Artikolu 59 Proċedura ta' salvagwardja tal-Unjoni

1.   Meta, wara li tkun tlestiet il-proċedura stipulata fl-Artikolu 58(5) u (6), jitqajmu oġġezzjonijiet kontra miżura nazzjonali meħuda minn Stat Membru skont l-Artikolu 58, jew meta l-Kummissjoni tqis li miżura nazzjonali tikser il-liġi tal-Unjoni, il-Kummissjoni għandha, mingħajr dewmien, tidħol f'konsultazzjoni mal-Istati Membri u mal-operatur ekonomiku rilevanti u għandha tevalwa l-miżura nazzjonali. Abbażi tar-riżultati ta' dik l-evalwazzjoni, il-Kummissjoni għandha tadotta att ta’ implimentazzjoni li jiddetermina jekk il-miżura nazzjonali hijiex ġġustifikata.

Dak l-att ta' implimentazzjoni għandu jiġi adottat f'konformità mal-proċedura ta' eżami msemmija fl-Artikolu 65(2).

2.   Il-Kummissjoni għandha tindirizza l-att ta’ implimentazzjoni msemmi fil-paragrafu 1 lill-Istati Membri kollha u għandha tikkomunikaha lilhom u lill-operatur ekonomiku rilevanti mingħajr dewmien.

Jekk il-miżura nazzjonali titqies li hija ġustifikata, l-Istati Membri kollha għandhom jieħdu l-miżuri meħtieġa biex jiżguraw li l-imballaġġ mhux konformi jiġi rtirat mis-swieq tagħhom, u għandhom jinformaw lill-Kummissjoni kif xieraq.

Jekk il-miżura nazzjonali titqies li ma tkunx ġustifikata, l-Istat Membru kkonċernat għandu jirtira dik il-miżura.

3.   Meta l-miżura nazzjonali titqies ġustifikata u n-nuqqas ta' konformità tal-imballaġġ jiġi attribwit għal nuqqasijiet fl-istandards armonizzati msemmija fl-Artikolu 36 ta' dan ir-Regolament, il-Kummissjoni għandha tapplika l-proċedura prevista fl-Artikolu 11 tar-Regolament (UE) Nru 1025/2012.

4.   Meta l-miżura nazzjonali titqies ġustifikata u n-nuqqas ta' konformità tal-imballaġġ jiġi attribwit għan-nuqqasijiet fl-ispeċifikazzjonijiet tekniċi komuni msemmija fl-Artikolu 37, il-Kummissjoni għandha, mingħajr dewmien, temenda jew tħassar l-ispeċifikazzjonijiet tekniċi komuni kkonċernati.