+Airteagal 2 Sainmhínithe
---+Airteagal 2 1
---+Airteagal 2 2
---+Airteagal 2 3
---+Airteagal 2 4
---+Airteagal 2 5

Airteagal 2 Sainmhínithe

-

1. Forbhreathnú

,
Airteagal 2 1

1.   Chun críocha an Rialacháin seo, tá feidhm ag na sainmhínithe seo a leanas:

(1)

ciallaíonn ‘sciúradh airgid’ an t-iompar mar a leagtar amach in Airteagal 3, míreanna 1 agus 5, de Threoir (AE) 2018/1673 lena n-áirítear cabhrú agus neartú, gríosú agus iarracht an t-iompar sin a dhéanamh, cibé acu ar chríoch Ballstáit nó ar chríoch tríú tír a rinneadh na gníomhaíochtaí a ghin an mhaoin atá le sciúradh; is féidir an t-eolas, an intinn nó an cuspóir a éilítear mar ghné den iompar sin a thuiscint as imthosca fíorasacha oibiachtúla;

(2)

ciallaíonn ‘maoiniú sceimhlitheoireachta’ an t-iompar mar a leagtar amach in Airteagal 11 de Threoir (AE) 2017/541 lena n-áirítear cabhrú agus neartú, gríosú agus iarracht an t-iompar sin a dhéanamh, cibé acu ar chríoch Ballstáit nó ar chríoch tríú tír a rinneadh é; is féidir an t-eolas, an intinn nó an cuspóir a éilítear mar ghné den iompar sin a thuiscint as imthosca fíorasacha oibiachtúla;

(3)

ciallaíonn ‘gníomhaíocht choiriúil’ gníomhaíocht choiriúil mar a shainmhínítear in Airteagal 2, pointe (1), de Threoir (AE) 2018/1673, chomh maith le calaois a dhéanann difear do leasanna airgeadais an Aontais mar a shainmhínítear in Airteagal 3(2) de Threoir (AE) 2017/1371, éilliú éighníomhach agus gníomhach mar a shainmhínítear in Airteagal 4(2) agus míleithreasú mar a shainmhínítear in Airteagal 4(3), an dara fomhír, den Treoir sin;

(4)

ciallaíonn ‘cistí’ nó ‘maoin’ maoin mar a shainmhínítear in Airteagal 2, pointe (2), de Threoir (AE) 2018/1673;

(5)

ciallaíonn ‘institiúid creidmheasa’:

(a)

institiúid creidmheasa mar a shainmhínítear in Airteagal 4(1), pointe (1), de Rialachán (AE) Uimh. 575/2013;

(b)

brainse d’institiúid creidmheasa, mar a shainmhínítear in Airteagal 4(1), pointe 17, de Rialachán (AE) Uimh. 575/2013, i gcás ina bhfuil sé lonnaithe san Aontas, cibé acu i mBallstát nó i dtríú tír atá a cheannoifig lonnaithe;

(6)

ciallaíonn ‘institiúid airgeadais’:

(a)

gnóthas seachas institiúid creidmheasa nó gnólacht infheistíochta, a dhéanann ceann amháin nó níos mó de na gníomhaíochtaí a liostaítear i bpointí (2) go (12), (14) agus (15) d’Iarscríbhinn I a ghabhann le Treoir 2013/36/AE ó Pharlaimint na hEorpa agus ón gComhairle (32), lena n-áirítear gníomhaíochtaí oifigí malairte airgeadra (bureaux de change), ach nach n-áirítear leo gníomhaíochtaí dá dtagraítear i bpointe (8) d’Iarscríbhinn I a ghabhann le Treoir (AE) 2015/2366, nó gnóthas arb é a phríomhghníomhaíocht sealúchais a fháil, lena n-áirítear cuideachta sealbhaíochta airgeadais, cuideachta sealbhaíochta airgeadais mheasctha agus cuideachta sealbhaíochta airgeadais gníomhaíochta measctha;

(b)

gnóthas árachais mar a shainmhínítear in Airteagal 13, pointe (1), de Threoir 2009/138/CE ó Pharlaimint na hEorpa agus ón gComhairle (33), a mhéid a dhéanann sé gníomhaíochtaí árachais saoil nó gníomhaíochtaí a bhaineann le hinfheistíochtaí a chumhdaítear leis an Treoir sin, lena n-áirítear cuideachtaí sealbhaíochta árachais agus cuideachtaí sealbhaíochta árachais de ghníomhaíocht mheasctha mar a shainmhínítear, faoi seach, in Airteagal 212(1), pointí (f) agus (g), de Threoir 2009/138/CE;

(c)

idirghabhálaí árachais mar a shainmhínítear in Airteagal 2(1), pointe (3), de Threoir (AE) 2016/97 i gcás ina ngníomhóidh sé maidir le hárachas saoil agus seirbhísí árachais eile a bhaineann le hinfheistíocht, cé is moite d’idirghabhálaí árachais nach mbailíonn préimheanna nó suimeanna atá beartaithe don chustaiméir agus a ghníomhaíonn faoi fhreagracht ceann amháin nó níos mó de na gnóthais nó idirghabhálaithe árachais le haghaidh na dtáirgí a bhaineann leo faoi seach;

