IARSCRÍBHINN I

1.

Is é cuspóir ginearálta an Chláir cuidiú leis an Liotuáin díchoimisiúnú Ghléasra Cumhachta Núicléiche Ignalina a chur chun feidhme, le béim ar leith ar na dúshláin sábháilteachta a bhaineann leis sin a bhainistiú. Ós rud é go bhfuil baint cóimeálacha breosla spíonta ó fhoirgnimh imoibreora curtha i gcrích, is iad na chéad dúshláin sábháilteachta eile nach mór dul i ngleic leo leis an gClár croí na n-imoibreoirí a dhíchóimeáil agus bainistiú leanúnach a dhéanamh ar dhíchoimisiúnú agus ar dhramhaíl iarmharach.

2.

Sa tréimhse mhaoiniúcháin dar tús 2021, beidh an clár ina chúnamh do na gníomhaíochtaí seo a leanas a áirítear sa phlean díchoimisiúnúcháin arna thíolacadh ag an Liotuáin i gcomhréir le Rialachán (AE) Uimh. 1369/2013, go háirithe an méid seo a leanas:

3.

Le plean díchoimisiúnúcháin Ghléasra Cumhachta Núicléiche Ignalina bunaíodh struchtúr miondealaithe oibre an Chláir (Gníomhaíocht Díchoimisiúnúcháin Ghléasra Cumhachta Núicléiche Ignalina agus Struchtúr Ordlathach Dianscaoilte na dTionscadal). Sa chéad leibhéal den struchtúr miondealaithe oibre sin tá na sé mhír seo a leanas:

Cumhdaítear le mír P.0 “Eagraíocht gníomhaíochta fiontraíochta” bainistiú fiontair, faireachas agus dearbhú cáilíochta, faireachán radaíochta agus éiceolaíochta, slándáil fhisiciúil, comhairleoireacht innealtóireachta agus tacaíocht dlí do ghníomhaíochtaí fiontar agus cumarsáid phoiblí.

Cumhdaítear le mír P.1 “Ullmhúchán díchoimisiúnúcháin” foráil do réamhchoinníollacha díchoimisiúnúcháin (amhail fardal trealaimh agus tréithriú raideolaíoch), bonneagar a mhodhnú, trealamh a shuiteáil agus saoráidí a thógáil, córais agus trealamh a leithlisiú, agus córais phróisis, trealamh agus saoráidí a dhí-éilliú.

Cumhdaítear le mír P.2 “Díchóimeáil/scartáil saoráide agus athchóiriú suímh” imoibreoirí a dhíchóimeáil, trealamh/córais próisis a dhíchóimeáil agus réamhchóireáil dramhaíola, scartáil saoráidí agus athchóiriú suímh.

Cumhdaítear le mír P.3 “Láimhseáil Breosla Núicléach Spíonta” láimhseáil agus stóráil breosla núicléach spíonta.

Cumhdaítear le mír P.4 “Láimhseáil dramhaíola” cóireáil, cóiriú, stóráil agus diúscairt dramhaíola radaighníomhaí ar leibhéal an-íseal agus ar leibhéal idirmheánach a bhíonn mar thoradh ar na gníomhaíochtaí oibríochtúla agus díchoimisiúnúcháin.

Cumhdaítear le mír P.5 “Clár iar-oibríochta” oibriú agus cothabháil saoráidí, acmhainní fuinnimh, soláthar uisce, séarachas agus íonú uisce.

4.

Téitear i ngleic leis na príomhdhúshláin sábháilteachta sa tréimhse maoiniúcháin ón 1 Eanáir 2021 go dtí an 31 Nollaig 2027 trí ghníomhaíochtaí faoi mhíreanna P.1, P.2 agus P.4. Cumhdaítear go háirithe díchóimeáil chroí na n-imoibreoirí faoi mhír P.2. Téitear i ngleic le dúshláin is lú faoi mhír P.3, agus cumhdaítear gníomhaíochtaí tacaíochta díchoimisiúnúcháin le míreanna P.0 agus P.5.

5.

Dá réir sin, agus an clár oibre ilbhliantúil á ullmhú aige, breithneoidh an Coimisiún, i ndlúthchomhar leis an Liotuáin, na méideanna atá ar fáil a dháileadh de réir na dtosaíochtaí atá sainaitheanta i dTábla 1, gan dochar d’Airteagal 8.

Tábla 1

6.

Scaipfear eolas agus taithí a fuarthas agus ceachtanna a foghlaimíodh faoin gClár maidir leis an bpróiseas díchoimisiúnúcháin ar gheallsealbhóirí an Aontais, agus ar an gcaoi sin, cuirfear feabhas ar bhreisluach AE an Chláir. Féadfaidh an méid seo a leanas a bheith san áireamh ar na gníomhaíochtaí sin:

Is é an tAontas a mhaoiníonn na gníomhaíochtaí seo ar ráta 100 % de na costais incháilithe.

Tá JRC le tuairisciú ar an dul chun cinn arna dhéanamh maidir leis na gníomhaíochtaí seo, ar dul chun cinn é a thomhasfar ar bhonn táscairí a shonraítear ina chlár oibre ilbhliantúil.

7.

Tá diúscairt breosla spíonta agus dramhaíola radaighníomhaí i stór geolaíoch domhain agus an t-ullmhúchán chuici sin eisiata ón imchlúdach airgeadais dá dtagraítear in Airteagal 4(1).