15. Próiseas íocaíochta amach le haghaidh luach saothair inathraithe

Gan dochar d’fheidhmiú an tarscaoilte faoi Airteagal 32(4) de Threoir (AE) 2019/2034, ba cheart do ghnólachtaí infheistíochta cuid den luach saothair inathraithe a íoc láithreach agus cuid de a iarchur, agus, nuair is gá, in ionstraimí agus in airgead tirim i gcomhréir le hAirteagal 32 de Threoir (AE) 2019/2033. I gcás go n-íoctar méid ard luach saothair inathraithe in ionstraimí, ba cheart do ghnólachtaí infheistíochta a mheas an mbeadh feabhas ar an ailíniú riosca le próifíl riosca an ghnólachta infheistíochta nó na sócmhainní a bhainistíonn sé dá ndéanfaí meascán d’ionstraimí éagsúla a dhámhachtain. Sula n-íocfar an chuid iarchurtha d’airgead tirim nó dílsiú na n-ionstraimí iarchurtha, ba cheart athmheasúnú ar an bhfeidhmíocht agus, más gá, coigeartú riosca ex post a chur i bhfeidhm chun luach saothair inathraithe a ailíniú le rioscaí breise arna sainaithint nó arna réadú i ndiaidh na dámhachtana. Tá feidhm leis sin freisin i gcás go n-úsáidtear tréimhsí fabhraithe ilbhliantúla. EBA Public