(d)

gnólacht infheistíochta mar a shainmhínítear in Airteagal 4(1), pointe (1), de Threoir 2014/65/AE ó Pharlaimint na hEorpa agus ón gComhairle (34);

(e)

gnóthas comhinfheistíochta, go háirithe:

(i)

gnóthas le haghaidh comhinfheistíochta in urrúis inaistrithe (GCUI) mar a shainmhínítear in Airteagal 1(2) de Threoir 2009/65/CE agus a chuideachta bhainistíochta mar a shainmhínítear in Airteagal 2(1), pointe (b), den Treoir sin nó cuideachta infheistíochta atá údaraithe i gcomhréir leis an Treoir sin agus nach bhfuil cuideachta bhainistíochta ainmnithe aici, a chuireann aonaid GCUI ar fáil lena gceannach san Aontas;

(ii)

ciste infheistíochta malartach mar a shainmhínítear in Airteagal 4(1), pointe (a), de Threoir 2011/61/AE agus a bhainisteoir cistí infheistíochta malartacha mar a shainmhínítear in Airteagal 4(1), pointe (b), den Treoir sin a thagann faoin raon feidhme a leagtar amach in Airteagal 2 den Treoir sin;

(f)

taisclann lárnach urrús mar a shainmhínítear in Airteagal 2(1), pointe (1), de Rialachán (AE) Uimh. 909/2014 ó Pharlaimint na hEorpa agus ón gComhairle í (35);

(g)

creidiúnaí mar a shainmhínítear in Airteagal 4, pointe (2), de Threoir 2014/17/AE ó Pharlaimint na hEorpa agus ón gComhairle (36) agus in Airteagal 3, pointe (b), de Threoir 2008/48/CE ó Pharlaimint na hEorpa agus ón gComhairle (37) é;

(h)

idirghabhálaí creidmheasa mar a shainmhínítear in Airteagal 4, pointe (5), de Threoir 2014/17/AE agus in Airteagal 3, pointe (f), de Threoir 2008/48/CE é, agus na cistí á sealbhú mar a shainmhínítear in Airteagal 4, pointe (25), de Threoir (AE) 2015/2366 i dtaca leis an gcomhaontú creidmheasa, cé is moite den idirghabhálaí creidmheasa a dhéanann gníomhaíochtaí faoi fhreagracht creidiúnaí amháin nó níos mó nó idirghabhálaí creidmheasa amháin nó níos mó;

(i)

soláthraí seirbhísí cripteashócmhainní;

(j)

brainse d’institiúid airgeadais dá dtagraítear i bpointí (a) go (i), nuair atá sé lonnaithe san Aontas, cibé acu atá a ceannoifig lonnaithe i mBallstát nó i dtríú tír;

(7)

ciallaíonn ‘cripteashócmhainn’ cripteashócmhainn mar a shainmhínítear in Airteagal 3(1), pointe (5), de Rialachán (AE) 2023/1114 í, ach amháin nuair a thagann sí faoi na catagóirí a liostaítear in Airteagal 2(4) den Rialachán sin;

(8)

ciallaíonn ‘seirbhísí cripteashócmhainní’ seirbhísí cripteashócmhainní mar a shainmhínítear in Airteagal 3(1), pointe (16), de Rialachán (AE) 2023/1114, cé is moite de chomhairle a sholáthar maidir le cripteashócmhainní dá dtagraítear in Airteagal 3(1), pointe (16)(h), den Rialachán sin;

(9)

ciallaíonn ‘soláthraí seirbhísí cripteashócmhainní’ soláthraí seirbhísí cripteashócmhainní mar a shainmhínítear in Airteagal 3(1), pointe (15), de Rialachán (AE) 2023/1114 é i gcás ina bhfuil seirbhís cripteashócmhainne amháin nó níos mó á soláthar aige;

(10)

ciallaíonn ‘cuideachta sealbhaíochta airgeadais gníomhaíochta measctha’ gnóthas, seachas cuideachta sealbhaíochta airgeadais nó cuideachta sealbhaíochta airgeadais mheasctha, nach bhfuil ina fhochuideachta de ghnóthas eile a n-áirítear institiúid creidmheasa nó institiúid airgeadais amháin ar a laghad ar a fhochuideachtaí;

(11)

ciallaíonn ‘soláthraí seirbhísí iontaobhais nó cuideachta’ aon duine nádúrtha nó dlítheanach a sholáthraíonn aon cheann de na seirbhísí seo a leanas do thríú páirtithe trína ghnó:

(a)

foirmiú cuideachtaí nó daoine dlítheanacha eile;

(b)

bheith ag gníomhú mar, nó é a shocrú do dhuine eile a bheith ag gníomhú mar, stiúrthóir nó rúnaí cuideachta, comhpháirtí i gcomhpháirtíocht, nó post comhchosúil i ndáil le daoine dlítheanacha eile;

