Airteagal 19f Cuspóir náisiúnta táscach maidir le solúbthacht neamhiontaise

Airteagal 19f

Tráth nach déanaí ná 6 mhí tar éis thíolacadh na tuarascála de bhun Airteagal 19e(1) den Rialachán seo, saineoidh gach Ballstát, ar bhonn na tuarascála sin, cuspóir náisiúnta táscach maidir le solúbthacht neamhiontaise, lena n-áirítear an rannchuidiú sonrach faoi seach ón bhfreagairt don éileamh agus ón stóráil fuinnimh leis an gcuspóir sin. Féadfaidh na Ballstáit an cuspóir sin a bhaint amach trí acmhainneacht shainaitheanta na solúbthachta neamhiontaise a fhíorú, trí bhacainní margaidh sainaitheanta a bhaint nó trí na scéimeanna tacaíochta solúbthachta neamhiontaise dá dtagraítear in Airteagal 19g den Rialachán seo. Léireofar an cuspóir náisiúnta táscach sin, lena n-áirítear an rannchuidiú sonrach faoi seach ón bhfreagairt don éileamh agus ón stóráil fuinnimh leis an gcuspóir sin, chomh maith le bearta chun é a ghnóthú, i bpleananna comhtháite náisiúnta fuinnimh agus aeráide na mBallstát a mhéid a bhaineann leis an ngné “An Margadh Inmheánach Fuinnimh” i gcomhréir le hAirteagail 3, 4 agus 7 de Rialachán (AE) 2018/1999 agus ina dtuarascálacha comhtháite náisiúnta fuinnimh agus aeráide ar dhul chun cinn i gcomhréir le hAirteagal 17 den Rialachán sin. Féadfaidh na Ballstáit cuspóirí náisiúnta táscacha sealadacha a shainiú go dtí go nglacfar an tuarascáil de bhun Airteagal 19e(1) den Rialachán seo.

Tar éis an mheasúnaithe arna dhéanamh i gcomhréir le hAirteagal 9 de Rialachán (AE) 2018/1999, tar éis dó an cuspóir náisiúnta táscach arna shainiú agus arna chur in iúl ag na Ballstáit i gcomhréir le mír 1 den Airteagal seo a fháil, cuirfidh an Coimisiún tuarascáil faoi bhráid Pharlaimint na hEorpa agus na Comhairle ina ndéanfar measúnú ar na tuarascálacha náisiúnta.

Ar bhonn chonclúidí na tuarascála arna míniú a thuilleadh leis an gcéad fhaisnéis arna cur in iúl ag na Ballstáit, féadfaidh an Coimisiún straitéis de chuid an Aontais maidir le solúbthacht a tharraingt suas, ag díriú go háirithe ar an bhfreagairt don éileamh agus ar an stóráil fuinnimh, chun a n-imscaradh a éascú, ar straitéis í atá comhsheasmhach le spriocanna 2030 an Aontais don fhuinneamh agus don aeráid agus an cuspóir aeráidneodrachta do 2050. Féadfaidh togra reachtach a bheith ag gabháil le straitéis sin an Aontais maidir le solúbthacht, i gcás inarb iomchuí.