10. Creat rialaithe inmheánaigh a chur chun feidhme

Ba cheart don chomhlacht bainistíochta a bheith freagrach as leordhóthanacht agus éifeachtacht an chreata rialaithe inmheánaigh, na bpróiseas agus na sásraí a bhunú agus faireachán a dhéanamh orthu, agus as maoirseacht a dhéanamh ar gach líne ghnó agus ar gach aonad inmheánach, lena n-áirítear feidhmeanna rialaithe inmheánaigh (amhail comhlíonadh, bainistiú riosca agus feidhmeanna iniúchóireachta inmheánaí i gcás ina bhfuil siad bunaithe). Ba cheart d’eisitheoir ARTanna beartais, sásraí agus nósanna imeachta rialaithe inmheánaigh leordhóthanacha i scríbhinn a bhunú, a choinneáil ar bun agus a thabhairt cothrom le dáta go rialta, ar beartais, sásraí agus nósanna imeachta iad ba cheart don chomhlacht bainistíochta a fhormheas. I gcás nach mbunaítear aon fheidhm bainistíochta riosca, ba cheart don chomhlacht bainistíochta a bheith freagrach as nósanna imeachta agus beartais leordhóthanacha maidir le bainistiú riosca a bhunú, a thabhairt cothrom le dáta agus faireachán a dhéanamh orthu.

Ba cheart d’eisitheoir ARTanna próiseas cinnteoireachta soiléir, trédhearcach agus doiciméadaithe a bheith aige agus leithdháileadh soiléir freagrachtaí agus údaráis laistigh dá chreat rialaithe inmheánaigh, lena n-áirítear a línte gnó, a aonaid inmheánacha agus a fheidhmeanna rialaithe inmheánaigh.

Ba cheart d’eisitheoirí ARTanna na beartais, na sásraí agus na nósanna imeachta sin a chur in iúl don fhoireann ar fad agus gach uair a dhéantar athruithe ábhartha.

Ba cheart do na feidhmeanna rialaithe inmheánaigh a fhíorú go ndéantar na beartais, sásraí agus nósanna imeachta a leagtar amach sa chreat rialaithe inmheánaigh a chur chun feidhme i gceart ina réimsí inniúlachta faoi seach.

Ba cheart go gcuirfeadh feidhmeanna rialaithe inmheánaigh tuarascálacha i scríbhinn faoi bhráid an chomhlachta bainistíochta go rialta maidir le móreasnaimh a sainaithníodh. Ba cheart go n-áireofaí sna tuarascálacha sin, i gcás gach móreasnamh nua a shainaithneofar, na rioscaí ábhartha a bheidh i gceist, measúnú tionchair, moltaí agus bearta ceartaitheacha a bheidh le cur i gcrích. Ba cheart don chomhlacht bainistíochta obair leantach a dhéanamh ar thorthaí na bhfeidhmeanna rialaithe inmheánaigh ar bhealach tráthúil agus éifeachtach agus bearta ceartaitheacha leordhóthanacha a éileamh. Ba cheart nós imeachta leantach foirmiúil a bhunú maidir leis na torthaí agus na bearta ceartaitheacha a cuireadh i gcrích.