Artikolu 64 Kooperazzjoni fir-rigward ta' istituzzjonijiet ta' kreditu jew istituzzjonijiet finanzjarji

1.   L-Istati Membri għandhom jiżguraw li s-superviżuri finanzjarji, l-FIUs, u l-awtoritajiet kompetenti għas-superviżjoni tal-istituzzjonijiet ta’ kreditu jew istituzzjonijiet finanzjarji skont atti legali oħra tal-Unjoni, jikkooperaw mill-qrib ma' xulxin skont il-kompetenzi rispettivi tagħhom u jipprovdu lil xulxin l-informazzjoni rilevanti għat-twettiq tal-kompiti rispettivi tagħhom. Tali kooperazzjoni u skambju ta' informazzjoni ma għandhomx jaffettwaw inkjesta, analiżi FIU, investigazzjoni jew proċedimenti li jkunu għaddejjin f'konformità mad-dritt kriminali jew amministrattiv tal-Istat Membru fejn ikun stabbilit is-superviżur finanzjarju jew l-awtorità fdati b'kompetenzi għas-superviżjoni ta' istituzzjonijiet ta' kreditu jew istituzzjonijiet finanzjarji skont atti legali oħra u ma għandhomx jaffettwaw ir-rekwiżiti tas-segretezza professjonali kif previst fl-Artikolu 67(1).

2.   L-Istati Membri għandhom jiżguraw li, meta s-superviżuri finanzjarji jidentifikaw dgħufijiet fis-sistema ta' kontroll intern tal-AML/CFT u fl-applikazzjoni tar-rekwiżiti tar-Regolament (UE) 2024/1624 ta' istituzzjoni ta' kreditu li jżidu materjalment ir-riskji li għalihom l-istituzzjoni hija esposta jew li tista' tkun esposta, is-superviżur finanzjarju jinnotifika minnufih lill-Awtorità Bankarja Ewropea (EBA) u lill-awtorità jew lill-korp li jissorvelja lill-istituzzjoni ta' kreditu f'konformità mad-Direttiva 2013/36/UE, inkluż lill-BĊE li jaġixxi f'konformità mar-Regolament (UE) Nru 1024/2013.

Fil-każ ta' żieda potenzjali fir-riskju, is-superviżuri finanzjarji għandhom ikunu jistgħu jikkooperaw u jikkondividu informazzjoni mal-awtoritajiet li jkunu qed jissorveljaw l-istituzzjoni f'konformità mad-Direttiva 2013/36/UE u jfasslu valutazzjoni komuni li għandha tiġi nnotifikata lill-EBA mis-superviżur li jkun bagħat in-notifika l-ewwel. L-AMLA għandha tinżamm infurmata b'tali notifiki.

3.   L-Istati Membri għandhom jiżguraw li, meta s-superviżuri finanzjarji jsibu li istituzzjoni ta' kreditu tkun irrifjutat li tistabilixxi relazzjoni ta' negozju, jew iddeċidiet li titterminaha, iżda d-diliġenza dovuta fir-rigward tal-klijent dokumentata skont l-Artikolu 21(3) tar-Regolament (UE) 2024/1624 ma tiġġustifikax tali rifjut, huma għandhom jinformaw lill-awtorità responsabbli biex tiġi żgurata l-konformità ta' dik l-istituzzjoni ta’ kreditu mad-Direttivi 2014/92/UE jew (UE) 2015/2366.

4.   L-Istati Membri għandhom jiżguraw li s-superviżuri finanzjarji jikkooperaw mal-awtoritajiet ta' riżoluzzjoni kif definit fl-Artikolu 2(1), il-punt (18), tad-Direttiva 2014/59/UE jew mal-awtoritajiet deżinjati kif definit fl-Artikolu 2(1), il-punt (18) tad-Direttiva 2014/49/UE.

Is-superviżuri finanzjarji għandhom jinfurmaw lill-awtoritajiet imsemmija fl-ewwel subparagrafu fejn, fl-eżerċizzju tal-attivitajiet superviżorji tagħhom, jidentifikaw, għal raġunijiet ta' AML/CFT, kwalunkwe sitwazzjoni minn dawn li ġejjin:

Fuq talba tal-awtoritajiet imsemmija fl-ewwel subparagrafu ta’ dan il-paragrafu, fejn ikun hemm probabbiltà akbar li d-depożiti ma jibqgħux disponibbli jew ikun hemm riskju li istituzzjoni ta' kreditu jew istituzzjoni finanzjarja titqies li qed tfalli jew li x'aktarx tfalli f'konformità mal-Artikolu 32(4) tad-Direttiva 2014/59/UE, is-superviżuri finanzjarji għandhom jinfurmaw lil dawk l-awtoritajiet bi kwalunkwe tranżazzjoni, kont jew relazzjoni ta' negozju taħt il-ġestjoni ta' dik l-istituzzjoni ta' kreditu jew istituzzjoni finanzjarja li tkun ġiet sospiża mill-FIU skont l-Artikolu 24.

5.   Is-superviżuri finanzjarji għandhom jirrapportaw fuq bażi annwali lill-AMLA dwar il-kooperazzjoni tagħhom ma' awtoritajiet oħra skont dan l-Artikolu inkluż l-involviment tal-FIUs f'dik il-kooperazzjoni.

6.   Sal-10 ta’ Lulju 2029, l-AMLA għandha, f'konsultazzjoni mal-EBA, toħroġ linji gwida dwar il-kooperazzjoni bejn is-superviżuri finanzjarji u l-awtoritajiet imsemmija fil-paragrafi 2, 3 u 4, inkluż dwar il-livell ta' involviment tal-FIUs f'tali kooperazzjoni.