5. Sonraíochtaí ginearálta maidir leis na sonraí tagarmharcála go léir atá le tuairisciú

Agus sonraí tagarmharcála á gcur isteach i gcomhréir le Roinn 3 agus le Roinn 4, ba cheart do ghnólachtaí infheistíochta agus d’údaráis inniúla na sonraíochtaí ginearálta agus cáilíochta sonraí a leagtar amach sa Roinn seo agus i Roinn 9 agus na sonraíochtaí breise a leagtar amach i Ranna 6, 7 agus 8 a chur i bhfeidhm.

Ba cheart sonraí tagarmharcála a chur isteach bunaithe ar fhigiúirí cuntasaíochta dheireadh na bliana in EUR. I gcás ina nochtar luach saothair in airgeadra seachas EUR, ba cheart an ráta malairte arna úsáid ag an gCoimisiún Eorpach don chlárú airgeadais agus an buiséad do mhí na Nollag na bliana tuairiscithe a úsáid chun na figiúirí comhdhlúite a bheidh le tuairisciú a chomhshói² .

² Soláthraíonn an ÚBE nasc chuig an bhfaisnéis ar a shuíomh Gréasáin mar aon leis na Treoirlínte seo; is féidir an ráta malairte a rochtain freisin faoi http://ec.europa.eu/budget/contracts_grants/info_contracts/inforeuro/inforeuro_en.cfm .

Ba cheart na méideanna go léir a thuairisciú mar mhéideanna iomlána, i.e. méideanna nach bhfuil slánaithe, in EUR (e.g. ba cheart EUR 1 234 567 a thuairisciú, in ionad EUR 1.2 milliún).

Ba cheart sonraí tagarmharcála don bhliain féilire inar tháinig deireadh leis an mbliain airgeadais a chur isteach sa bhliain féilire ina dhiaidh sin. Mar shampla, maidir leis an mbeart tagarmharcála don bhliain airgeadais dar críoch aon dáta sa bhliain ‘20bb’, cuirfear sonraí isteach sa bhliain ‘20bb+1’. Ba cheart leithdháileadh na méideanna ar na comhpháirteanna seasta agus athraitheacha den luach saothair a dhéanamh i gcomhréir le Roinn 7 de Threoirlínte an ÚBE maidir le beartais fhónta luach saothair faoi Threoir 2013/36/AE.