Artikolu 17 Deċiżjonijiet konġunti

1.   Is-superviżuri tal-gruppi, l-awtoritajiet superviżorji, l-awtoritajiet ta' riżoluzzjoni fil-livell tal-grupp u l-awtoritajiet ta' riżoluzzjoni għandhom jagħmlu ħilithom sabiex jilħqu d-deċiżjonijiet konġunti msemmijin fl-Artikolu 8(2), fl-Artikolu 11(4) u fl-Artikolu 16(4), kif applikabbli, fi żmien erba' xhur mid-data ta':

Fuq talba ta' awtorità superviżorja jew ta' awtorità ta' riżoluzzjoni, l-EIOPA tista' tassisti lis-superviżuri tal-gruppi, lill-awtoritajiet superviżorji, lill-awtoritajiet ta' riżoluzzjoni fil-livell tal-grupp u lill-awtoritajiet ta' riżoluzzjoni sabiex jilħqu deċiżjoni konġunta f'konformità mal-Artikolu 31(2), il-punt (c), tar-Regolament (UE) Nru 1094/2010.

2.   Fin-nuqqas ta' deċiżjoni konġunta fil-perjodu msemmi fil-paragrafu 1, l-ewwel subparagrafu, il-kliem introduttorju, dwar kwalunkwe waħda mill-kwistjonijiet li ġejjin, is-superviżur tal-grupp jew l-awtorità ta' riżoluzzjoni fil-livell tal-grupp, kif applikabbli, għandhom jieħdu d-deċiżjoni tagħhom stess dwarhom;

Id-deċiżjoni meħuda mis-superviżur tal-grupp jew mill-awtorità ta' riżoluzzjoni fil-livell tal-grupp, kif applikabbli, għandha tkun motivata bis-sħiħ u għandha tqis il-fehmiet u r-riżervi ta' awtoritajiet superviżorji jew ta' awtoritajiet ta' riżoluzzjoni oħrajn, kif ikun applikabbli, espressi matul il-perjodu msemmi fil-paragrafu 1, l-ewwel subparagrafu, il-kliem introduttorju. Id-deċiżjoni għandha tiġi pprovduta lill-impriża omm apikali u lill-awtoritajiet l-oħrajn ikkonċernati.

3.   Fin-nuqqas ta' deċiżjoni konġunta fil-perjodu msemmi fil-paragrafu 1, l-ewwel subparagrafu, il-kliem introduttorju, bejn l-awtoritajiet superviżorji jew l-awtoritajiet ta' riżoluzzjoni dwar kwalunkwe waħda mill-kwistjonijiet li ġejjin, kull awtorità superviżorja jew awtorità ta' riżoluzzjoni ta' impriża sussidjarja, kif ikun applikabbli, għandha tieħu d-deċiżjoni tagħha stess dwarhom:

4.   Fin-nuqqas ta' deċiżjoni konġunta bejn l-awtoritajiet ta' riżoluzzjoni dwar l-adozzjoni tal-pjan ta' riżoluzzjoni ta' grupp, kif imsemmi fl-Artikolu 11(4), fil-perjodu msemmi fil-paragrafu 1, l-ewwel subparagrafu, il-kliem introduttorju, ta’ dan l-Artikolu, kull awtorità ta' riżoluzzjoni responsabbli għal impriża sussidjarja għandha tieħu d-deċiżjoni tagħha stess u għandha tfassal u żżomm aġġornat pjan ta' riżoluzzjoni għall-entitajiet taħt il-ġuriżdizzjoni tagħha. Kull awtorità ta' riżoluzzjoni għandha tinnotifika d-deċiżjoni tagħha lill-membri l-oħrajn tal-kulleġġ ta' riżoluzzjoni.

5.   Kull waħda mid-deċiżjonijiet tal-awtoritajiet superviżorji jew ta' riżoluzzjoni f'konformità mal-paragrafi 3 jew 4 għandha tkun motivata bis-sħiħ u għandha tqis il-fehmiet u r-riżervi tal-awtoritajiet superviżorji l-oħrajn, tal-awtoritajiet ta' riżoluzzjoni, tas-superviżuri tal-grupp jew tal-awtoritajiet ta’ riżoluzzjoni fil-livell tal-grupp, kif ikun applikabbli.

