Airteagal 412 Ceanglas maidir le cumhdach leachtachta

Sealbhóidh institiúidí sócmhainní leachtacha, agus cumhdóidh suim luachanna na sócmhainní sin na heis-sreafaí leachtachta lúide na hinsreafaí leachtachta faoi dhálaí struis, ionas go n-áiritheofar go gcoinneoidh institiúidí leibhéil maolán leachtachta a bheidh leordhóthanach chun dul i ngleic le haon éagothroime a d'fhéadfadh a bheith idir insreafaí agus eis-sreafaí leachtachta faoi dhálaí mórstruis thar thréimhse tríocha lá. Le linn tréimhsí struis, féadfaidh institiúidí a gcuid sócmhainní leachtacha a úsáid chun a gcuid glan-eis-sreafaí leachtachta a chumhdach.

Ní dhéanfaidh institiúidí eis-sreabha leachtachta, insreabha leachtachta ná sócmhainní leachtacha a chomhaireamh faoi dhó.

Féadfaidh institiúidí na sócmhainní leachtacha dá dtagraítear i mír 1 a úsáid chun a gcuid oibleagáidí faoi dhálaí struis a chomhlíonadh mar atá sonraithe faoi Airteagal 414.

Beidh feidhm go heisiach ag na forálacha atá leagtha amach i dTeideal II chun oibleagáidí tuairiscithe a shonrú atá leagtha amach in Airteagal 415.

Beidh feidhm ag an ngníomh tarmligthe dá dtagraítear in Airteagal 460(1) maidir le hinstitiúidí.

Féadfaidh Ballstáit forálacha náisiúnta i réimse na gceanglas maidir le leachtacht a choinneáil ar bun nó a thabhairt isteach sula sonraítear íoschaighdeáin cheangailteacha i dtaca le ceanglais maidir le cumhdach leachtachta agus sula dtugtar isteach san Aontas ina n-iomláine iad i gcomhréir le hAirteagal 460. Féadfaidh Ballstáit nó údaráis inniúla a cheangal ar institiúidí atá údaraithe ar bhonn intíre, nó ar fhothacar de na hinstitiúidí sin, ceanglas níos airde maidr le cumhdach leachtachta suas le 100 % a choinneáil go dtí go dtabharfar isteach an t-íoschaighdeán ceangailteach ina iomláine de réir ráta 100 % i gcomhréir le hAirteagal 460.