Airteagal 12 Clárlann de chuid an Aontais le haghaidh buanaistrithe carbóin, feirmeoireacht carbóin agus stóráil carbóin i dtáirgí, agus clárlanna deimhniúcháin

1.   Bunóidh an Coimisiún faoin 27 Nollaig 2028, clárlann de chuid an Aontais le haghaidh buanaistrithe carbóin, feirmeoireacht carbóin agus stóráil carbóin i dtáirgí, agus déanfaidh sé í a choinneáil ar bun mar is cuí ina dhiaidh sin, chun an fhaisnéis a bhaineann leis an bpróiseas deimhniúcháin a chur ar fáil go poiblí ar bhealach inrochtana, ina bhfuil, ar a laghad, an fhaisnéis a leagtar amach in Iarscríbhinn III.

Agus clárlann an Aontais á bunú aige, cuirfidh an Coimisiún na tuarascálacha dá dtagraítear in Airteagal 30(5), pointe (a), de Threoir 2003/87/CE agus in Airteagal 17(3) de Rialachán (AE) 2018/841 san áireamh.

Úsáidfidh clárlann an Aontais córais uathoibrithe, lena n-áirítear teimpléid leictreonacha, chun an fhaisnéis a bhaineann leis an bpróiseas deimhniúcháin a chur ar fáil go poiblí ar bhealach slán, lena n-áirítear na deimhnithe comhlíontachta agus deimhnithe comhlíontachta nuashonraithe, ionas gur féidir cainníocht na n-aonad deimhnithe a rianú agus chun comhaireamh dúbailte a sheachaint.

Maoineofar clárlann an Aontais le táillí socraithe bliantúla is iníoctha ag úsáideoirí. Beidh na táillí sin comhréireach le húsáid chlárlann an Aontais agus leordhóthanach chun rannchuidiú le costais bunaithe agus costais oibriúcháin bhliantúla chlárlann an Aontais a chumhdach, amhail na costais a bhaineann le baill foirne nó uirlisí TF.

Is ioncam sannta seachtrach a bheidh in acmhainní ó tháillí den sórt sin chun críocha Airteagal 21(5) de Rialachán (AE, Euratom) 2018/1046. Leis an ioncam sin, cumhdófar, go háirithe, costais uirlisí, seirbhísí agus slándáil TF, lena n-áirítear na córais oibriúcháin agus cheadúnúcháin, agus na costais a bhaineann leis na baill foirne atá ag obair ar bhainistiú chlárlann an Aontais.

2.   Glacfaidh an Coimisiún gníomhartha tarmligthe i gcomhréir le hAirteagal 16 chun an tAirteagal seo a fhorlíonadh trí na ceanglais riachtanacha a leagan síos maidir le clárlann an Aontais, lena n-áirítear rialacha chun formhaoirseacht leordhóthanach ar thrádáil aonad deimhnithe a áirithiú, agus na fachtóirí atá le meas maidir le leibhéal na dtáillí dá dtagraítear i mír 1 den Airteagal seo a chinneadh agus maidir le haisghabháil na dtáillí sin.

Le linn gach ráithe dheiridh den bhliain roimh bhliain féilire an chur i bhfeidhm, glacfaidh an Coimisiún gníomh cur chun feidhme amháin nó níos mó chun méideanna aonair na dtáillí dá dtagraítear i mír 1 den Airteagal seo atá le cur i bhfeidhm don bhliain féilire sin a leagan amach nó chun athbhreithniú a dhéanamh orthu.

3.   Go dtí go mbunófar clárlann an Aontais, bunófar, le scéim deimhniúcháin, clárlann deimhniúcháin, agus déanfar í a choinneáil ar bun mar is cuí, chun an fhaisnéis a bhaineann leis an bpróiseas deimhniúcháin a chur ar fáil go poiblí agus ar bhealach slán, lena n-áirítear deimhnithe comhlíontachta agus deimhnithe comhlíontachta nuashonraithe, ina bhfuil, ar a laghad, an fhaisnéis a leagtar amach in Iarscríbhinn III, ionas gur féidir cainníocht na n-aonad atá deimhnithe i gcomhréir le hAirteagal 9 a rianú.

Úsáidfidh clárlann deimhniúcháin córais uathoibrithe, lena n-áirítear teimpléid leictreonacha, agus beidh sí idir-inoibritheach le clárlanna eile de chuid scéimeanna deimhniúcháin aitheanta eile chun comhaireamh dúbailte a sheachaint.

Glacfaidh an Coimisiún gníomhartha cur chun feidhme lena leagtar amach struchtúr, formáid agus mionsonraí teicniúla na gclárlann deimhniúcháin agus thaifeadadh, choinneáil nó úsáid na n-aonad deimhnithe, lena n-áirítear amhail dá dtagraítear sa mhír seo. Déanfar na gníomhartha cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 17.

4.   Ní eiseoidh clárlanna deimhniúcháin, nó clárlann an Aontais ach í a bheith bunaithe, aonaid dheimhnithe ach amháin go dtí go nginfear glantairbhe aistrithe carbóin nó glantairbhe laghdaithe astaíochtaí ithreach, bunaithe ar dheimhniú comhlíontachta bailí atá mar thoradh ar iniúchadh athdheimhniúcháin.

Ní eiseofar aon aonad deimhnithe níos mó ná uair amháin, agus ní úsáidfidh níos mó ná duine nádúrtha nó dlítheanach amháin é tráth ar bith.

Leanfaidh aonaid buanaistrithe carbóin, aonaid ceaptha feirmeoireachta carbóin, aonaid stórála carbóin i dtáirgí, agus aonaid laghdaithe astaíochtaí ithreach de bheith ar leithligh óna chéile.

5.   Ach amháin má chruthaítear go bhfuil carbón aistrithe á stóráil go fadtéarmach trí fhaireachán leanúnach, i gcomhréir leis na rialacha a leagtar amach sa mhodheolaíocht deimhniúcháin is infheidhme, rachaidh aonaid ceaptha feirmeoireachta carbóin agus aonaid stórála carbóin i dtáirgí in éag ag deireadh na tréimhse faireacháin le haghaidh na gníomhaíochta ábhartha, agus cuirfear ar ceal iad i gclárlann deimhniúcháin nó i gclárlann an Aontais ach í a bheith bunaithe.