4.1. Arranġamenti ta’ governanza

Ċerti elementi oġġettivi għandhom jindikaw li istituzzjoni għandha dgħjufijiet serji fl-arranġamenti ta’ governanza tagħha li jistgħu, f’ħafna każijiet flimkien ma’ elementi oġġettivi oħrajn relatati mal-kapital u l-likwidità, jiġġustifikaw l-irtirar tal-awtorizzazzjoni. Fost l-oħrajn, dawn l-elementi jinkludu:

• a. dikjarazzjonijiet żbaljati sinifikanti fir-rappurtar regolatorju jew fir-rendikonti finanzjarji li jirriżultaw, b’mod partikolari, f’rifjut ta’ opinjoni jew l-għoti ta’ opinjoni kkwalifikata mill-awditur estern;
• b. imblokk fit-tul fil-korp maniġerjali tal-istituzzjoni, li jwassal għan-nuqqas ta’ abbiltà tagħha li tieħu deċiżjonijiet kritiċi;
• c. akkumulazzjoni ta’ nuqqasijiet materjali f’oqsma ewlenin tal-arranġamenti ta’ governanza, li flimkien iħallu impatt prudenzjali negattiv materjali fuq l-istituzzjoni.

Għall-finijiet tal-paragrafu 28(c), eżempji ta’ tali nuqqasijiet materjali, li flimkien jistgħu jħallu impatt prudenzjali negattiv materjali fuq l-istituzzjoni, jistgħu jinkludu:

• - ippjanar strateġiku inadegwat u formalizzazzjoni tat-tolleranza/predispożizzjoni għar-riskju u l-qafas għall-ġestjoni tar-riskju, li jwasslu għan-nuqqas ta’ abbiltà tal-identifikazzjoni, tal-ġestjoni u tar-rappurtar tar-riskji li l-istituzzjoni hija jew tista’ tkun esposta għalihom;
• - dgħjufijiet, nuqqasijiet jew kwistjonijiet materjali li ma ġewx irrappurtati kif suppost u/jew b’mod f’waqtu lill-korp maniġerjali;
• - mekkaniżmi inadegwati ta’ kontroll intern;
• - deprezzament kbir tar-reputazzjoni li jirriżulta min-nuqqas ta’ konformità ma’ kriterji ‘kompetenti u idonei’ ta’ individwi b’funzjonijiet ewlenin fl-istituzzjoni;
• - deprezzament kbir tar-reputazzjoni li jirriżulta minn nuqqas ta’ trasparenza fit-twettiq tan-negozju u tal-operazzjonijiet jew divulgazzjoni inkompleta/impreċiża ta’ informazzjoni;
• - litigazzjoni jew tilwimiet kbar fin-nomina u s-suċċessjoni ta’ individwi li jwettqu funzjonijiet ewlenin fl-istituzzjoni;
• - nuqqas ta’ konformità maġġuri mar-rekwiżiti tar-rimunerazzjoni.