Artikolu 9 Azzjonijiet eliġibbli u regoli għall-parteċipazzjoni u d-disseminazzjoni tar-riżultati tar-riċerka

1.   Għall-finanzjament huma eliġibbli biss l-azzjonijiet li jimplimentaw l-objettivi msemmija fl-Artikolu 3.

2.   Soġġett għall-paragrafi 3 u 4 ta’ dan l-Artikolu, it-Titolu II dwar ir-regoli għall-parteċipazzjoni u d-disseminazzjoni tar-Regolament (UE) 2021/695 japplika għall-azzjonijiet appoġġati permezz tal-Programm Euratom 2026-2027. Ir-referenzi fir-Regolament (UE) 2021/695 għall-Unjoni u għal Orizzont Ewropa għandhom jinftiehmu bħala referenzi għall-Komunità u għall-Programm Euratom 2026-2027, meta xieraq. Ir-referenzi fir-Regolament (UE) 2021/695 għal “regoli tas-sigurtà” għandhom jinftiehmu li jinkludu l-interessi tad-difiża tal-Istati Membri skont it-tifsira tal-Artikolu 24 tat-Trattat Euratom.

3.   B’deroga mill-Artikolu 40(4) tar-Regolament (UE) 2021/695, id-dritt ta’ oġġezzjoni għat-trasferimenti tas-sjieda tar-riżultati, jew għall-għotjiet ta’ liċenzja esklużiva fir-rigward tar-riżultati, jista’ jiġi estiż għall-għotjiet tal-liċenzji mhux esklużivi.

4.   B’deroga mill-Artikolu 41(9) tar-Regolament (UE) 2021/695, benefiċjarju li jkun irċieva finanzjament tal-Komunità għandu jagħti aċċess għar-riżultati tiegħu mingħajr royalties lill-istituzzjonijiet tal-Komunità, lill-korpi tal-finanzjament jew lill-Impriża Konġunta Ewropea għall-ITER u l-Iżvilupp tal-Enerġija mill-Fużjoni (Enerġija mill-Fużjoni) stabbilita bid-Deċiżjoni 2007/198/Euratom (l-“Impriża Konġunta tal-Enerġija mill-Fużjoni”), għall-fini tal-iżvilupp, l-implimentazzjoni u l-monitoraġġ tal-politiki u tal-programmi tal-Komunità jew l-obbligi skont il-kooperazzjoni internazzjonali ma’ pajjiżi terzi u organizzazzjonijiet internazzjonali. Dawn id-drittijiet ta’ aċċess għandhom jinkludu d-dritt li partijiet terzi jiġu awtorizzati jużaw ir-riżultati fl-akkwist pubbliku u d-dritt ta’ sottoliċenzjar. Id-drittijiet tal-aċċess għandhom ikunu limitati għall-użu mhux kummerċjali u mhux kompetittiv.

5.   Il-mekkaniżmu ta’ assigurazzjoni mutwa stabbilit skont ir-Regolament (UE) 2021/695 għandu jkopri r-riskju assoċjat man-nuqqas ta’ rkupru tas-somom dovuti mill-benefiċjarji lill-Kummissjoni jew lill-korpi tal-finanzjament skont dan ir-Regolament.