Roinn 3 Úsáid an Chiste

Airteagal 77

Beidh úsáid an Chiste ag brath ar an gComhaontú ina n-aontaíonn na Ballstáit rannpháirteacha na ranníocaíochtaí a chruinneoidh siad ar leibhéal náisiúnta i gcomhréir leis an Rialachán seo agus le Treoir 2014/59/AE a aistriú chuig an gCiste agus déanfar na prionsabail a leagtar síos sa chomhaontú sin a chomhlíonadh leis an úsáid sin.

Dá réir sin, go dtí go sroichfidh an Ciste an spriocleibhéal maoiniúcháin dá dtagraítear in Airteagal 69, ach tráth nach déanaí ná ocht mbliana tar éis dháta chur i bhfeidhm an Airteagail seo, úsáidfidh an Bord an Ciste i gcomhréir le prionsabail a bheidh bunaithe ar roinnt an Chiste in urranna náisiúnta a fhreagróidh do gach Ballstát rannpháirteach, agus ar chumasc forchéimnitheach na gcistí difriúla ar an leibhéal náisiúnta a bheidh le leithdháileadh ar urranna náisiúnta den Chiste, mar a leagtar síos sa Chomhaontú.

Airteagal 78

I gcás réitigh grúpa a bhaineann le hinstitiúidí arna mbunú i mBallstát rannpháirteach amháin nó níos mó ar thaobh amháin, agus institiúidí arna mbunú i mBallstát rannpháirteach amháin nó níos mó ar an taobh eile, ranníocfaidh an Ciste le maoiniú an réitigh ghrúpa i gcomhréir le forálacha arna leagan síos in Airteagal 107(2) go (5) de Threoir 2014/59/AE.

Airteagal 79b

Faoin 31 Nollaig 2026, cuirfidh an Coimisiún tuarascáil faoi bhráid Pharlaimint na hEorpa agus na Comhairle ar cheist na leachtachta i gcás réitigh.

Déanfar breithniú sa tuarascáil dá dtagraítear sa chéad fhomhír ar na socruithe atá ann cheana maidir le leachtacht a sholáthar i gcás réitigh, lena n-áirítear sásraí príobháideacha agus poiblí araon, agus scrúdófar inti na bealaí is éifeachtúla chun aghaidh a thabhairt ar easnaimh leachtachta shealadacha, agus aon fhorbairtí ábhartha ar an leibhéal idirnáisiúnta á gcur san áireamh. Cuirfear roghanna beartais i láthair sa tuarascáil sin.