(c)

oifig chláraithe, seoladh gnó, seoladh comhfhreagrais nó seoladh riaracháin chomh maith le seirbhísí gaolmhara eile a sholáthar do chuideachta, comhpháirtíocht nó aon duine dlítheanach eile nó aon socrú dlí eile;

(d)

bheith ag gníomhú mar, nó é a shocrú do dhuine eile a bheith ag gníomhú mar, iontaobhaí iontaobhais shainráite nó feidhm choibhéiseach a dhéanamh le haghaidh socrú dlíthiúil comhchosúil;

(e)

bheith ag gníomhú mar, nó é a shocrú do dhuine eile a bheith ag gníomhú mar, scairshealbhóir ainmnitheach ar son duine eile;

(12)

ciallaíonn ‘seirbhís cearrbhachais’ seirbhís ina gcuirtear geall lena ngabhann luach airgeadúil i gcluichí áidh, lena n-áirítear iad lena mbaineann gné chlisteachta mar shampla crannchuir, cluichí casaíne, cluichí pócair agus idirbhearta gealltóireachta a chuirtear ar fáil i suíomh fisiceach, nó ar aon mhodh cianda, trí mheáin leictreonacha nó aon teicneolaíocht eile lena n-éascaítear an chumarsáid, agus ar iarraidh aonair ó fhaighteoir seirbhísí;

(13)

ciallaíonn ‘cuideachta sealbhaíochta seachairgeadais gníomhaíochta measctha’ gnóthas, seachas cuideachta sealbhaíochta airgeadais nó cuideachta sealbhaíochta airgeadais mheasctha, nach bhfuil ina fhochuideachta de ghnóthas eile, a n-áirítear eintiteas amháin faoi oibleagáid, ar a laghad, dá dtagraítear in Airteagal 3, pointe (3), ar a fhochuideachtaí;

(14)

ciallaíonn ‘seoladh féinóstáilte’ seoladh féinóstáilte mar a shainmhínítear in Airteagal 3, pointe (20), de Rialachán (AE) 2023/1113 é;

(15)

ciallaíonn ‘soláthraí seirbhísí sluachistiúcháin’ soláthraí seirbhísí sluachistiúcháin faoi mar a shainmhínítear in Airteagal 2(1), pointe (e), de Rialachán (AE) 2020/1503 é;

(16)

ciallaíonn ‘idirghabhálaí sluachistiúcháin’ gnóthas, cé is moite de sholáthraí seirbhísí sluachistiúcháin, arb é a ghnó meaitseáil a dhéanamh nó a éascú, trí chóras faisnéise idirlíonbhunaithe atá oscailte don phobal nó do líon teoranta cisteoirí, idir úinéir agus cisteoir de réir mar a leanas:

(a)

úinéir tionscadail, ar duine nádúrtha nó dlítheanach é a bhfuil cistiú á lorg aige le haghaidh tionscadal ina gcuimsítear oibríocht réamhshainithe amháin nó sraith oibríochtaí réamhshainithe atá dírithe ar chuspóir ar leith, lena n-áirítear tiomsú airgid le haghaidh cúis nó imeacht ar leith gan beann ar cé acu don phobal nó do líon teoranta cisteoirí atá na tionscadail sin beartaithe; agus

(b)

cisteoir, ar duine nádúrtha nó dlítheanach é a rannchuidíonn le maoiniú tionscadal, trí iasachtaí ar ús nó gan ús, nó tabhartais, lena n-áirítear i gcás ina bhfuil an deontóir i dteideal sochar neamhábhartha mar gheall ar na tabhartais sin.

(17)

ciallaíonn ‘ríomh-airgead’ ríomh-airgead arna shainmhíniú in Airteagal 2, pointe (2), de Threoir 2009/110/CE ó Pharlaimint na hEorpa agus ón gComhairle (38), ach gan an luach airgid dá dtagraítear in Airteagal 1(4) agus (5) den Treoir sin a áireamh;

(18)

ciallaíonn ‘bunaíocht’ eintiteas faoi oibleagáid a shaothraíonn go hiarbhír gníomhaíocht eacnamaíoch a chumhdaítear le hAirteagal 3 i mBallstát nó i dtríú tír seachas an tír ina bhfuil a cheannoifig lonnaithe ar feadh tréimhse éiginnte agus trí bhonneagar cobhsaí, lena n-áirítear:

(a)

brainse nó fochuideachta;

(b)

i gcás institiúidí creidmheasa agus airgeadais, bonneagar atá cáilithe mar bhunaíocht faoi rialáil stuamachta.

