Airteagal 64 Comhar i ndáil le hinstitiúidí creidmheasa nó institiúidí airgeadais

1.   Maidir le maoirseoirí airgeadais, FIUnna, agus údaráis atá inniúil ar mhaoirseacht a dhéanamh ar institiúidí creidmheasa nó institiúidí airgeadais faoi ghníomhartha dlí eile de chuid an Aontais, áiritheoidh na Ballstáit go n-oibreoidh siad i ndlúthchomhar le chéile laistigh dá n-inniúlachtaí faoi seach agus go soláthróidh siad faisnéis dá chéile a bheidh ábhartha chun a gcúraimí faoi seach a chomhlíonadh. Ní chuirfidh an comhar agus an malartú faisnéise sin isteach ar aon fhiosrúchán, anailísiú de chuid FIU, imscrúdú nó imeachtaí atá ar siúl i gcomhréir le dlí coiriúil nó riaracháin an Bhallstáit ina bhfuil an maoirseoir airgeadais nó an t-údarás airgeadais lonnaithe ar cuireadh inniúlachtaí de chúram orthu maoirseacht a dhéanamh ar institiúidí creidmheasa nó institiúidí airgeadais faoi ghníomhartha dlí eile, agus ní dhéanfaidh siad difear do cheanglais rúndachta gairmiúla dá bhforáiltear in Airteagal 67(1).

2.   I gcás ina sainaithníonn maoirseoirí airgeadais laigí i gcóras rialaithe inmheánaigh AML/CFT agus sa chaoi a bhfuil cheanglais Rialachán (AE) 2024/1624 á gcur i bhfeidhm ag institiúid creidmheasa, ar laigí iad lena ndéantar méadú ábharach ar na rioscaí a bhfuil nó a bhféadfadh an institiúid a bheith neamhchosanta orthu, áiritheoidh na Ballstáit go dtabharfaidh an maoirseoir airgeadais fógra láithreach don Údarás Baincéireachta Eorpach (ÚBE) agus don údarás nó don chomhlacht a dhéanann maoirseacht ar an institiúid creidmheasa i gcomhréir le Treoir 2013/36/AE, lena n-áirítear BCE ag gníomhú dó i gcomhréir le Rialachán (AE) Uimh. 1024/2013 ón gComhairle.

I gcás ina bhféadfadh méadú teacht ar riosca, beidh na maoirseoirí airgeadais in ann dul i gcomhar agus faisnéis a chomhroinnt leis na húdaráis a dhéanann maoirseacht ar an institiúid i gcomhréir le Treoir 2013/36/AE agus measúnú coiteann a tharraingt suas, a bheidh le cur in iúl do ÚBE ag an maoirseoir a sheol an fógra ar dtús. Déanfar AMLA a choinneáil ar an eolas faoi aon fhógra den sórt sin.

3.   I gcás ina bhfeiceann maoirseoirí airgeadais gur dhiúltaigh institiúid creidmheasa gaolmhaireacht gnó a bhunú nó gur chinn sí gaolmhaireacht gnó a fhoirceannadh ach nach dtugtar údar leis an diúltú sin leis an dícheall cuí do chustaiméirí arna dhoiciméadú de bhun Airteagal 21(3) de Rialachán (AE) 2024/1624, áiritheoidh na Ballstáit go gcuirfidh siad an t-údarás atá freagrach as a áirithiú go gcomhlíonfaidh an institiúid creidmheasa sin Treoracha 2014/92/AE nó (AE) 2015/2366 ar an eolas.

4.   Áiritheoidh na Ballstáit go n-oibreoidh maoirseoirí airgeadais i gcomhar le húdaráis réitigh mar a shainmhínítear in Airteagal 2(1), pointe (18), de Threoir 2014/59/AE nó le húdaráis ainmnithe mar a shainmhínítear in Airteagal 2(1), pointe (18), de Threoir 2014/49/AE.

Cuirfidh maoirseoirí airgeadais na húdaráis dá dtagraítear sa chéad fhomhír ar an eolas i gcás ina sainaithníonn siad, le linn dóibh a ngníomhaíochtaí maoirseachta a fheidhmiú, ar fhorais AML/CFT, aon cheann de na cásanna seo a leanas:

Arna iarraidh sin do na húdaráis dá dtagraítear sa chéad fhomhír den mhír seo, i gcás inar mó an dóchúlacht nach mbeidh taiscí ar fáil nó inarb ann do riosca go measfar go bhfuil ag cliseadh ar institiúid creidmheasa nó institiúid airgeadais nó gur dócha go gclisfidh uirthi i gcomhréir le hAirteagal 32(4) de Threoir 2014/59/AE, cuirfidh maoirseoirí airgeadais na húdaráis sin ar an eolas faoi aon idirbheart, cuntas nó gaolmhaireacht gnó atá á bhainistiú ag an institiúid creidmheasa nó institiúid airgeadais sin ar chuir an FIU ar fionraí é de bhun Airteagal 24.

5.   Tuairisceoidh maoirseoirí airgeadais ar bhonn bliantúil do AMLA maidir lena gcomhar le húdaráis eile de bhun an Airteagail seo, lena n-áirítear rannpháirtíocht FIUnna sa chomhar sin.

6.   Faoin 10 Iúil 2029, déanfaidh AMLA, i gcomhairle le ÚBE, treoirlínte a eisiúint maidir le comhar idir maoirseoirí airgeadais agus na húdaráis dá dtagraítear i míreanna 2, 3 agus 4, lena n-áirítear maidir le leibhéal rannpháirtíochta na FIUnna sa chomhar sin.