IARSCRÍBHINN V Cuspóirí cáilíochta sonraí

(a)

go mbeidh gach tomhas a dhéanfar i dtaca le measúnú ar aercháilíocht chomhthimpeallach de bhun Airteagal 8 inrianaithe i gcomhréir leis na ceanglais a leagtar síos sa chaighdeán comhchuibhithe maidir le saotharlanna tástála agus calabrúcháin;

(b)

go mbeidh córas seanbhunaithe dearbhaithe cáilíochta agus rialaithe cáilíochta ag na hinstitiúidí a oibríonn líonraí agus pointí samplála aonair, córas lena bhforáiltear do chothabháil rialta agus seiceálacha teicniúla chun cruinneas leanúnach na bhfeistí tomhais a áirithiú agus chun go leanfaidh siad de bheith oibríochtúil; déanfaidh an tsaotharlann náisiúnta tagartha ábhartha athbhreithniú ar an gcóras cáilíochta de réir mar is gá agus gach 5 bliana ar a laghad;

(c)

go gcuirfear próiseas dearbhaithe cáilíochta/rialaithe cáilíochta ar bun don phróiseas bailiúcháin sonraí agus tuairiscithe agus go nglacfaidh na heagraíochtaí a cheapfar don chúram sin páirt ghníomhach sna cláir bhainteacha dearbhaithe cáilíochta ar fud an Aontais;

(d)

gurb é an t-údarás nó an comhlacht inniúil iomchuí de bhun Airteagal 5 den Treoir seo a cheapann na saotharlanna náisiúnta tagartha agus go bhfuil siad creidiúnaithe le haghaidh na modhanna tagartha dá dtagraítear in Iarscríbhinn VI a ghabhann leis an Treoir seo, ar a laghad i gcás na dtruailleán sin ar ina leith atá na leibhéil tiúchana os cionn na tairsí measúnaithe, de réir an chaighdeáin chomhchuibhithe ábhartha maidir le saotharlanna tástála agus calabrúcháin, caighdeán ar foilsíodh an tagairt dó in Iris Oifigiúil an Aontais Eorpaigh de bhun Airteagal 2, pointe 9, de Rialachán (CE) Uimh. 765/2008 ó Pharlaimint na hEorpa agus ón gComhairle (6) lena leagtar amach na ceanglais maidir le creidiúnú agus faireachas margaidh; beidh na saotharlanna sin freagrach freisin as an gcomhordú ar chríoch na mBallstát de na cláir dearbhaithe cáilíochta ar fud an Aontais a eagróidh Airmheán Comhpháirteach Taighde an Choimisiúin (JRC) agus beidh siad freagrach as comhordú a dhéanamh freisin, ar an leibhéal náisiúnta, ar úsáid iomchuí modhanna tagartha agus ar léiriú coibhéise modhanna neamhthagartha; déanfar saotharlanna náisiúnta tagartha a eagraíonn idirchomparáid ar an leibhéal náisiúnta a chreidiúnú freisin de réir an chaighdeáin chomhchuibhithe ábhartha maidir le tástáil inniúlachta;

(e)

go nglacfaidh na saotharlanna náisiúnta tagartha páirt gach 3 bliana ar a laghad sna cláir dearbhaithe cáilíochta ar fud an Aontais a eagraíonn JRC ar a laghad le haghaidh na dtruailleán sin a bhfuil leibhéil a dtiúchana os cionn na tairsí measúnaithe; moltar rannpháirtíocht i gcás truailleáin eile; má thagann torthaí míshásúla as an rannpháirtíocht sin, léireoidh an tsaotharlann náisiúnta bearta feabhais sásúla an chéad uair eile a ghlacann sé páirt san idirchomparáid, agus tuarascáil a chur ar fáil do JRC maidir leis na bearta sin;

(f)

go dtacóidh na saotharlanna náisiúnta tagartha leis an obair atá déanta ag an líonra Eorpach de Shaotharlanna Náisiúnta Tagartha a bhunaigh JRC;

(g)

go mbeidh an líonra Eorpach de Shaotharlanna Náisiúnta Tagartha freagrach as athbhreithniú tréimhsiúil a dhéanamh, gach 5 bliana ar a laghad, ar na neamhchinnteachtaí tomhais na dtomhas seasta agus na dtomhas táscach a liostaítear i bPointe A, Táblaí 1 agus 2, den Iarscríbhinn seo agus as aon athrú is gá a dhéanamh a mholadh ina dhiaidh sin don Choimisiún.