(19)

ciallaíonn ‘gaolmhaireacht gnó’ gaolmhaireacht gnó, ghairmiúil nó tráchtála atá nasctha le gníomhaíochtaí gairmiúla eintitis faoi oibleagáid, a bhunaítear idir eintiteas faoi oibleagáid agus custaiméir, lena n-áirítear in éagmais conradh i scríbhinn agus a mheastar, tráth bhunú na teagmhála, go mbeidh gné athdhéantach nó mharthanach aici, nó a thiocfaidh go mbeidh gné acu sin aici ina dhiaidh sin;

(20)

ciallaíonn ‘idirbhearta nasctha’ dhá idirbheart nó níos mó arb ionann nó comhchosúil a dtionscnamh, a gceann scríbe agus a gcríoch, nó a dtréithe ábhartha eile, in imeacht tréimhse shonrach;

(21)

ciallaíonn ‘tríú tír’ aon dlínse, stát neamhspleách nó críoch uathrialach nach bhfuil mar chuid den Aontas agus ag a bhfuil a reachtaíocht féin nó a chóras forfheidhmiúcháin féin AML/CFT;

(22)

ciallaíonn ‘gaolmhaireacht chomhfhreagrach’:

(a)

seirbhísí baincéireachta a bheith á soláthar ag institiúid creidmheasa amháin i ról an chomhfhreagraí d’institiúid creidmheasa eile i ról an fhreagróra, lena n-áirítear cuntas reatha nó cuntas dliteanais eile agus seirbhísí gaolmhara a sholáthar, mar shampla bainistíocht airgid thirim, aistrithe idirnáisiúnta cistí, mar a shainmhínítear in Airteagal 4, pointe (25), de Threoir (AE) 2015/2366 é, imréiteach seiceanna, cuntais ‘iníoctha tríd’ agus seirbhísí malairte eachtraí;

(b)

na gaolmhaireachtaí idir institiúidí creidmheasa, institiúidí airgeadais agus idir an dá chineál institiúide sin, lena n-áirítear i gcás ina gcuireann institiúid chomhfhreagrach seirbhísí comhchosúla ar fáil d’institiúid is freagróir, agus lena n-áirítear gaolmhaireachtaí a bunaíodh le haghaidh idirbhearta urrús nó aistrithe cistí mar a shainmhínítear in Airteagal 4, pointe (25), de Threoir (AE) 2015/2366, agus le haghaidh idirbhearta cripteashócmhainní nó aistrithe cripteashócmhainní;

(23)

ciallaíonn ‘institiúid chaoch’:

(a)

i gcás institiúidí creidmheasa agus institiúidí airgeadais nach soláthraithe seirbhísí cripteashócmhainní iad: institiúid creidmheasa nó institiúid airgeadais, nó institiúid a dhéanann gníomhaíochtaí atá coibhéiseach leis na cinn arna ndéanamh ag institiúidí creidmheasa agus institiúidí airgeadais, atá cruthaithe i ndlínse nach bhfuil aon láithreacht fhisiceach aici ann, ar a ndéantar stiúradh agus bainistiú fóinteach, agus nach bhfuil cleamhnaithe le grúpa airgeadais rialáilte;

(b)

i gcás soláthraithe seirbhísí cripteashócmhainní: eintiteas a bhfuil a n-ainmneacha luaite sa chlár arna bhunú ag an Údarás Eorpach um Urrúis agus Margaí de bhun Airteagal 110 de Rialachán (AE) 2023/1114 nó eintiteas tríú tír a sholáthraíonn seirbhísí cripteashócmhainní gan iad a bheith ceadúnaithe nó cláraithe nó faoi réir maoirseacht AML/CFT sa tír sin;

(24)

ciallaíonn ‘cuntas cripteashócmhainní’ cuntas cripteashócmhainní mar a shainmhínítear in Airteagal 3, pointe (19), de Rialachán (AE) 2023/1113 é;

(25)

ciallaíonn ‘boinn lena gcuirtear leis an anaithnideacht’ cripteashócmhainní a bhfuil gnéithe ionsuite acu chun faisnéis faoi aistriú cripteashócmhainní a dhéanamh anaithnid, go córasach nó go roghnach;

(26)

ciallaíonn ‘IBAN fíorúil’ aitheantóir is cúis le híocaíochtaí a atreorú chuig cuntas íocaíochta a shainaithnítear le IBAN atá éagsúil leis an aitheantóir sin;

(27)

ciallaíonn ‘Aitheantóir Eintitis Dhlítheanaigh’ cód tagartha alfa-uimhriúil uathúil bunaithe ar an gcaighdeán ISO 17442 a shanntar d’eintiteas dlítheanach;

(28)

ciallaíonn ‘úinéir tairbhiúil’ aon duine nádúrtha ag a bhfuil eintiteas dlítheanach nó iontaobhas sainráite nó socrú dlíthiúil comhchosúil ar úinéireacht nó faoina rialú deiridh;

(29)

ciallaíonn ‘iontaobhas sainráite’ iontaobhas arna chur ar bun d’aon ghnó ag an socraitheoir, inter vivos nó ar bhás, i bhfoirm doiciméad i scríbhinn de ghnáth, chun sócmhainní a chur faoi rialú iontaobhaí chun tairbhe tairbhí nó chun críche sonraithe;

(30)

ciallaíonn ‘ábhair chumhachta’ na daoine nádúrtha nó dlítheanacha nó an aicme daoine nádúrtha nó dlítheanacha as a bhféadfaidh na hiontaobhaithe a roghnú le bheith ina dtairbhithe in iontaobhas lánroghnach;