6.   L-awtoritajiet superviżorji jew l-awtoritajiet ta' riżoluzzjoni li ma jaqblux ma' deċiżjoni kif imsemmi fil-paragrafi 3 u 4 jistgħu jilħqu deċiżjoni konġunta dwar pjan ta' rkupru preventiv ta' grupp jew pjan ta' riżoluzzjoni ta' grupp li jkopri l-entitajiet fi grupp taħt il-ġuriżdizzjonijiet tagħhom.

7.   Fejn, sa tmiem il-perjodu msemmi fil-paragrafu 1, l-ewwel subparagrafu, il-kliem introduttorju, kwalunkwe waħda mill-awtoritajiet superviżorji jew mill-awtoritajiet ta' riżoluzzjoni kkonċernati tkun irreferiet kwistjoni lill-EIOPA f'konformità mal-Artikolu 19 tar-Regolament (UE) Nru 1094/2010, is-superviżur tal-grupp, l-awtorità ta' riżoluzzjoni fil-livell tal-grupp, l-awtorità superviżorja jew l-awtorità ta' riżoluzzjoni kkonċernata, kif ikun applikabbli, għandha tiddifferixxi d-deċiżjoni tagħha skont il-paragrafi 2, 3 u 4 ta' dan l-Artikolu, tistenna kwalunkwe deċiżjoni li l-EIOPA tista' tieħu f'konformità mal-Artikolu 19(3) ta' dak ir-Regolament, u tieħu d-deċiżjoni tagħha f'konformità mad-deċiżjoni tal-EIOPA. Il-perjodu msemmi fil-paragrafu 1, l-ewwel subparagrafu, il-kliem introduttorju, ta’ dan l-Artikolu għandu jitqies bħala l-fażi ta' konċiljazzjoni kif imsemmi fl-Artikolu 19(2) ta' dak ir-Regolament. L-EIOPA għandha tieħu d-deċiżjoni tagħha fi żmien xahar. Il-kwistjoni ma għandhiex tiġi riferuta lill-EIOPA wara t-tmiem tal-perjodu msemmi fil-paragrafu 1, l-ewwel subparagrafu, il-kliem introduttorju, jew wara li tkun ittieħdet deċiżjoni konġunta. Fin-nuqqas ta' deċiżjoni tal-EIOPA fi żmien xahar wara li jkun sar ir-riferiment lill-EIOPA, għandha tapplika d-deċiżjoni tas-superviżur tal-grupp, tal-awtorità ta' riżoluzzjoni fil-livell tal-grupp, tal-awtorità superviżorja jew tal-awtorità ta' riżoluzzjoni għall-grupp jew għall-impriża sussidjarja f'livell individwali, kif applikabbli.

8.   Id-deċiżjonijiet konġunti msemmija fl-Artikolu 8(2), fl-Artikolu 11(4), fl-Artikolu 16(4) u fil-paragrafu 6 ta' dan l-Artikolu u d-deċiżjonijiet imsemmijin fil-paragrafi 2, 3 u 4 ta' dan l-Artikolu għandhom jiġu rrikonoxxuti bħala konklużivi u għandhom jiġu applikati mill-awtoritajiet superviżorji jew mill-awtoritajiet ta' riżoluzzjoni fl-Istati Membri kkonċernati.

9.   Fejn jittieħdu deċiżjonijiet konġunti skont l-Artikolu 11(4) u, fir-rigward tal-pjanijiet ta' riżoluzzjoni ta' grupp, il-paragrafu 6 ta' dan l-Artikolu u fejn awtorità ta' riżoluzzjoni tivvaluta li s-suġġett ta' nuqqas ta' qbil dwar il-pjanijiet ta' riżoluzzjoni ta' grupp jaffettwa r-responsabbiltajiet fiskali tal-Istat Membru tagħha, l-awtorità ta' riżoluzzjoni fil-livell tal-grupp għandha tibda rivalutazzjoni tal-pjan ta' riżoluzzjoni ta' grupp.