Teimpléad chun críocha Airteagal 17(1), pointe (b)(ii), agus Airteagal 18(2), pointe (e) de Rialachán (AE) 2023/1114

Institiúidí creidmheasa, agus daoine dlítheanacha agus gnóthais eile a bhfuil sé beartaithe acu ART a thairiscint don phobal nó a bhfuil ligean isteach chun a thrádála á iarraidh acu, ba cheart dóibh an teimpléad dá dtagraítear in Iarscríbhinn B a úsáid chun críocha na tuairime dlíthiúla maidir le cáiliú na cripteashócmhainne dá dtagraítear in Airteagal 17(1), pointe (b)(ii) agus Airteagal 18(2), pointe (e) de Rialachán (AE) 2023/1114.

Ba cheart gach réimse a leagtar amach sa teimpléad a chomhlánú leis an bhfaisnéis uile ba ghá chun míniú soiléir, cothrom, iomlán agus nach mbeadh míthreorach a thabhairt ar aicmiú na cripteashócmhainne. Ba cheart tagairt a dhéanamh don mhéid seo a leanas chun bonn eolais a chur faoin míniú ar aicmiú na cripteashócmhainne:

• a. foinse na sainmhínithe a cuireadh san áireamh i gcás gach táirge rialála dá dtagraítear sa teimpléad, lena n-áirítear dlí an Aontais agus an dlí náisiúnta is infheidhme;
• b. iomlán:
• i. chásdlí ábhartha Chúirt Bhreithiúnais an Aontais Eorpaigh agus na gcúirteanna náisiúnta;
• ii. na mbeart rialála, lena n-áirítear rialacha agus treoir, sa Bhallstát lena mbaineann;
• iii. na treorach léirmhínithí ón gCoimisiún Eorpach agus Treoirlínte ó na hÚdaráis Mhaoirseachta Eorpacha;
• iv. na treorach léirmhínithí ó údaráis inniúla nó aon fhoinse eile atá ábhartha maidir le léirmhíniú coincheap rialála.

Ba cheart do chomhairleoir dlí inmheánach nó seachtrach an teimpléad a chomhlánú. Ba cheart don chomhairleoir dlí a bheith in ann an tuairim a eisiúint ar bhealach oibiachtúil, saor ó choinbhleachtaí leasa nach féidir a bhainistiú go héifeachtach. Ba cheart fianaise a chur ar fáil maidir le cumas an chomhairleora dlí, mar chleachtas gairmiúil, tuairim dhlíthiúil a eisiúint. D’fhéadfaí a áireamh leis sin, de réir mar is infheidhme, dioplóma, teastas cleachtaidh, clárú leis an gcomhlacht gairmiúil ábhartha sa Bhallstát lena mbaineann.