(31)

ciallaíonn ‘faighteoir i gcás mainneachtana’ na daoine nádúrtha nó dlítheanacha nó an aicme daoine nádúrtha nó dlítheanacha ar tairbhithe in iontaobhas lánroghnach iad i gcás nach bhfeidhmeodh na hiontaobhaithe a lánrogha;

(32)

ciallaíonn ‘socrú dlíthiúil’ iontaobhas sainráite nó socrú ag a bhfuil struchtúr nó feidhm chomhchosúil le hiontaobhas sainráite, lena n-áirítear fiducie agus cineálacha áirithe Treuhand agus fideicomiso;

(33)

ciallaíonn ‘faisnéis bhunúsach’:

(a)

i ndáil le heintiteas dlítheanach:

(i)

foirm dhlíthiúil agus ainm an eintitis dhlítheanaigh;

(ii)

ionstraim an bhunaithe, agus na reachtanna más in ionstraim ar leithligh atá siad;

(iii)

seoladh na hoifige cláraithe nó oifigiúla, agus más éagsúil í, an phríomhláthair ghnó, agus an tír chruthaithe;

(iv)

liosta a ionadaithe dlíthiúla;

(v)

i gcás inarb infheidhme, liosta dá scairshealbhóirí nó dá chomhaltaí, lena n-áirítear faisnéis maidir le líon na scaireanna atá ag gach scairshealbhóir agus catagóirí na scaireanna sin agus cineál na gceart vótála gaolmhar;

(vi)

i gcás ina mbeidh fáil uirthi, an uimhir chlárúcháin, an t-aitheantóir uathúil Eorpach, an uimhir aitheantais cánach agus an tAitheantóir Eintitis Dhlítheanaigh;

(vii)

i gcás fondúireachtaí, na sócmhainní a shealbhaíonn an fhondúireacht chun a críocha a shaothrú;

(b)

i ndáil le socrú dlíthiúil:

(i)

ainm nó aitheantóir uathúil an tsocraithe dhlíthiúil;

(ii)

an dintiúr iontaobhais nó a chomhionann;

(iii)

críocha an tsocraithe dhlíthiúil, más ann dóibh;

(iv)

na sócmhainní a shealbhaítear sa socrú dlíthiúil nó a bhainistítear tríd;

(v)

áit chónaithe iontaobhaithe an iontaobhais shainráite nó na ndaoine ag a bhfuil poist choibhéiseacha sa socrú dlíthiúil comhchosúil, agus, más áit éagsúil í, an áit a riartar an t-iontaobhas sainráite nó an socrú dlíthiúil comhchosúil;

(34)

ciallaíonn ‘duine atá faoi riteacht pholaitiúil’ duine nádúrtha a gcuirtear nó ar cuireadh feidhmeanna poiblí suntasacha de chúram air nó uirthi, lena n-áirítear:

(a)

i mBallstát:

(i)

cinn Stáit, cinn rialtais, airí agus leas-airí nó airí cúnta;

(ii)

comhaltaí parlaiminte nó comhlachtaí reachtacha comhchosúla;

(iii)

comhaltaí de chomhlachtaí rialaithe na bpáirtithe polaitiúla a bhfuil suíocháin acu i gcomhlachtaí feidhmiúcháin nó reachtacha náisiúnta, nó i gcomhlachtaí feidhmiúcháin nó reachtacha réigiúnacha nó áitiúla a dhéanann ionadaíocht ar thoghlaigh ina bhfuil 50 000 áitritheoir ar a laghad.;

(iv)

comhaltaí cúirteanna uachtaracha, cúirteanna bunreachtúla nó comhlachtaí breithiúnacha eile ardleibhéil, nach mbíonn a gcinntí sin faoi réir achomhairc eile, ach amháin i gcúinsí eisceachtúla;

(v)

comhaltaí de chúirteanna iniúchóirí nó de bhoird na mbanc ceannais;

(vi)

ambasadóirí, chargés d’affaires agus oifigigh ardaicme sna fórsaí armtha;

(vii)

comhaltaí de chomhlachtaí riaracháin, bainistíochta nó maoirseachta fiontar arna rialú faoi aon cheann de na gaolmhaireachtaí a liostaítear in Airteagal 22 de Threoir 2013/34/AE ag an stát, nó, i gcás ina gcáilíonn na fiontair sin mar ghnóthais mheánmhéide nó mhóra nó mar ghrúpaí meánmhéide nó móra mar a shainmhínítear in Airteagail 3(3), (4), (6) agus (7) den Treoir sin, ag údaráis réigiúnacha nó áitiúla;

(viii)

cinn údarás réigiúnach agus áitiúil, lena n-áirítear grúpálacha bardas agus réigiún cathrach, ina bhfuil 50 000 áitritheoir ar a laghad;

(ix)

feidhmeanna poiblí tábhachtacha eile dá bhforálann na Ballstáit;

(b)

in eagraíocht idirnáisiúnta:

(i)

na hoifigigh ag a bhfuil an chéim is airde, a leas-oifigigh agus comhaltaí den bhord nó feidhmeanna coibhéiseacha in eagraíocht idirnáisiúnta;

(ii)

ionadaithe chuig Ballstát nó chuig an Aontas;

