Il-Kummissjoni għandha s-setgħa li tadotta att ta' implimentazzjoni biex tistabbilixxi lista ta' metaboliti tal-pestiċidi li jistgħu jinsabu fl-ilma ta' taħt l-art u li għalihom tkun twettqet valutazzjoni tar-rilevanza tagħhom fl-Unjoni, li tindika jekk humiex rilevanti jew le, sal-11 ta’ Mejju 2028. Il-lista ma għandhiex tinkludi metaboliti vvalutati li mhumiex ta' tħassib. Il-lista għandha tkun ibbażata fuq data ġġenerata matul il-proċess għall-approvazzjoni tas-sustanzi attivi skont ir-Regolament (KE) Nru 1107/2009 tal-Parlament Ewropew u tal-Kunsill (
1
) u r-Regolament (UE) Nru 528/2012 tal-Parlament Ewropew u tal-Kunsill (
2
) u l-output xjentifiku assoċjat mill-Awtorità Ewropea dwar is-Sigurtà fl-Ikel (EFSA) u l-Aġenzija Ewropea għas-Sustanzi Kimiċi (ECHA), u, jekk disponibbli, data xjentifika ġdida dwar metaboliti eżistenti jew metaboliti li għadhom kif ġew skoperti u li qabel ma kinux identifikati. Il-Kummissjoni għandha tadotta att ta' implimentazzjoni biex taġġorna l-lista mill-inqas kull sitt snin. L-atti ta' implimentazzjoni msemmija f'dan il-paragrafu għandhom ikunu adottati skont il-proċedura ta' eżami msemmija fl-Artikolu 9(2) ta' din id-Direttiva.