atá curtha ar fáil ar an margadh acu an Rialachán seo, cuirfidh siad an monaróir nó an t-allmhaireoir, de réir mar is infheidhme, agus na húdaráis inniúla náisiúnta ar an eolas láithreach agus comhoibreoidh siad leo agus áiritheoidh siad go ndéanfar an beart ceartaitheach is gá chun an glantach nó an dromchlaghníomhaí a thabhairt i gcomhréir, chun é a tharraingt siar nó chun é a aisghairm, de réir mar is iomchuí. Thairis sin, i gcás ina measann dáileoirí, nó ina bhfuil cúis acu a chreidiúint, go bhfuil riosca do shláinte an duine nó don chomhshaol ag baint le glantach nó le dromchlaghníomhaí a chuir siad ar fáil ar an margadh, cuirfidh siad údaráis náisiúnta inniúla na mBallstát inar chuir siad ar fáil ar an margadh é ar an eolas láithreach ina thaobh sin, agus tabharfaidh siad mionsonraí, go háirithe, faoi aon neamhchomhlíonadh agus faoi aon bheart ceartaitheach a rinneadh.

7.   Mar thoradh ar iarraidh réasúnaithe ó údarás náisiúnta inniúil, déanfaidh dáileoirí an fhaisnéis agus an doiciméadacht ar fad is gá chun léiriú a thabhairt ar chomhlíonadh an ghlantaigh nó an dromchlaghníomhaí leis an Rialachán seo a chur ar fáil don údarás sin, i bhfoirm leictreonach agus, arna iarraidh sin, i bhfoirm páipéir. Oibreoidh dáileoirí i gcomhar leis an údarás sin, arna iarraidh sin dó, maidir le haon ghníomhaíocht a dhéanfar chun deireadh a chur leis na rioscaí a bhaineann le glantach nó le dromchlaghníomhaí atá curtha ar fáil ar an margadh acu.