(c)

ar leibhéal an Aontais:

feidhmeanna ar leibhéal institiúidí agus chomhlachtaí an Aontais ar coibhéiseach iad leo siúd a liostaítear i bpointí (a)(i), (ii), (iv), (v) agus (vi);

(d)

i dtríú tír:

feidhmeanna ar coibhéiseach iad leo siúd a liostaítear i bpointe (a);

(35)

ciallaíonn ‘ball teaghlaigh’:

(a)

céile duine, nó duine i gcomhpháirtíocht chláraithe nó shibhialta nó i socrú comhchosúil leis nó léi;

(b)

páiste agus céile an duine clainne sin, nó duine i gcomhpháirtíocht chláraithe nó shibhialta nó i socrú comhchosúil leis nó léi;

(c)

tuismitheoir duine;

(d)

maidir leis na feidhmeanna dá dtagraítear i bpointe (34)(a)(i) agus feidhmeanna coibhéiseacha ar leibhéal an Aontais nó i dtríú tír, siblín;

(36)

ciallaíonn ‘duine arb eol gur dlúthchomhlach é nó í’:

(a)

duine nádúrtha arb eol gur comhúinéir tairbhiúil eintiteas dlítheanach nó socruithe dlíthiúla é nó í, nó go bhfuil sé nó sí in aon dlúthghaolmhaireacht gnó eile le duine atá faoi riteacht pholaitiúil;

(b)

duine nádúrtha ar úinéir tairbhiúil eintitis dhlítheanaigh nó socraithe dhlíthiúil é nó í arb eol gur cuireadh ar bun é chun tairbhe duine atá faoi riteacht pholaitiúil;

(37)

ciallaíonn ‘comhlacht bainistíochta’ comhlacht nó comhlachtaí eintitis faoi oibleagáid, a cheaptar i gcomhréir leis an dlí náisiúnta, a dtugtar an chumhacht dóibh straitéis, cuspóirí agus treo foriomlán an eintitis faoi oibleagáid a shocrú, agus a dhéanann formhaoirseacht agus faireachán ar chinnteoireacht bainistíochta, agus lena n-áirítear na daoine a stiúrann gnó an eintitis faoi oibleagáid go hiarbhír; i gcás nach ann do chomhlacht den sórt sin, an duine a stiúrann gnó an eintitis faoi oibleagáid go hiarbhír;

(38)

ciallaíonn ‘comhlacht bainistíochta i gcáil a fheidhme bainistíochta’ an comhlacht bainistíochta atá freagrach as bainistíocht laethúil an eintitis faoi oibleagáid;

(39)

ciallaíonn ‘comhlacht bainistíochta i gcáil a fheidhme maoirseachta’ an comhlacht bainistíochta ag gníomhú ina ról formhaoirseachta agus faireacháin ar chinnteoireacht an lucht bainistíochta;

(40)

ciallaíonn ‘bainistíocht shinsearach’, comhaltaí an chomhlachta bainistíochta i gcáil a fheidhme bainistíochta, chomh maith le hoifigigh agus fostaithe ag a bhfuil eolas leordhóthanach ar neamhchosaint na n-eintiteas faoi oibleagáid ar riosca an sciúrtha airgid agus mhaoiniú na sceimhlitheoireachta agus ag a bhfuil sinsearacht leordhóthanach chun cinntí a dhéanamh le difear a dhéanamh dá neamhchosaint ar rioscaí;

(41)

ciallaíonn ‘grúpa’ grúpa gnóthas arb é atá ann máthairghnóthas, a fhochuideachtaí, chomh maith le gnóthais atá nasctha le chéile trí ghaolmhaireacht de réir bhrí Airteagal 22 de Threoir 2013/34/AE;

(42)

ciallaíonn ‘máthairghnóthas’:

(a)

i gcás grúpaí a bhfuil a gceannoifig lonnaithe san Aontas, eintiteas faoi oibleagáid ar máthairghnóthas é mar a shainmhínítear é in Airteagal 2, pointe (9), de Threoir 2013/34/AE nach fochuideachta de ghnóthas eile san Aontas é féin, ar choinníoll gur eintiteas faoi oibleagáid ceann amháin de na foghnóthais sin ar a laghad;

(b)

i gcás grúpaí a bhfuil a gceannoifig lonnaithe lasmuigh den Aontas agus inar eintitis faoi oibleagáid atá bunaithe san Aontas iad dhá fhoghnóthas dá chuid, gnóthas sa ghrúpa sin atá bunaithe san Aontas agus ar fíor an méid seo a leanas ina leith:

(i)

is eintiteas faoi oibleagáid é;

(ii)

is gnóthas nach fochuideachta é de ghnóthas eile ar eintiteas faoi oibleagáid atá bunaithe san Aontas é;

(iii)

tá suntasacht leordhóthanach aige laistigh den ghrúpa agus tá tuiscint leordhóthanach aige ar oibríochtaí an ghrúpa atá faoi réir cheanglais an Rialacháin seo, agus

(iv)

tugtar an fhreagracht dó ceanglais uileghrúpa a chur chun feidhme faoi Chaibidil II, Roinn 2, den Rialachán seo;

