Airteagal 77 Cumhachtaí na n-údarás a chosnaíonn cearta bunúsacha agus comhar le húdaráis faireachais margaidh

Maidir le húdaráis phoiblí náisiúnta nó comhlachtaí poiblí náisiúnta a dhéanann maoirseacht nó forfheidhmiú ar urramú na n-oibleagáidí faoi dhlí an Aontais lena gcosnaítear cearta bunúsacha, lena n-áirítear an ceart chun neamh-idirdhealú, beidh sé de chumhacht acu iarraidh a dhéanamh agus rochtain a fháil ar aon fhaisnéis nó doiciméadacht arna chruthú nó arna choinneáil ón údarás ábhartha faireachais margaidh faoi bhun an Rialacháin seo i dteanga agus i bhformáid inléite ag meaisín trí mhodhanna leictreonacha i gcás ina bhfuil gá le rochtain ar an bhfaisnéis nó ar an doiciméadacht sin chun a sainorduithe a chomhlíonadh go héifeachtach laistigh de theorainneacha a ndlínse. Tá an tAirteagal seo gan dochar d’inniúlachtaí, do chúraimí, do chumhachtaí agus do neamhspleáchas na n-údarás nó na gcomhlachtaí poiblí náisiúnta ábhartha faoina sainorduithe.

Faoi réir na gcoinníollacha a shonraítear san Airteagal seo, tabharfaidh an t-údarás faireachais margaidh rochtain ar an bhfaisnéis nó ar an doiciméadacht sin don údarás poiblí ábhartha nó don chomhlacht poiblí ábhartha dá dtagraítear i mír 1, lena n-áirítear tríd an bhfaisnéis nó an doiciméadacht sin a iarraidh ar an soláthraí nó ar an úsáideoir gairmiúil, i gcás inar gá agus gan moill mhíchuí.

Oibreoidh na húdaráis faireachas margaidh agus na húdaráis phoiblí nó na comhlachtaí poiblí dá dtagraítear i mír 1 i ndlúthchomhar lena chéile agus tabharfaidh siad an cúnamh frithpháirteach is gá dá chéile chun a sainorduithe féin a chomhlíonadh, d’fhonn cur i bhfeidhm comhleanúnach an Rialacháin seo agus dhlí an Aontais lena gcosnaítear cearta bunúsacha a áirithiú agus cuíchóiriú nósanna imeachta a áirithiú agus a n-inniúlachtaí, a gcúraimí, a gcumhachtaí agus a neamhspleáchas faoi seach á n-urramú. Áireofar leis sin, go háirithe, malartú faisnéise i gcás inar gá chun an Rialachán seo agus reachtaíocht eile an Aontais lena mbaineann a mhaoirsiú nó a fhorfheidhmiú go héifeachtach.

Faoin 2 Samhain 2024, déanfaidh gach Ballstát na húdaráis phoiblí nó na comhlachtaí poiblí dá dtagraítear i mír 1 a shainaithint agus cuirfidh sé liosta ar fáil go poiblí. Tabharfaidh na Ballstáit fógra faoin liosta sin don Choimisiún agus do na Ballstáit eile agus coinneoidh siad an liosta cothrom le dáta.

I gcás nach leor an doiciméadacht dá dtagraítear i mír 1 chun a fháil amach ar tharla sárú ar oibleagáidí faoi dhlí an Aontais atá ceaptha cearta bunúsacha a chosaint, féadfaidh an t-údarás poiblí nó an comhlacht poiblí dá dtagraítear i mír 1 iarraidh réasúnaithe a chur faoi bhráid an údaráis faireachais margaidh, chun tástáil an chórais intleachta saorga ardriosca a eagrú trí mhodhanna teicniúla. Eagróidh an t-údarás faireachais margaidh an tástáil trí dhlúthbhaint leis an údarás poiblí iarrthach nó leis an gcomhlacht poiblí iarrthach laistigh de thréimhse réasúnta ama tar éis na hiarrata.

Aon fhaisnéis nó aon doiciméadacht a gheobhaidh na húdaráis phoiblí náisiúnta nó na comhlachtaí poiblí náisiúnta dá dtagraítear i mír 1 den Airteagal seo de bhun an Airteagail seo, déileálfar léi sin i gcomhréir leis na hoibleagáidí rúndachta a leagtar amach in Airteagal 78.