Trasferiment sinifikanti tar-riskju

Meta tranżazzjoni tiġi evalwata skont l-Artikolu 248 tar-Regolament (UE) Nru 575/2013, kwalunkwe valutazzjoni dwar jekk il-kundizzjonijiet għat-trasferiment sinifikanti tar-riskju kif stabbilit fl-Artikolu 243 jew, skont il-każ, fl-Artikolu 244 ta’ dak ir-Regolament jibqgħux jiġu sodisfatti, għandha titwettaq skont dawn il-linji gwida u l-linji gwida EBA/GL/2014/05 dwar trasferiment sinifikanti tar-riskju.

Tranżazzjoni għandha titqies li tinvalida l-kundizzjonijiet għat-trasferiment sinifikanti tar-riskju jekk, bħala riżultat tat-tranżazzjoni, it-tnaqqis fl-ammonti tal-iskopertura ponderat għar-riskju li l-istituzzjoni oriġinatriċi kisbet inizjalment, ma jibqax jiġi ġġustifikat permezz ta’ trasferiment korrispondenti ta’ riskju tal-kreditu lill-partijiet terzi. Il-fatturi li għandhom jiġu kkunsidrati għandhom jinkludu:

• (a) ir-riskju ta’ kreditu tal-istituzzjoni oriġinatriċi wara li twettaq it-tranżazzjoni; u
• (b) il-limitu safejn il-pożizzjoni kapitali jew tal-likwidità tal-istituzzjoni oriġinatriċi hija affettwata mit-tranżazzjoni.