(43)

ciallaíonn ‘airgead tirim’ airgead tirim mar a shainmhínítear in Airteagal 2(1), pointe (a), de Rialachán (AE) 2018/1672 ó Pharlaimint na hEorpa agus ón gComhairle (39);

(44)

ciallaíonn ‘údarás inniúil’:

(a)

Aonad Faisnéise Airgeadais (FIU);

(b)

údarás maoirseachta;

(c)

údarás poiblí dar feidhm an sciúradh airgid, a chionta preideacáide nó an maoiniú sceimhlitheoireachta a imscrúdú nó a ionchúiseamh, nó dar feidhm sócmhainní coiriúla a rianú, a urghabháil nó a reo agus a choigistiú;

(d)

údarás poiblí arna ainmniú a bheith freagrach as comhrac an sciúrtha airgid nó mhaoiniú na sceimhlitheoireachta;

(45)

ciallaíonn ‘maoirseoir’ an comhlacht ar a gcuirtear freagrachtaí chun a áirithiú go gcomhlíonfaidh eintitis faoi oibleagáid ceanglais an Rialacháin seo, lena n-áirítear AMLA nuair a dhéanann sé na tascanna a chuirtear ar a iontaoibh in Airteagal 5(2) de Rialachán (AE) 2024/1620;

(46)

ciallaíonn ‘údarás maoirseachta’ maoirseoir is comhlacht poiblí, nó an t-údarás poiblí a dhéanann formhaoirseacht ar chomhlachtaí féinrialála i bhfeidhmiú a bhfeidhmeanna maoirseachta de bhun Airteagal 37 de Threoir (AE) 2024/1640, nó AMLA agus é ag gníomhú mar mhaoirseoir;

(47)

ciallaíonn ‘comhlacht féinrialála’ comhlacht a dhéanann ionadaíocht ar ghairmithe agus a bhfuil ról aige maidir lena rialáil, maidir le comhlíonadh feidhmeanna áirithe maoirseachta nó faireacháin agus maidir lena áirithiú go bhforfheidhmítear na rialacha a bhaineann leo;

(48)

ciallaíonn ‘cistí nó sócmhainní eile’ aon sócmhainní, lena n-áirítear, ach gan a bheith teoranta dóibh seo a leanas: sócmhainní airgeadais, acmhainní eacnamaíocha, lena n-áirítear ola agus acmhainní nádúrtha eile, maoin de gach cineál, bíodh sí inláimhsithe nó doláimhsithe, sochorraithe nó dochorraithe, gan beann ar an mbealach a bhfaightear iad, agus doiciméid nó ionstraimí dlí in aon fhoirm, lena n-áirítear foirm leictreonach nó dhigiteach, lena bhfianaítear teideal na gcistí nó sócmhainní eile den sórt sin, nó leas iontu, lena n-áirítear, ach gan a bheith teoranta dóibh seo a leanas: creidmheasanna bainc, seiceanna taistil, seiceanna bainc, orduithe airgid, scaireanna, urrúis, bannaí, dréachtaí, nó litreacha creidmheasa, agus aon ús, díbhinní nó ioncam eile ar na cistí nó sócmhainní eile den sórt sin nó luach a fhabhraíonn astu nó a ghintear astu, agus aon sócmhainní eile a d’fhéadfaí a úsáid chun cistí, earraí nó seirbhísí a fháil;

(49)

ciallaíonn ‘smachtbhannaí airgeadais spriocdhírithe’ idir reo sócmhainní agus toirmisc ar chur cistí nó sócmhainní eile ar fáil, go díreach nó go hindíreach, chun tairbhe na ndaoine agus na n-eintiteas ainmnithe de bhun Cinntí ón gComhairle a glacadh ar bhonn Airteagal 29 CAE agus Rialacháin ón gComhairle a glacadh ar bhonn Airteagal 215 CFAE;

(50)

ciallaíonn ‘smachtbhannaí airgeadais na Náisiún Aontaithe’ sócmhainní a reo agus toirmisc a chur ar chistí nó sócmhainní eile a chur ar fáil, go díreach nó go hindíreach, chun tairbhe na ndaoine agus na n-eintiteas arna n-ainmniú nó arna liostú de bhun an mhéid a leanas:

(a)

rún 1267 (1999) ó CSNA agus na rúin a thiocfaidh i gcomharbas air;

(b)

rún 1373 (2001) ó CSNA, lena n-áirítear an cinneadh go gcuirfear na smachtbhannaí ábhartha i bhfeidhm ar an duine nó ar an eintiteas agus an cinneadh sin a chur in iúl go poiblí;

(c)

smachtbhannaí airgeadais na Náisiún Aontaithe a bhaineann le maoiniú an leata;

(51)

ciallaíonn ‘smachtbhannaí airgeadais na Náisiún Aontaithe a bhaineann le maoiniú an leata’ sócmhainní a reo agus toirmisc a chur ar chistí nó sócmhainní eile a chur ar fáil, go díreach nó go hindíreach, chun tairbhe na ndaoine agus na n-eintiteas arna n-ainmniú nó arna liostú de bhun an mhéid a leanas:

