Artikolu 54 Miżuri superviżorji għall-istabbilimenti ta' entitajiet marbutin b'obbligu u ċerti attivitajiet imwettqa bil-libertà li jiġu pprovduti servizzi

1.   Fil-każ tal-istabbilimenti ta' entitajiet marbutin b'obbligu li ma jikkwalifikawx bħala istituzzjonijiet ta' kreditu jew istituzzjonijiet finanzjarji jew tipi ta' infrastruttura ta' entitajiet marbutin b'obbligu li fuqhom is-superviżur tal-Istat Membru ospitanti jeżerċita setgħa skont l-Artikolu 38(1), għandhom japplikaw il-paragrafi 2 sa 5 ta' dan l-Artikolu.

2.   Meta s-superviżuri tal-Istat Membru ospitanti jidentifikaw ksur tar-rekwiżiti applikabbli, huma għandhom jitolbu lill-entitajiet marbutin b'obbligu li joperaw permezz tal-istabbilimenti jew it-tipi ta' infrastruttura kif imsemmi fil-paragrafu 1 biex jikkonformaw mar-rekwiżiti applikabbli u jinformaw lis-superviżuri tal-Istat Membru domiċiljari dwar il-ksur identifikat f'dawk l-entitajiet marbuta b'obbligu u dwar it-talba għall-konformità.

3.   Meta l-entitajiet marbutin b'obbligu jonqsu milli jieħdu l-azzjoni meħtieġa, is-superviżuri tal-Istat Membru ospitanti għandhom jinfurmaw lis-superviżuri tal-Istat Membru domiċiljari kif xieraq.

Is-superviżuri tal-Istat Membru domiċiljari għandhom jaġixxu minnufih u jieħdu l-miżuri xierqa kollha biex jiżguraw li l-entità marbuta b'obbligu kkonċernata tirrimedja l-ksur identifikat fl-istabbilimenti jew fit-tipi ta' infrastruttura tagħha fl-Istat Membru ospitanti. Is-superviżuri tal-Istat Membru domiċiljari għandhom jinfurmaw lis-superviżuri tal-Istat Membru ospitanti bi kwalunkwe azzjoni meħuda skont dan il-paragrafu.

4.   B'deroga mill-paragrafu 3, f'sitwazzjonijiet ta' ksur serju, ripetut jew sistematiku mill-entitajiet marbutin b'obbligu li joperaw permezz ta' stabbilimenti jew tipi oħra ta' infrastruttura fit-territorju tagħhom kif imsemmi fil-paragrafu 1 li jirrikjedu rimedji immedjati, is-superviżuri tal-Istat Membru ospitanti għandhom jitħallew jieħdu miżuri xierqa u proporzjonati, fuq inizjattiva tagħhom stess, biex jindirizzaw dak il-ksur. Dawk il-miżuri għandhom ikunu temporanji u jiġu tterminati meta jiġi indirizzat il-ksur identifikat, inkluż bl-assistenza jew f'kooperazzjoni mas-superviżuri tal-Istat Membru domiċiljari tal-entità marbuta b'obbligu.

L-Istati Membri għandhom jiżguraw li s-superviżuri tal-Istat Membru ospitanti jinformaw lis-superviżur tal-Istat Membru domiċiljari tal-entità marbuta b'obbligu immedjatament mal-identifikazzjoni tal-ksur serju, ripetut jew sistematiku u mat-teħid ta’ kwalunkwe miżura skont l-ewwel subparagrafu, sakemm ma jiġux meħuda miżuri f'kooperazzjoni mas-superviżuri tal-Istat Membru domiċiljari.

5.   Fejn is-superviżuri tal-Istati Membri domiċiljari u ospitanti ma jaqblux dwar il-miżuri li għandhom jittieħdu fir-rigward ta' entità marbuta b'obbligu, jistgħu jirreferu l-kwistjoni lill-AMLA u jitolbu l-għajnuna tagħha f'konformità mal-Artikoli 33 u 38 tar-Regolament (UE) 2024/1620. L-AMLA għandha tagħti l-opinjoni tagħha [dwar il-kwistjoni ta' nuqqas ta' qbil] fi żmien xahar.