Artikolu 5 2

2.   Kull awtorità superviżorja nazzjonali għandha, f’kooperazzjoni mal-awtorità kompetenti nazzjonali, u mingħajr preġudizzju għall-Artikolu 4(5), twettaq l-attivitajiet ta’ monitoraġġ meħtieġa, inkluż, kif xieraq spezzjonijiet u awditi, biex tiġi identifikata nonkonformità possibbli minn entitajiet soġġetti għas-sorveljanza tagħha skont dan ir-Regolament mar-rekwiżiti stipulati f’dan ir-Regolament u fl-atti ta’ implimentazzjoni adottati abbażi tiegħu.

Mingħajr preġudizzju għall-Artikolu 5(1), it-tieni subparagrafu, ta’ dan ir-Regolament, l-awtorità superviżorja nazzjonali għandha tipprovdi lill-awtorità kompetenti nazzjonali bil-valutazzjoni tagħha tal-konformità mill-fornitur tas-servizzi tan-navigazzjoni bl-ajru mar-rekwiżiti elenkati fil-punt 7 tal-Anness VIII tar-Regolament (UE) 2018/1139 dwar ir-robustezza finanzjarja, ir-responsabbiltà, il-kopertura tal-assigurazzjoni, is-sjieda u l-istruttura organizzazzjonali. Dik il-valutazzjoni għandha, fejn xieraq, tinkludi rakkomandazzjoni għall-emendar, il-limitazzjoni, is-sospensjoni jew ir-revoka taċ-ċertifikat skont l-Artikolu 41 tar-Regolament (UE) 2018/1139.

Fil-każ ta’ nonkonformità minn entitajiet soġġetti għas-sorveljanza tagħhom skont dan ir-Regolament ma’ rekwiżiti oħra stipulati f’dan ir-Regolament, l-awtorità superviżorja nazzjonali għandha tinforza l-miżuri korrettivi meħtieġa.

Il-fornituri tas-servizzi tan-navigazzjoni bl-ajru, l-operaturi tal-ajruport u l-fornituri tas-CIS ikkonċernati għandhom jikkonformaw kwalunkwe miżura ta’ infurzar meħuda mill-awtoritajiet superviżorji nazzjonali f’dak il-kuntest.