ANNESS V Għanijiet tal-kwalità tad- data

(a)

il-kejl kollu li jsir fir-rigward tal-valutazzjoni tal-kwalità tal-arja ambjentali skont l-Artikolu 8 jkun traċċabbli f’konformità mar-rekwiżiti stabbiliti fl-istandard armonizzat għal-laboratorji ta’ ttestjar u kkalibrar;

(b)

l-istituzzjonijiet li jħaddmu n-networks u l-punti ta’ kampjunar individwali jkollhom sistema stabbilita ta’ assigurazzjoni tal-kwalità u ta’ kontroll tal-kwalità li taħseb għal manutenzjoni regolari u kontrolli tekniċi biex tiżgura l-preċiżjoni kontinwa tal-apparat ta’ kejl u li jibqgħu operazzjonali. is-sistema tal-kwalità għandha tiġi riveduta kif meħtieġ u għall-inqas kull ħames snin mil-laboratorju ta’ referenza nazzjonali rilevanti;

(c)

ikun stabbilit proċess ta’ assigurazzjoni tal-kwalità/kontroll tal-kwalità fir-rigward tal-proċess tal-ġbir u r-rapportar tad-data u li l-organizzazzjonijiet maħtura għal dan il-kompitu jipparteċipaw b’mod attiv fil-programmi rispettivi ta’ assigurazzjoni tal-kwalità madwar l-Unjoni kollha;

(d)

il-laboratorji nazzjonali ta’ referenza jiġu maħtura mill-awtorità kompetenti xierqa jew minn korp maħtur skont l-Artikolu 5 ta’ din id-Direttiva u jkunu akkreditati għall-metodi ta’ referenza msemmija fl-Anness VI ta’ din id-Direttiva, għall-inqas għal dawk is-sustanzi niġġiesa li għalihom il-konċentrazzjonijiet huma ogħla mil-livell limitu ta’ valutazzjoni, skont l-istandard armonizzat rilevanti għal-laboratorji tal-ittestjar u l-ikkalibrar, li r-referenza għalih ġiet ippubblikata f’Il-Ġurnal Uffiċjali tal-Unjoni Ewropea skont l-Artikolu 2, il-punt 9, tar-Regolament (KE) Nru 765/2008 tal-Parlament Ewropew u tal-Kunsill (6) li jistabbilixxi r-rekwiżiti għall-akkreditament u għas-sorveljanza tas-suq. dawn il-laboratorji għandhom ikunu responsabbli wkoll mill-koordinazzjoni fit-territorju tal-Istati Membri tal-programmi ta’ assigurazzjoni tal-kwalità madwar l-Unjoni kollha li għandhom ikunu organizzati miċ-Ċentru Konġunt tar-Riċerka tal-Kummissjoni (JRC) u għandhom ikunu wkoll responsabbli biex jikkoordinaw, fil-livell nazzjonali, l-użu adegwat tal-metodi ta’ referenza u t-turija tal-ekwivalenza tal-metodi li mhumiex ta’ referenza; il-laboratorji ta’ referenza nazzjonali li jorganizzaw paragun bejn il-laboratorji fil-livell nazzjonali għandhom ukoll ikunu akkreditati skont l-istandard armonizzat rilevanti għall-ittestjar tal-profiċjenza;

(e)

il-laboratorji ta’ referenza nazzjonali jieħdu sehem, mill-inqas kull 3 snin, fil-programmi ta’ assigurazzjoni tal-kwalità madwar l-Unjoni kollha organizzati mill-JRC għal mill-inqas dawk is-sustanzi niġġiesa li għalihom il-konċentrazzjonijiet ikunu ogħla mil-livell limitu ta’ valutazzjoni; hija rrakkomandata l-parteċipazzjoni għal sustanzi niġġiesa oħra; jekk din il-parteċipazzjoni tipproduċi riżultati mhux sodisfaċenti, il-laboratorju nazzjonali għandu juri, meta jieħu sehem fil-paragun bejn il-laboratorji li jkun imiss, miżuri ta’ rimedju sodisfaċenti, u jipprovdi rapport lill-JRC dwar dawn il-miżuri;

(f)

il-laboratorji nazzjonali ta’ referenza jappoġġaw ix-xogħol magħmul min-Network Ewropew ta’ Laboratorji Nazzjonali ta’ Referenza stabbiliti mill-JRC;

(g)

in-network Ewropew tal-Laboratorji ta’ Referenza Nazzjonali jkun responsabbli għar-rieżami perjodiku, mill-inqas kull 5 snin, tal-inċertezzi tal-kejl tal-kejl fiss u tal-kejl indikattiv elenkati fil-Punt A, it-Tabelli 1 u 2, ta’ dan l-Anness u l-proposta sussegwenti ta’ kwalunkwe bidla meħtieġa lill-Kummissjoni.