Airteagal 40 Timpeallacht tástála digití Eorpach

1.   Forbróidh an Coimisiún timpeallacht tástála digití Eorpach chun measúnú a dhéanamh ar chomhpháirteanna comhchuibhithe bogearraí de chórais RTS. Cuirfidh an Coimisiún na bogearraí lena dtacaítear le timpeallacht tástála digití Eorpach ar fáil mar fhoinse oscailte.

2.   Oibreoidh na Ballstáit timpeallachtaí tástála digití chun measúnú a dhéanamh ar chomhpháirteanna comhchuibhithe bogearraí de chórais RTS. Comhlíonfaidh timpeallachtaí tástála digití den sórt sin na sonraíochtaí comhchoiteanna le haghaidh timpeallacht tástála digití Eorpacha a leagtar síos de bhun mhír 4. Cuirfidh na Ballstáit an Coimisiún ar an eolas faoina dtimpeallachtaí tástála digití.

3.   Sula gcuirfear córais RTS ar an margadh, úsáidfidh monaróirí na timpeallachtaí tástála digití dá dtagraítear i mír 1 agus i mír 2 den Airteagal seo chun measúnú a dhéanamh ar chomhpháirteanna comhchuibhithe bogearraí de chórais RTS. Cuirfear torthaí an mheasúnaithe sin san áireamh sa doiciméadacht theicniúil dá dtagraítear in Airteagal 37. Toimhdeofar na heilimintí a bhfuil torthaí an mheasúnaithe dearfach maidir leo a bheith i gcomhréir leis an Rialachán seo.

4.   Leagfaidh an Coimisiún síos, trí bhíthin gníomhartha cur chun feidhme, na sonraíochtaí comhchoiteanna do thimpeallacht tástála digití Eorpach. Déanfar na gníomhartha cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 98(2).