Artikolu 16 Proċeduri u funzjonament tal-PRB

1.   Il-PRB għandu jiddeċiedi b’maġġoranza sempliċi tal-membri tiegħu, filwaqt li jimmira li jikseb kunsens. Kull membru inkluż il-president, għandu jkollu vot wieħed.

2.   Il-PRB għandu jadotta r-regoli ta’ proċedura tiegħu stess u jistabbilixxi l-arranġamenti ta’ ħidma tiegħu, f’konformità mar-regoli interni tal-Kummissjoni għall-gruppi ta’ esperti.

3.   Il-Kummissjoni tista’ tattendi, mingħajr id-dritt tal-vot, il-laqgħat tal-PRB, bl-eċċezzjoni tad-deliberazzjonijiet finali tal-PRB għall-adozzjoni tal-opinjonijiet, ir-rakkomandazzjonijiet, ir-rapporti u l-materjal ta’ gwida tiegħu. Il-partijiet ikkonċernati rilevanti msemmija fl-Artikolu 49(3) jistgħu jiġu mistiedna, mingħajr id-dritt tal-vot, għal-laqgħat tal-PRB, bl-eċċezzjoni tad-deliberazzjonijiet finali tal-PRB għall-adozzjoni tal-opinjonijiet, ir-rakkomandazzjonijiet, ir-rapporti u l-materjal ta’ gwida tiegħu, fuq bażi ad hoc.

4.   Il-PRB għandu jaħdem abbażi ta’ programm ta’ ħidma annwali stabbilit mill-PRB f’konformità mal-prijoritajiet tal-Kummissjoni. Dak il-programm ta’ ħidma għandu jirrispetta bis-sħiħ ir-rwol tal-PRB stabbilit fl-Artikolu 13(2) u jinkludi l-attivitajiet kollha, fi ħdan il-baġit disponibbli, meħtieġa biex jassistu lill-Kummissjoni fir-rigward tal-kompiti tal-Kummissjoni msemmija fl-Artikolu 13(2), inkluż sabiex il-Kummissjoni tkun tista’ tirrispetta l-perjodi ta’ żmien meħtieġa biex timplimenta l-kompiti tagħha. Il-PRB għandu jadotta l-programm ta’ ħidma wara li jikkonsulta lill-Kummissjoni. Il-PRB għandu jipprovdi rapport annwali għall-pubblikazzjoni mill-Kummissjoni. Il-programm ta’ ħidma annwali u r-rapport annwali għandhom jiġu pprovduti mill-Kummissjoni lill-Istati Membri. Ir-rapport annwali għandu jkopri l-attivitajiet kollha tal-PRB u jkun fih informazzjoni dwar il-kostijiet tal-PRB.

5.   Il-Kummissjoni għandha tagħti aċċess lill-PRB għall-informazzjoni rilevanti kollha għall-eżekuzzjoni tar-rwol konsultattiv tiegħu.

6.   Il-Kummissjoni għandha timmonitorja l-funzjonament tal-PRB u l-konformità tiegħu ma’ dan ir-Regolament u tinforma regolarment lill-Istati Membri dwar il-progress tal-ħidma tal-PRB.