(a)

rún 1718 (2006) ó CSNA agus na rúin a thiocfaidh i gcomharbas air;

(b)

rún 2231 (2015) ó CSNA agus na rúin a thiocfaidh i gcomharbas air;

(c)

aon rún eile ó CSNA lena bhforchuirtear reo sócmhainní agus toirmisc ar chur ar fáil cistí nó sócmhainní eile i ndáil le leathadh arm ollscriosta a mhaoiniú;

(52)

ciallaíonn ‘club sacair ghairmiúil’ aon duine dlítheanach ar club sacair é, ar leis nó a bhainistíonn club sacair ar deonaíodh ceadúnas dó agus atá rannpháirteach sna sraitheanna sacair náisiúnta i mBallstát agus a bhfuil a imreoirí agus a fhoireann ar fostú ar conradh agus a dtugtar luach saothair dóibh mar mhalairt ar a gcuid seirbhísí;

(53)

ciallaíonn ‘gníomhaire sacair’ duine nádúrtha nó dlítheanach a sholáthraíonn, i gcomhair táille, seirbhísí idirghabhála agus a dhéanann ionadaíocht ar imreoirí sacair nó ar chlubanna sacair ghairmiúil in idirbheartaíocht d’fhonn conradh a thabhairt i gcrích le haghaidh imreoir sacair nó a dhéanann ionadaíocht ar chlubanna sacair ghairmiúil in idirbheartaíocht d’fhonn comhaontú a thabhairt i gcrích maidir le haistriú imreora sacair;

(54)

ciallaíonn ‘earraí ardluacha’ earraí a liostaítear in Iarscríbhinn IV;

(55)

ciallaíonn ‘miotail agus clocha lómhara’ miotail agus clocha a liostaítear in Iarscríbhinn V;

(56)

ciallaíonn ‘earraí cultúrtha’ earraí a liostaítear in Iarscríbhinn I a ghabhann le Rialachán (CE) Uimh. 116/2009 ón gComhairle (40);

(57)

ciallaíonn ‘comhpháirtíocht comhroinnte faisnéise’ sásra lena gcumasaítear comhroinnt agus próiseáil faisnéise idir eintitis faoi oibleagáid agus, i gcás inarb infheidhme, údaráis inniúla dá dtagraítear i bpointe 45(a), (b) agus (c), chun sciúradh airgid, a chionta preideacáide agus maoiniú na sceimhlitheoireachta a chosc agus a chomhrac, cibé acu ar an leibhéal náisiúnta nó ar bhonn trasteorann, agus gan beann ar fhoirm na comhpháirtíochta sin.
Airteagal 2 2

2.   Ní thuigfear go gcumhdaítear oifigigh mheánaicme nó oifigigh níos sóisearaí le haon fheidhm phoiblí dá dtagraítear i mír 1, pointe (3).
Airteagal 2 3

3.   I gcás ina bhfuil údar cuí leis mar gheall ar a n-eagrúchán riaracháin agus de réir riosca, féadfaidh na Ballstáit tairseacha níos ísle a shocrú chun na feidhmeanna poiblí suntasacha seo a leanas a ainmniú:

a)

comhaltaí de chomhlachtaí rialaithe na bpáirtithe polaitiúla a bhfuil ionadaíocht á déanamh orthu ar an leibhéal réigiúnach nó ar an leibhéal áitiúil, dá dtagraítear i mír 1, pointe (34)(a)(iii);

b)

cinn údarás réigiúnach agus áitiúil, dá dtagraítear i mír 1, pointe (34)(a)(viii).

Cuirfidh na Ballstáit na tairseacha níos ísle sin in iúl don Choimisiún.
Airteagal 2 4

4.   Maidir le mír 1, pointe (34)(a)(vii),) den Airteagal seo, i gcás ina bhfuil údar leis mar gheall ar a n-eagrúchán riaracháin agus mar gheall ar riosca, féadfaidh na Ballstáit tairseacha níos ísle a shocrú chun fiontair arna rialú ag údaráis réigiúnacha nó áitiúla a shainaithint ná dóibh a shainítear in Airteagal 3(3), (4), (6) agus (7) de Rialachán 2013/34/AE.

Cuirfidh na Ballstáit na tairseacha tairseach níos ísle sin in iúl don Choimisiún.
Airteagal 2 5

5.   I gcás ina bhfuil údar leis mar gheall ar a struchtúir shóisialta agus chultúrtha agus mar gheall ar riosca, féadfaidh na Ballstáit raon feidhme níos leithne a chur i bhfeidhm chun siblín a ainmniú mar bhall teaghlaigh duine atá faoi riteacht pholaitiúil, dá dtagraítear i mír 1, pointe (35)(d).

Cuirfidh na Ballstáit an raon feidhme níos leithne sin in iúl don Choimisiún.

1.1 Tagairtí

1.2 Ceanglais aitheanta

1.3 Caighdeáin ghaolmhara

2. Ceanglais aitheanta

Ceanglais

3. Caighdeáin ghaolmhara

Caighdeáin